કર્ણાટક / પહેલાં બાઇકને ફંગોળ્યું, બાદમાં વિદ્યાર્થીનીઓને હવામાં ઉછાળી, સામે આવ્યો જોરદાર કાર અકસ્માતનો Video

• કર્ણાટકના રાયચુરમાં એક ગમખ્વાર અકસ્માતની ઘટના 
• બેફામ કારે ચાર લોકોને જોરદાર ટક્કર મારી
• ત્રણ યુવતીઓ અને એક યુવક ઇજાગ્રસ્ત 

કર્ણાટકના રાયચુરમાં એક ગમખ્વાર અકસ્માતની ઘટના સામે આવી છે. વિગતો મુજબ એક બેફામ કારે ચાર લોકોને જોરદાર ટક્કર મારી હતી. આ ઘટનામાં ચાર લોકો ઘાયલ થયા હતા, જેમાં ત્રણ યુવતીઓ અને એક યુવકનો સમાવેશ થાય છે. જેમાં ત્રણને ગંભીર અને એકને નાની-મોટી ઈજાઓ થઈ હતી. તમામની હોસ્પિટલમાં સારવાર ચાલી રહી છે. હવે આ ઘટનાનો વીડિયો સામે આવ્યો છે. જેમાં કારે કેવી રીતે તમામ લોકોને અડફેટે લીધા તે જોઈ શકાય છે. વીડિયો ખૂબ જ ડરામણો છે. કારણ કે અથડામણ બાદ રસ્તા પર આવેલી સ્કૂલની વિદ્યાર્થિનીઓ લાંબા અંતર સુધી હવામાં કૂદતી જોવા મળી હતી.

કર્ણાટકના રાયચુરમાં આ ઘટના 18 જુલાઈની બપોરે બની હતી. વીડિયોમાં જોવા મળી રહ્યું છે, કે રોડની બીજી બાજુથી બાઇક સવાર યુ ટર્ન લેવા માટે બાઇકને ફેરવે છે. સામેથી પુરપાટ ઝડપે આવી રહેલી સફેદ કલરની કારે તેમના બાઇકને બાજુમાંથી જોરથી ટક્કર મારી હતી. કાર અથડાતાની સાથે જ બાઇક ફંગોળાઇ જાય છે અને ગંભીર રીતે ઘાયલ બાઇક સવાર રોડ પર પડી જાય છે.

https://t.co/OzckR639WV#viralvdoz
On Cam: Speeding Car Runs Over 3 As Biker Takes Sudden U-Turn In Karnataka's Raichur. #Karnataka #Raichur #accident #tragic pic.twitter.com/IlDaeBS2rH

— ViralVdoz (@viralvdoz) July 26, 2023

આ પછી અસંતુલિત કાર રસ્તાના કિનારે ચાલી રહેલી બે વિદ્યાર્થીનીઓને ટક્કર મારી હતી. વીડિયોમાં જોવા મળી રહ્યું છે કે, એક વિદ્યાર્થિનીને સહેજ ટક્કર લાગતા જ તે બાજુ પર પડી જાય છે. જોકે એક વિદ્યાર્થીની કારની આગળની બાજુ સાથે અથડાતાની સાથે જ તે હવામાં કેટલાય ફૂટ કૂદવાનું ચાલુ રાખે છે અને લગભગ 20 ફૂટ દૂર પડી જાય છે.

આ તરફ કાર સવાર કાર સહિત સ્થળ પરથી નાસી છૂટ્યો હતો. ઘટનાસ્થળે ખળભળાટ મચી ગયો છે. રાહદારીઓ અને દુકાનદારો ઈજાગ્રસ્તોને મદદ કરવા દોડી આવ્યા હતા. તાત્કાલિક તમામ ઘાયલોને સારવાર માટે રાયચુર મેડિકલ હોસ્પિટલમાં દાખલ કરવામાં આવ્યા હતા. જ્યાં તે લોકોની સારવાર ચાલી રહી છે. પોલીસે આ ઘટનાને અંજામ આપનાર આરોપી કાર ચાલકની ધરપકડ કરી હતી અને તેની કાર કબજે કરી હતી.