સ્પોર્ટ્સ / ક્રિકેટ છોડીને બન્યો મહાઠગ.! 60 કંપનીઓને લગાવ્યો કરોડોનો ચૂનો, ગિનીઝ બુક ઓફ વર્લ્ડ રેકોર્ડમાં પણ છે નામ

• પૂર્વ રણજી ક્રિકેટર નાગરાજૂ બુદુમરુએ કરી છેતરપિંડી.
• નાગરાજૂ બુદુમરુની કરવામાં આવી ધરપકડ.
• સનરાઈઝર્સ હૈદરાબાદનો પણ ભાગ રહી ચૂક્યા છે.

આંધ્રપ્રદેશના પૂર્વ રણજી ક્રિકેટર નાગરાજૂ બુદુમરુની છેતરપિંડીના મામલે ધરપકડ કરવામાં આવી છે. નાગરાજૂ બુદુમરુ પર આરોપ મુકવામાં આવ્યો છે કે, તેણે 60 કંપનીઓ સાથે 3 કરોડ રૂપિયાની ઠગી કરી હતી. 28 વર્ષીય નાગરાજૂ બુદુમરુની 12 લાખ રૂપિયાની ઈલેક્ટ્રોનિક્સ ચેન સાથે છેતરપિંડી કરવાના આરોપસર ધરપકડ કરવામાં આવી છે. આંધ્રપ્રદેશના મુખ્યમંત્રી વાય. એસ. જગન મોહન રેડ્ડીના સલાહકાર બનીને ઠગી કરી હતી. 

ધ હિંદુસ્તાન ટાઈમ્સના એક રિપોર્ટ અનુસાર આરોપી નાગરાજૂ બુદુમરુએ ખુદને આંધ્રપ્રદેશના મુખ્યમંત્રી વાય. એસ. જગન મોહન રેડ્ડીના સહયોગી ગણાવ્યા હતા. આ પ્રકારે નાગરાજૂ બુદુમરુએ ઈલેક્ટ્રોનિક સ્ટોરના એક કર્મચારીને ફોન કર્યો હતો અને પૈસાની માંગ કરી હતી. આરોપી નાગરાજૂ બુદુમરુએ પોતાની ઓળખ અને રાષ્ટ્રીય ક્રિકેટ એકેડમી (NCA)ની સાથેનું જોડાણ દર્શાવવા માટે નકલી દસ્તાવેજ ઉભા કર્યા હતા. 

પોલીસે ખુલાસો કર્યો

આરોપી નાગરાજૂ બુદુમરુને 12 લાખ રૂપિયા આપ્યા બાદ કંપનીએ પૂર્વ ક્રિકેટર સામે ફરિયાદ નોંધાવી હતી. ત્યારબાદ આ ડીલ બાબતે કોઈ વાત થઈ નથી. સાઈબર ક્રાઈમના DCP ડૉ.બાલસિંગ રાજપૂતે હિંદુસ્તાન ટાઈમ્સને જણાવ્યું હતું કે, ‘ફરિયાદ નોંધાવ્યા પછી અમારી ટીમે તે પૈસાને ટ્રેક કરવાનું શરૂ કર્યું હતું. ત્યારબાદ આરોપી નાગરાજૂ બુદુમરુનું નામ સામે આવ્યું હતું. આરોપી નાગરાજૂ બુદુમરુની તેના પૈતૃક સ્થળ યાવરીપેટ્ટામાંથી ધરપકડ કરવામાં આવી હતી. આ સ્થળ આંધ્રપ્રદેશના શ્રીકાકુલમ જિલ્લામાં આવેલું છે.’

સનરાઈઝર્સ હૈદરાબાદે કરી હતી ખરીદી

પોલીસે આપેલ જાણકારી અનુસાર આરોપી નાગરાજૂ બુદુમરુએ 3 કરોડ રૂપિયા માટે 60 કંપનીઓ સાથે છેતરપિંડી કરી છે. આરોપી પાસેથી 7.6 લાખ રૂપિયા જપ્ત કરવામાં આવ્યા છે. નાગરાજૂ બુદુમરુ વર્ષ 2014થી 2016 સુધી આંધ્ર રણજી ટ્રોફી ટીમનો હિસ્સો હતો. ઈન્ડિયન પ્રીમિયર લીગ (IPL) ફ્રેન્ચાઈઝી સનરાઈઝર્સ હૈદરાબાદનો પણ ભાગ રહી ચૂક્યા છે. રિપોર્ટમાં જણાવવામાં આવ્યું છે કે, પૂર્વ ક્રિકેટરે MBA કર્યું છે. નાગરાજૂ બુદુમરુનું વર્ષ 2016માં સૌથી લાંબા નેટ સત્ર માટે ગિનીઝ બુક ઓફ રેકોર્ડ્સમાં નામ પણ નોંધાયેલું છે.