મહામારી / કોરોના મહામારી લઈને કેન્દ્રએ આપી મોટી ચેતવણી, હળવાશથી ન લેતા કારણ કે આગામી 4 સપ્તાહ...

• નીતિ આયોગના મેમ્બર પ્રોફેસર વિનોદ કે પૌલની ચેતવણી
• ભારત માટે 4 અઠવાડિયા ગંભીર
• લોકોએ સાવધાની રાખવી જરુરી
• અન્યથા પરિસ્થિતિ સંભાળવી ઘણી અઘરી બની જશે. 

કેન્દ્રીય આરોગ્ય સચિવ રાજેશ ભૂષણ સાથે પ્રેસ કોન્ફન્સને સંબોધિત કરતા નીતિ આયોગના મેમ્બર પ્રોફેસર વિનોદ કે પૌલે જણાવ્યું કે ભારતમાં કોવિડ મહામારી વધી છે. આ મહામારીને હળવાશથી લઈ શકાય તેમ નથી. કોરોનાના કેસો વધી રહ્યાં છે કોરોના વાઈરસના કેસો વધવાની ગતિ પણ ગત સમય કરતા ખૂબ વધારે છે. માટે લોકોએ સાવધાની રાખવી જરુરી છે અન્યથા પરિસ્થિતિ સંભાળવી ઘણી અઘરી બની જશે. 

આગામી ચાર અઠવાડિયા ભારત માટે ઘણા ગંભીર

વિનોદ પૌલે જણાવ્યું કે આગામી ચાર અઠવાડિયા ભારત માટે ઘણા ગંભીર છે. આપણે હજુ પણ મહામારીને કન્ટ્રોલમાં રાખી શકીએ તેમ છીએ. પરંતુ લોકોની ભાગીદારી ખૂબ જરૂરી છે. તેમણે લોક માનસમાંથી કોરોનાની રસી અંગેની અનિશ્ચતતા અને શંકાઓ પણ દૂરર કરી. તેમણે કહ્યું કે વિદેશમાં ક્યાંય પણ 45 વર્ષથી મોટી ઉંમરના લોકો માટે કોરોના રસી ફરજિયાત નથી પરંતુ ભારતમાં 45 વર્ષની વધારે વયના લોકોને કોરોનાની રસી મફતમાં અપાઈ રહી છે. લોકોએ રસી મૂકાવવી જોઈએ. તેમણે કહ્યું કે ભારતમાં ઉપલબ્ધ કોરોનાની રસી ખૂબ જ સુરક્ષિત અને અસરકારક છે. 

દેશમાં 92 ટકા દર્દીઓ છે તે રિકવર થઈ ચૂક્યા છે

પ્રેસ કોન્ફરન્સમાં કેન્દ્રીય આરોગ્ય સચિવ રાજેશ ભૂષણે કોરોના મામલે નવી અપડેટ આપતા કહ્યું હતું કે દેશમાં 92 ટકા દર્દીઓ છે તે રિકવર થઈ ચૂક્યા છે અને અત્યાર સુધીમાં લગભગ 1.3 ટકા દર્દીઓની મોત થયા છે, અને લગભગ 6 ટકા કેસ એવા પણ છે કે જે નવા છે અને હાલમાં જ સામે આવ્યા છે. 

મહારાષ્ટ્રમાંથી 58 ટકા કેસ 

કોવિડ મામલે વધુ જાણકારી આપતા આરોગ્ય સચિવે કહ્યું હતું કે કોરોનાના કુલ કેસોના લગભગ 58 ટકા કેસ મહારાષ્ટ્રમાંથી જ છે, કોરોનાથી મોતના મામલે પણ મહારાષ્ટ્ર જ (34%) સૌથી  આગળ છે. વધુમાં માહિતી આપતા કહ્યું હતું કે મહારાષ્ટ્રમાં અઠવાડિક સંક્રમણ દર પણ વધીને હવે 24 ટકા થઈ ગઈ છે, જે ચિંતાનો વિષય છે, મહત્વનું છે કે આની પહેલા આ રેટ ફેબ્રુઆરીમાં 6 ટકાએ પહોંચી ગયો હતો. 

રસીના કુલ; 43 લાખ ડોઝ આપવામાં આવ્યા

દેશમાં ચાલી રહેલા રસીકરણ અભિયાનને લઈને માહિતી આપતા કેન્દ્રીય સચિવે કહ્યું હતું કે ભારતમાં ગઈ કાલે રસીના કુલ; 43 લાખ ડોઝ આપવામાં આવ્યા હતા,અને આના લીધે મંગળવાર સવાર સુધીમાં કુલ 8 કરોડ 31 લાખ લોકોનું રસીકરણ કરી શકાયું છે.

દેશના ચાર રાજ્યોમાં સૌથી વધુ પ્રભાવિત 10 જિલ્લાઓ 

કેન્દ્રીય આરોગ્ય સચિવ રાજેશ ભૂષણે વધુમાં કહ્યું હતું કે કોરોનાથી સૌથી વહુ ખરાબ રીતે પ્રભાવિત 10 જિલ્લાઓમાં છત્તીસગઢનું દુર્ગ પણ સામેલ છે, આ સિવાય મહરાષ્ટ્રના 7, કર્ણાટકનો એક અને દિલ્હી પણ સામેલ છે.