મહામંથન / કિરીટ પટેલ અને ભૂપત ભાયાણીની વિવાદિત ટિપ્પણી, પછી સુફિયાણી વાતો કેમ?

આપણે ઘણીવાર વડીલોને એવું કહેતા સાંભળીએ છીએ કે તીર કમાનમાંથી છૂટી ગયું. વડીલોની સલાહ એટલા માટે હોય છે કે બોલતા પહેલા કે કોઈપણ કાર્ય કરતા પહેલા વિચાર કરી લેવો. જો કે નેતાઓ આવો કોઈ વિચાર કરતા નથી. નેતાઓ ફાવે એમ નિવેદન પણ કરે છે અને પછી એકદમ ડાહ્યા ડમરા થઈને નિવેદનની માફી પણ માગી લે છે. ગુજરાત સહિત દેશના રાજકારણમાં એક અયોગ્ય કહી શકાય એવો ટ્રેન્ડ શરૂ થયો છે કે જેમાં પહેલા કોઈ વ્યક્તિ કે સમુદાયનું હનન થાય તેવા શબ્દો ઉચ્ચારવા અને પછી સુફિયાણી વાત કરતા એમ કહેવું કે મારો આશય કોઈને ઠેસ પહોંચાડવાનો નહતો. મોટેભાગે નેતાઓની એવી હથોટી પણ બેસી ગઈ હોય છે કે તેમના નિવેદનને લોકો ઝડપથી ભૂલી પણ જાય. આપણે જવાબદાર માધ્યમ તરીકે એ સવાલ ચોક્કસ પૂછીશું કે જે જાહેર જીવનમાં છે તે પોતાની ભાષા કે શબ્દો ઉપર કાબૂ કેમ ન રાખી શકે. નેતાઓના ઉદાહરણ જનતા આપતી હોય ત્યારે નેતાનું અનુકરણ ઉદાહરણરૂપ કેમ નથી. બીજાને નીચા બતાવીને ક્ષણિક પબ્લિસિટી મેળવી લેવાનું ચલણ કેટલું ખતરનાક છે, પહેલા બોલવું અને પછી માફી માગવી એ ટ્રેન્ડ બંધ ક્યારે થશે

મન ફાવે એમ બોલવાનું ?

નેતાઓના અમર્યાદ બોલ યથાવત રહ્યાં છે. નેતા અસભ્ય ભાષાનો ઉપયોગ કરે છે. અસભ્ય શબ્દો બદલ વિવાદ થાય એટલે માફી માગે છે. નેતાના ભાથામાંથી અભદ્ર શબ્દોના તીર સતત છૂટે છે પણ નેતાઓની જીભ બેકાબૂ કેમ બની રહી છે? અન્ય વ્યક્તિ કે સમુદાયનું ચરિત્રહનન કરવું કેટલું યોગ્ય? નેતાઓ જોખી-તોળીને કેમ નથી બોલતા? નેતાઓના શબ્દોથી મહાભારત કેમ થાય?

તાજેતરમાં ક્યા નેતા વિવાદીત નિવેદનથી ચર્ચામાં?

AAP છોડીને ભાજપમાં આવેલા ભૂપત ભાયાણી
જૂનાગઢ જિલ્લા ભાજપ પ્રમુખ કિરીટ પટેલ

બંને નેતાઓ ચર્ચામાં કેમ?

ભૂપત ભાયાણીએ રાહુલ ગાંધી અંગે અસભ્ય શબ્દો ઉચ્ચાર્યા છે. નિવેદન સામે હોબાળો થતા ભૂપત ભાયાણીએ માફી માગી છે. ભાયાણીએ એવી વાત કરી કે કોઈને ઠેસ પહોંચાડવાનો ઈરાદો નહતો. તેઓ રાહુલ ગાંધી અને PM મોદીની સરખામણી કરવા માગતા હતા. જૂનાગઢ જિલ્લા ભાજપ પ્રમુખ કિરીટ પટેલે પણ અસભ્ય શબ્દો ઉચ્ચાર્યા હતાં. કિરીટ પટેલે ચોક્કસ સમાજની મહિલાઓ અને દિવ્યાંગજન માટે અયોગ્ય શબ્દો ઉચ્ચાર્યા છે. હોબાળો થતા કિરીટ પટેલે પણ માફી માગી છે. 

વાંચવા જેવું: 121 કરોડની વસ્તુઓ જપ્ત, ગુજરાતમાં કેટલા મતદારો, ક્યાં સૌથી વધુ, કેવું આયોજન, તમામ પ્રશ્નોનો જવાબ એક ક્લિકમાં

નિવેદન બાદ શું થયું?

ભૂપત ભાયાણી સામે કોંગ્રેસે પ્રહાર કર્યા છે. કોંગ્રેસે કહ્યું કે ભૂપત ભાયાણીને આવા શબ્દો શોભતા નથી. 20 વર્ષથી જાહેરજીવનમાં હોય તે આવા શબ્દો ન ઉચ્ચારે, જૂનાગઢ જિલ્લા કોંગ્રેસ પ્રમખે ભૂપત ભાયાણી સામે ફરિયાદ કરી છે. જિલ્લા કોંગ્રેસ પ્રમુખ ભરત અમીપરાએ ચૂંટણીપંચમાં ફરિયાદ કરી છે. જૂનાગઢ જિલ્લા ભાજપ પ્રમુખને દિવ્યાંગ અધિકાર મંચની ચેતવણી આપી છે. દિવ્યાંગ અધિકાર મંચે ભાજપ સામે કાળા વાવટા ફરકાવવાની ચેતવણી આપી છે.

VTV Gujarati Newsની તમામ અપડેટ સૌથી પહેલા મેળ​વ​વા માટે અમારી WhatsApp ચેનલ ફોલો કરો