રણનીતિ / ભાજપને નવા ખેલમાં 'વિશ્વાસ': ગુજરાતમાં કેજરીવાલ સામે તેમના જ પહેલાના આ દિગ્ગજ સાથીને પ્રચારમાં ઉતારવાનો તખ્તો

• કેજરીવાલની અસર ખાળવા ગુજરાતમાં ભાજપની નવી વ્યુહ રચના
• આપની સ્થાપનામાં કુમારનો મહત્વનો રોલ
• કેજરીવાલના એક સમયના સાથી ગણાતા કુમાર વિશ્વાસ 

ગુજરાત વિધાનસભાની ચુંટણીના આગમનને લઈને રાજ્યભરમાં રાજકીય ગતિવિધિઓ તેજ બની રહી છે. તેવા સંજોગો વચ્ચે આમ આદમી પાર્ટીની સ્થાપનામાં મહત્વનો રોલ અદા કરનાર અને દિલ્હીના મુખ્યમંત્રી અરવિંદ કેજરીવાલના એક સમયના અતિ નિકટના સાથી ગણાતા કુમાર વિશ્વાસ હાલ ભાજપની પડખે હોય તેવુ જણાઈ રહ્યું છે.આગામી ચૂંટણીમાં અરવિંદ કેજરીવાલ સામે ભાજપ કુમાર વિશ્વાસને  ચૂંટણી પ્રચાર અર્થે મેદાને ઉતારી શકે તેવી સૂત્રો પાસેથી માહિતી મળી રહી છે. 

કેજરીવાલની લોક ચાહના ખાળવા ખેલ 
અટકળોની રમત ગણાતા રાજકારણમાં બધુ જ શક્ય છે. ત્યારે અરવિંદ કેજરીવાલના ખૂબ જ નજીક રહેતા કુમાર વિશ્વાસ હવે ભાજપના વિશ્વાસમાં  હોય તેવા અણસાર વર્તાઇ રહ્યા છે અને ગુજરાતમાં આગામી ચૂંટણીમાં  કુમાર વિશ્વાસ ચૂંટણી પ્રચાર કરે તવી શક્યતા સેવાઇ રહી છે. ઉલ્લેખનીય છે કે દિલ્હી, પંજાબ બાદ ગુજરાતમાં પણ આપ અને અરવિંદ કેજરીવાલની લોક ચાહનામાં દિન પ્રતિદિન વધારો જોવા મળી રહ્યો છે ત્યારે આ અસરને ખાળવા માટે ભાજપ દ્વારા ખેલ પડી દઈ આ પ્રકારની વ્યુહ રચના ઘડી કાઢવામાં આવી હોવાનું જણાઇ રહ્યું છે. ઉલ્લેખનીય છે કે ગુજરાત વિધાનસભાની  ચૂંટણીમાં ભાજપ ઈતિહાસ બનાવવા માંગે છે અને 150થી વધારે બેઠકો જીતવાના ટાર્ગેટ સાથે મચી પડી છે. જે આ મુકામ હાંસલ કરવા  કોઈ પણ દાવ પેચ ખેલે તો નવાઈ નહિ! તેવી અટકળો વહેતી થઈ છે.

ગુજરાતમાં કુમાર VS કેજરીવાલ?
અમદાવાદના GMDC ગ્રાઉન્ડ ખાતે આયોજિત અપને, અપને રામ પર કુમાર વિશ્વાસે વ્યાખ્યાન આપ્યું હતું.એટલું જ નહિ કુમાર વિશ્વાસે અગાઉ અરવિંદ કેજરીવાલને ખાલિસ્તાની સમર્થક પણ ગણાવ્યા હતા. આ ઉપરાંત પંજાબમાં આપની સરકાર સત્તા પર આવ્યા  કુમાર વિશ્વાસ સામે રૂપનગર પોલીસ મથકમાં કેસ થયો હતો. જે બાદ કુમારને આપ પરથી વિશ્વાસ ઊઠી ગયો હોય તેવા વરતારા છે. એક તરફ આપથી ઘણા સમયથી છેડો ફાડી ચૂકેલા કુમાર વિશ્વાસની ભાજપ સાથે નિકટતા વર્તાઇ રહી છે. જેનો સીધો મતલબ એ છે આવનાર ગુજરાત વિધાનસભાની ચૂંટણીમા કેજરીવાલના વધતા પ્રભુત્વને ખાળવા કુમારને હાથો બનાવી ભાજપ આપનો ખેલ ઉધો પાડી શકે છે.