વ્યથા / 2008 બ્લાસ્ટ કેસનો ચુકાદો આવતા મૃતકની માતાએ કહ્યું- 'દીકરાને ગુમાવવાનું દુઃખ હવે દોષિતોની માતાને ખબર પડશે'

• બોમ્બ બ્લાસ્ટના દોષીતોને આજે મળી સજા 
• પીડિત પરિવારોએ તેમની વ્યથા ઠાલવી 
• કોર્ટના ચુકાદાથી પીડિત પરિવારોને સંતોષ 

અમદાવાદ સિરિયલ બ્લાસ્ટ કેસમાં આજે આરોપીઓને સજા આપી દેવામાં આવી છે. જેથી જે પણ લોકો આ બોમ્બ બ્લાસ્ટનો ભોગ બન્યા હતા તેમના પરિવારને છેક આજે ન્યાય મળ્યો છે. અમદાવાદના રાયપુર વિસ્તારમાં રહેતી એક માતાએ તેનો 14 વર્ષનો બાળક બોમ્બ બ્લાસ્ટમાં ગુમાવ્યો હતો. જેમણે આજે મહત્વનું નિવેદન આપ્યું છે.

પુત્ર ગુમાવનાર માતાનું મોટું નિવેદન 

14 વર્ષના બાળકને ગુમાવનાર માતાએ કહ્યું કે તેને આજે પણ તેના દિકરાની દરેક ક્ષણો યાદ છે. તેમના દિકરાનું નામ અંકિત મોદી હતું. દોષીતોને સજા મળ્યા બાદ આજે માતાએ કહ્યું કે દિકરાને ગુમાવાનું દુખ દોષિતોની માતાને આજે ખબર પડશે. 

14 વર્ષે ન્યાય મળતા સંતોષ વ્યક્ત કર્યો 

અમદાવાદમાં રહેતા જવસંતભાઈનું પણ બ્લાસ્ટમાં અવસાન થયું હતું. જેમા તેઓ પીડિતોને સિવિલમાં મદદ કરવા ગયા હતા તે સમયે તેમનું અવસાન થયું હતું. આજે તેમના પરિવાર સાથે પણ VTV દ્વારા વાતચીત કરવામાં આવી. જેમા તેમના પરિવારને પણ 14 વર્ષે ન્યાય મળતા તેમણે સંતોષ વ્યક્ત કર્યો હતો. 

પોલીસની કામગીરીને વડોદરાના નાગરીકોએ બીરદાવી 

બીજી તરફ આજે વડોદરાના નાગરીકો દ્વારા પણ મહત્વનું નિવેદન આપવામાં આવ્યું છે. જેમા વડોદરાના નાગરીકોએ કહ્યું કે નિર્દોષોનો જીવ લેનાર નરાધમોને ફાંસીની સજા એક દાખલારૂપ છે. સાથેજ વડોદરાના નાગરીકોએ પોલીસની કામગીરીને પણ વધાવી હતી. વધું તેમણે કહ્યું કે કોર્ટના ચુકાદાથી હવે દેશ વિરોધી પ્રવૃત્તિઓ હવે અટકશે. 

સગર્ભા મહિલાનું થયું હતું મોત 

જે સમયે બોમ્બ બ્લાસ્ટ થયો હતો ત્યારે મોડાસાના એક દંપત્તિએ પણ જીવ ગુમાવ્યો હતો. જેમા બ્લાસ્ટમાં જીવ ગુમાવનાર તબીબ પત્ની સગર્ભા હતી. પોતાના પુત્ર અને પુત્રવધુને ગુમાવનાર પિતાને કોર્ટના નિર્ણથી ઘણો સંતોષ છે. સાથેજ પીડિત પિતાએ પોલીસની કામગીરીને પણ બિરદાવી હતી અને બ્લાસ્ટના પીડિતોને 14 વર્ષે ન્યાય મળતા તેમણે સંતોષ વ્યક્ત કર્યો છે.