બેઠક / દિલ્હીમાં વધતાં કોરોના કેસ પર એક્શનમાં અમિત શાહ, CM સાથે તાબડતોડ બેઠક બાદ આપ્યા આ નિર્દેશ

• દિલ્હીમાં થોડા દિવસોથી કોરોના વાયરસના કેસમાં ઉછાળો 
• અમિત શાહે કેજરીવાલ સાથે કરી હાઈલેવલ મિટિંગ 
• દિલ્હીમાં ટેસ્ટની સંખ્યા ડબલ અને નવા 750 ICU બેડ ઉમેરાશે 

દિલ્હીમાં કોરોના વાયરસના કારણે સતત કેસમાં વધારો થઇ રહ્યો છે અને સંક્રમણની ગંભીરતાને જોતા આજે કેન્દ્રીય ગૃહમંત્રી અમિત શાહે તાબડતોડ બેઠક બોલાવી હતી જેમાં કોરોના વાયરસની પરિસ્થિતિની સમીક્ષા કરવામાં આવી હતી. આ બેઠકમાં કેન્દ્રીય સ્વાસ્થ્ય મંત્રી હર્ષવર્ધન અને દિલ્હીના ઉપરાજ્યપાલ અનિલ બૈજલની સાથે દિલ્હીમાં મુખ્યમંત્રી પણ ઉપસ્થિત રહ્યા હતા. 

બેઠકમાં અમિત શાહે કહ્યું કે દિલ્હીમાં કોરોના વાયરસનાં ટેસ્ટ ડબલ કરવામાં આવશે અને મોબાઈલ ટેસ્ટિંગ વાન પણ હવે તૈનાત કરવામાં આવશે.  શાહે કહ્યું એ દિલ્હીમાં કોરોના વાયરસના હલકા લક્ષણોવાળા દર્દીઓને પણ સુવિધા મળી રહે તે માટે MCD હોસ્પિટલને કોવિડ હોસ્પિટલમાં સમર્પિત કરવામાં આવશે. '

કેજરીવાલે બેઠક બાદ કહ્યું કે દિલ્હીમાં સૌથી મોટી સમસ્યા ICU બેડની છે અને હવે તે વધારવામાં આવશે. તેમણે કહ્યું કે હું કેન્દ્ર સકરાર અને અમિત શાહનો આભાર વ્યક્ત કરું છું કે તેમણે મિટિંગ બોલાવી. આ સમય પર બધા સાથે મળીને કામ કરે તો દિલ્હીના લોકોનાં જીવ બચાવી શકાય.  

કુલ 750 ICU બેડ ઉપલબ્ધ કરાવાશે 

તેમણે કહ્યું કે દિલ્હીમાં મે મહિનામાં બનાવામાં આવેલ હોસ્પિટલમાં 250થી 300 ICU બેડ સામેલ કરવામાં આવશે અને છતરપુરમાં 10 હજાર બેડનાં કોવિડ સેન્ટરને વધુ સશક્ત કરવામાં આવશે. 

નોંધનીય છે કે દિલ્હીમાં કોરોના વાયરસના કેસ દિવાળીની સીઝનમાં ખૂબ વધ્યાં છે જેના કારણે એક્ટિવ કેસની સંખ્યા પણ વધી છે.  આ પહેલા પણ જ્યારે દિલ્હીમાં કોરોના વાયરસના કેસ વધ્યાં હતા ત્યારે અમિત શાહે વિવિધ એક્શન લીધા હતા.