પોઝિટિવ ઇફેક્ટ / લોકડાઉનને કારણે ભારતમાં 40 વર્ષમાં પ્રથમ વખત બની આ ઘટના

• 40 વર્ષ બાદ ઘટ્યું કાર્બન ડાયોક્સાઈડ ઉત્સર્જન 
• કોલસા અને પેટ્રોલ-ડિઝલના ઉપયોગના ઘટાડાની અસર 
• માર્ચ મહિનામાં 15 ટકા ઓછું થયું CO2 નું ઉત્સર્જન

આર્થિક ગતિવિધિઓ થંભી જતા જોવા મળી અસર 

દેશમાં લોકડાઉનની ઘણી આડઅસર થઇ છે.  લોકડાઉનના કારણે લાખો લોકોને મુશ્કેલીનો સામનો કરવો પડી રહ્યો છે. જ્યારે બીજી તરફ લોકડાઉનથી સારી અસર પણ થઇ રહી છે. લોકડાઉનમાં આર્થિક ગતિવિધિઓ પણ બંધ હોવાના કારણે હવામાં ઝેરીલા વાયુનું ઉત્સર્જન ઘટી રહ્યું છે. સેન્ટર ફોર રીસર્ચ ઓન એનર્જી એન્ડ ક્લિન એરના અહેવાલમાં આ ધડાકો થયો છે. 

અહેવાલ મુજબ માર્ચ મહિનામાં CO2 નું ઉત્સર્જન 15 ટકા ઓછું થયું. આટલું જ નહીં એપ્રિલ મહિનામાં કાર્બન ડાયોક્સાઈડનું ઉત્સર્જન 30 ટકા સુધી ઘટ્યું હશે તેવું અનુમાન લગાવવામાં આવ્યુ છે. આ અહેવાલમાં વિવિધ મંત્રાલયના ડેટાનો ઉપયોગ કરવામાં આવ્યો છે. વર્ષ 1982 બાદ પહેલીવાર આ ઘટના જોવા મળી છે. 

કાર્બન ડાયોક્સાઈડના ઘટાડા પાછળ કારણ શું ? 

નોંધનીય છે કે આ ખતરનાક વાયુનો એક મોટો સ્ત્રોત કોલસો છે. જ્યારે માર્ચ મહિનામાં કોલસામાંથી ઉર્જા બનાવવાના કામમાં 15 ટકાનો ઘટાડો અને એપ્રિલના પહેલા 3 અઠવાડિયામાં કોલસામાંથી ઉર્જાના ઉત્પાદન કાર્યમાં 31%નો ઘટાડો નોંધાયો. અહેવાલ મુજબ દેશમાં ઉર્જા અને પરિવહન ક્ષેત્રના કારણે કાર્બન ડાયોક્સાઈડનું ઉત્સર્જન થાય છે. માત્ર કોલસો જ નહીં દેશમાં પેટ્રોલ અને ડીઝલનો ઉપયોગ ઘટી ગયો છે. માર્ચ મહિનામાં જ દેશમાં તેની માંગમાં 18 ટકાનો કડાકો જોવા મળ્યો હતો. જેના કારણે CO2 નું ઉત્સર્જન ઘટયું.