- સાળંગપુરમાં હનુમાન જયંતિની ઉજવણી
- દાદાના દર્શન કરવા ભક્તોનું ઘોડાપૂર ઉમટ્યું
- કેન્દ્રીય ગૃહ મંત્રી અમિત શાહ પણ આવશે સાળંગપુર
- નવા ભોજનાલયનું કરશે લોકાર્પણ
આજે ચૈત્રી સુદ પૂર્ણિમા એટલે હનુમાન જયંતિ છે. હનુમાનજીના મંદિરોમાં હનુમાનજીના ભવ્યાતિભવ્ય જન્મોત્સવની ઉજવણી શરૂ થઈ ગઈ છે. બોટાદના સાળંગપુરમાં પણ હનુમાન જયંતિની ભવ્ય ઉજવણી શરૂ થઈ છે. કષ્ટભંજન દાદાના દર્શન માટે મોટી સંખ્યામાં ભક્તો ઉમટી પડ્યા છે. વહેલી સવારથી જ ‘પવનપુત્ર હનુમાન કી જય, જય શ્રી રામ’ ના નારાથી પરિસર ગુંજી ઉઠ્યું છે. આજે હનુમાન જયંતિ પ્રસંગે સાળંગપુર મંદિરે 10 લાખથી વધુ ભક્તો દાદાના દર્શન કરશે. તેથી દર્શનાર્થીઓને મુશ્કેલી ન થાય એ માટેની વ્યવસ્થા કરવામાં આવી છે. આ ઉપરાંત વાહન પાર્કિંગ માટે વિશાળ પાર્કિંગ એરિયા બનાવવામાં આવ્યા છે.
અમિત શાહ પણ આવશે દાદાના દર્શન કરવા
કેન્દ્રીય ગૃહમંત્રી અમિત શાહ પણ આજે સાળંગપુર આવી રહ્યા છે. આજે સાળંગપુરમાં 55 કરોડના ખર્ચે તૈયાર થયેલું ભોજનાલયનું ઉદ્ધાટન કેન્દ્રીય ગૃહમંત્રી અમિત શાહનાં હસ્તે કરવામાં આવનાર છે. બપોરે 11 કલાકે કેક કેક કાપી દાદાના જન્મોત્સવની ઉજવણી કરાશે. હનુમાન જયંતિ પર સાળંગપુરમાં યજ્ઞ પણ યોજાવાના છે, જેમાં આશરે 500 દંપતી ભાગ લેશે.
ભોજનાલયની ખાસિયત
સાળંગપુરમાં ગુજરાતનું સૌથી મોટું હાઇટેક “શ્રી કષ્ટભંજનદેવ ભોજનાલય” બનાવવામાં આવ્યું છે. 55 કરોડના ખર્ચે “શ્રી કષ્ટભંજનદેવ ભોજનાલય”નું નિમાર્ણ થયું છે. જેમાં 4 હજાર ભક્તો એક સાથે બેસી જમી શકે તેવી વ્યવસ્થા કરવામાં આવી છે. ત્યારે 7 વીઘામાં ભોજનાલય પથરાયેલુ છે. તેમજ 3 લાખ 25 હજાર સ્ક્વેર ફુટમાં બિલ્ડીંગનુ બાંધકામ પણ કરવામાં આવ્યું છે. 255 કોલમ પર ઊભું કરાયું “શ્રી કષ્ટભંજનદેવ ભોજનાલય”.
ગેસ-વીજળી અને લાઈટ વગર થર્મલ બેઝથી બનશે રસોઈ
ભોજનાલયમાં 4550 સ્ક્વેર ફૂટમાં વિશાળ કિચન બનાવાયું છે. જેમાં 1 કલાકમાં 20 હજારથી વઘુ લોકોની રસોઈ બની શકે છે. ગેસ-વીજળી અને લાઈટ વગર થર્મલ બેઝથી રસોઈ બનશે. ભોજનાલયમાં કુલ 7 ડાયનિંગ હોલ છે. 30,060 સ્ક્વેર ફૂટમાં ફસ્ટ અને સેકન્ડ ફ્લોર પર 2 મોટા ડાઈનિંગ હોલનું નિર્માણ કરવામાં આવ્યું છે. ભોજનાલયમાં કુલ 79 રૂમ બનાવ્યા છે. તેમજ ભોજનાલયમાં કુલ 5 લિફ્ટ બનાવવામાં આવી છે. ઇન્ડિયન રોમન સ્ટાઇલનું ભોજનાલયનું એલિવેશન છે. તેમજ ભોજનાલયમાં કુલ 17 લાખથી વધુ શ્રીરામ લખેલી ઇંટોનો ઉપયોગ થયો છે. 3 મહિનામાં ગાંધીનગરના ભઠ્ઠામાં ઇંટો બનાવવામાં આવી છે. 3,35,000 સ્ક્વેર ફૂટમાં વિશેષ ટાઈલ્સ લગાવવામાં આવી છે. 25 તીર્થધામની માટીનો ઉપયોગ ભોજનાલય બનાવવામાં થયો. બાંધકામમાં 22 લાખ 75 હજાર ટનથી વધુ લોખંડનો ઉપયોગ કરાયો છે. 180 કારીગરો દિવસના 12 કલાક કામ કરતા હતા.
હનુમાનજી દાદાની મૂર્તિનું અનાવરણ કરાયું
અત્રે ઉલ્લેખનીય છે કે, સાળંગપુર કષ્ટભંજન હનુમાન મંદિરમાં 54 ફૂટની વિરાટકાય 'કિંગ ઓફ સાળંગપુર'ના નામથી ઓળખાતી હનુમાનજી દાદાની મૂર્તિનું અનાવરણ થઈ ગયું છે. ગઈકાલે આ પ્રસંગે લાખો ભક્તો પણ દર્શન કરી ધન્યતા અનુભવી હતી. આ મૂર્તિ એટલી વિશાળ છે કે તેના 7 કિલોમીટર દૂરથી પણ દર્શન કરી શકાય છે. હનુમાનજીની પ્રતિમાનું વજન 30 હજાર કિલો છે.
