રેપ કેસમાં ચુકાદો / 'થોડું પેનિટ્રેશન સેક્સ્યુઅલ ઈન્ટરકોર્સ સાબિત કરવા પૂરતું', 7 વર્ષની બાળકી રેપ કેસમાં HCનો ચુકાદો

• સાત વર્ષની બાળકીના રેપ કેસમા હાઈકોર્ટનો મત 
• થોડું ઘણું પેનિટ્રેશન પણ રેપ ગણાય
• આરોપીની સજા યથાવત રાખી 

હાઈકોર્ટ સગીરા પર રેપના આરોપીને છોડી મૂકવાના જરા પણ મૂડમાં નથી. રેપના પ્રયાસમાં થોડા પેનિટ્રેશનને (બળજબરીથી સ્ત્રીના ગુપ્તાંગમાં પુરુષનું ગુપ્તાંગ નાખવું) પણ હાઈકોર્ટે ગુનો માન્યો છે અને આરોપીની સજા યથાવત રાખી છે. દિલ્હી હાઈકોર્ટે કહ્યું છે કે, જો કોઈ પુરુષે ઓછામાં ઓછું પેનિટ્રેશન કર્યું હોય તો પણ તે યૌન સંબંધ સ્થાપિત કરવા માટે પૂરતું છે. "ગુનાની પ્રકૃતિ પછી ભલે તે બળાત્કાર હોય કે બળાત્કાર કરવાનો પ્રયાસ હોય, સાવચેતીપૂર્વક વિચારણા કરવાની જરૂર છે. જસ્ટિસ સ્વર્ણા કાંતા શર્માએ 2008માં સાત વર્ષની બાળકી પર બળાત્કારનો પ્રયાસ કરવા અને તેને એક રૂમમાં બંધ રાખવાના આરોપમાં એક વ્યક્તિને દોષિત ઠેરવવાના ચુકાદાને યથાવત રાખતા આ ટીપ્પણી કરી હતી. કોર્ટે દોષીતની પાંચ વર્ષની સખત કેદની સજા અને દંડને પણ યથાવત રાખ્યો હતો.

કયા કેસમાં ચુકાદો 
સગીરાની માતાએ આ કેસની એફઆઈઆર નોંધાવી હતી, જેમાં તેમણે આરોપ લગાવ્યો હતો કે આ વ્યક્તિ તેની બે સગીર પુત્રીઓને એક રૂમમાં લઈ ગયો હતો અને તેની સાત વર્ષની પુત્રી સાથે બળજબરીથી શારીરિક સંબંધ બાંધ્યો હતો. જોકે તપાસમાં આ વ્યક્તિએ રેપનો પ્રયાસ કર્યો હોવાનું સામે આવ્યું હતું તેણે થોડું પેનિટ્રેશન કર્યુ હતું પરંતુ કોર્ટે થોડા પેનિટ્રેશનને પણ રેપ ગણાવ્યો છે. નીચલી કોર્ટે આરોપીને  પાંચ વર્ષની સખત કેદની સજા અને દંડ ફટકાર્યો હતો. આ સજાની સામે આરોપીએ હાઈકોર્ટમાં અપીલ દાખલ કરી હતી. આ અપીલને ફગાવી દેતા જસ્ટિસ શર્માએ કહ્યું હતું કે સગીર પીડિતાની જુબાની પરથી સ્પષ્ટ થાય છે કે, જ્યારે તેની નાની બહેન બહાર રાહ જોઈ રહી હતી ત્યારે તેને એકલી રૂમમાં લઈ જવામાં આવી હતી. બળાત્કારના પાસા પર કોર્ટે કહ્યું હતું કે, જુબાનીમાં એ પણ સ્પષ્ટ થાય છે કે તે વ્યક્તિએ પેનિટ્રેશન કર્યું છે. 

આરોપીએ પેનિટ્રેશનનો પ્રયાસ કર્યો તે રેપ ગણાય
કોર્ટે કહ્યું કે, બળાત્કારને નકારી કાઢવામાં આવ્યો છે કારણ કે ત્યાં કોઈ પેનિટ્રેશન થયું નથી, જોકે અપીલકર્તાએ પેનિટ્રેશન કરવાનો પ્રયાસ કર્યો છે, જેના કારણે પીડિતને પીડા થઈ હતી. જો કે, પીડિતાની માતા ઘટના સ્થળે આવી હોવાથી અપીલકર્તા પોતાનું કૃત્ય પૂર્ણ કરી શક્યો ન હતો. જસ્ટિસ શર્માએ કહ્યું કે, એવું ન કહી શકાય કે પીડિતાને આવું બધું કહેવા માટે શીખવાડવામાં આવ્યું હતું.  સુનાવણી દરમિયાન આના કોઈ સંકેત મળ્યા નથી.