નવાજૂનીના એંધાણ! / સરકારમાં મોટા ફેરબદલ બાદ દિલ્હીથી ગુજરાત આવ્યા ભાજપના દિગ્ગજ નેતા, CM સાથે મિટિંગ

• ભાજપના રાષ્ટ્રીય સંગઠન મહામંત્રી બી.એલ.સંતોષ ગુજરાતમાં
• ગાંધીનગરમાં મુખ્યમંત્રી નિવાસસ્થાને યોજાશે મહત્વની બેઠક
• રત્નાકરનાં નિવાસે પણ બી.એલ. સંતોષ નેતાઓ સાથે કરશે ચર્ચા

વિધાનસભાની ચૂંટણી પૂર્વે ભાજપ દ્વારા કવાયત હાથ ધરવામાં આવી છે. ત્યારે આજે ગાંધીનગરમાં પ્રદેશ સંગઠન મહામંત્રી રત્નાકર સાથે મુલાકાત કરશે. રત્નાકરનાં નિવાસસ્થાને તેઓ નેતાઓ સાથે ચર્ચા કરશે. એ સિવાય ગાંધીનગર કમલમ ખાતે પણ બી.એલ.સતોષના અધ્યક્ષસ્થાને બેઠકોનો દોર શરૂ કરાશે. જ્યારે સાંજના 7 કલાકે CM નિવાસસ્થાને પણ બી.એલ સંતોષ બેઠક યોજશે. જ્યાં કોર કમિટીના સભ્યો સાથે મંથન કરશે. બેઠકમાં ચૂંટણીલક્ષી ચર્ચાઓ અને હાઈકમાન્ડની સૂચનાનું આદાનપ્રદાન થશે.

બી.એલ.સંતોષ આવતી કાલે રાજકોટ જશે

વધુમાં જણાવી દઇએ કે, બી.એલ.સંતોષ આવતી કાલે રાજકોટ જશે. આવતી કાલે રાજકોટમાં સૌરાષ્ટ્ર ઝોનની બેઠક મળશે. આ બેઠકમાં બી.એલ.સંતોષ સૌરાષ્ટ્ર-કચ્છની 54 બેઠકોની સમીક્ષા કરશે. જેમાં સૌરાષ્ટ્રના સાંસદો, ધારાસભ્યો અને મનપાના હોદ્દેદારો હાજર રહેશે.

ચૂંટણી પૂર્વે કેન્દ્રીય નેતાઓના ગુજરાતમાં ધામા વધ્યા

નોંધનીય છે કે, રાજ્યમાં આગામી થોડા મહિનાઓમાં જ વિધાનસભા ચૂંટણી આવશે અને વિધાનસભા ચૂંટણીના પડઘમરૂપે જ કેન્દ્રીય ગૃહમંત્રી અમિત શાહ સહિતના રાષ્ટ્રીય નેતાઓ વારંવાર ગુજરાતની મુલાકાતે આવી રહ્યાં છે. મહત્વનું છે કે, ગુજરાત વિધાનસભાની ચૂંટણીને લઇને રાજ્યમાં તમામ પક્ષોએ સંપૂર્ણ તૈયારીઓ શરૂ કરી દીધી છે. ત્યારે વિધાનસભા ચૂંટણી પૂર્વે રાજ્યમાં સતત કેન્દ્રના દિગ્ગજ નેતાઓના ગુજરાત પ્રવાસ વધી ગયા છે. ત્યારે આજે વધુ એક નેતા ગુજરાતની મુલાકાતે આવ્યા છે કે જેઓ CMની હાજરીમાં બેઠક કરશે. આ બેઠકમાં ચૂંટણીલક્ષી ચર્ચાઓ અને હાઈકમાન્ડની સૂચનાનું આદાનપ્રદાન થશે.

ચૂંટણીને લઈને તમામ રાજકીય પક્ષો એક્ટિવ મોડમાં

ઉલ્લેખનીય છે કે, ગુજરાતમાં વિધાનસભા ચૂંટણીને લઈને તમામ રાજકીય પક્ષો એક્ટિવ મોડમાં આવી ગયા છે. ત્યારે થોડા દિવસ અગાઉ આમ આદમી પાર્ટીએ પણ અનેક બેઠકો પરથી પોતાના ઉમેદવારો જાહેર કર્યા હતા. એ સિવાય ગઇકાલે કેન્દ્રીય પ્રધાન પિયુષ ગોયલે ગુજરાત ટેકનોલોજીકલ યુનિવર્સિટીની મુલાકાત લીધી હતી. જેમાં તેઓએ જીટીયુ ખાતે વિદ્યાર્થીઓ દ્વારા બનાવવામાં આવેલા પ્રોજેકટની મુલાકાત લીધી હતી.