વિવાદ / ખેતરમાં પાવડો ચલાવતો Video વાયરલ થતા ગેનીબેન પર લાગ્યો જમીન પચાવ્યાનો આક્ષેપ, કહ્યું 'મારી કોઈ માલિકી નથી'

• બનાસકાંઠામાં ગેનીબેન ઠાકોરના વીડિયો બાદ વિવાદ 
• અમરત માળીએ ગેનીબેન પર લગાવ્યા આરોપ 
• સંસ્થાના નામે ગેનીબેને કરોડોની જમીન હડપી લીધી: અમરત માળી 
• આ જમીન મારી માલિકીની નથી:ગેનીબેન 

Banaskantha News: બનાસકાંઠા જિલ્લામાં ધારાસભ્ય ગેનીબેન ઠાકોરનો ખેતીકામ કરતા હોવાનો વીડિયો વાયરલ થયા બાદ વિવાદ સર્જાયો છે. ભાભરના ભાજપ શહેર પ્રમુખ અમરત માળીએ બનાસકાંઠાની વાવ વિધાનસભા બેઠકના કોંગ્રેસના ધારાસભ્ય ગેનીબેન ઠાકોર પર ગંભીર આક્ષેપો લગાવ્યા બાદ હવે ગેનીબેન ઠાકોરનું નિવેદન સામે આવ્યું છે. તેમણે કહ્યું કે, 'આ જમીન મારી નહીં, પરંતુ સંસ્થાની છે.' 

આ જમીનમાં મારો કોઈ માલિકી હક્ક નથીઃ ગેનીબેન ઠાકોર
અમરત માળીના આક્ષેપ પર વાવના કોંગ્રેસના ધારાસભ્ય ગેનીબેન ઠાકોરે જણાવ્યું કે, આ જમીન મારી માલિકીની નથી, આ જમીન સંસ્થાની જમીન છે. સંસ્થાની જમીનમાં વૃક્ષારોપણ થયું હોય તો વ્યક્તિગત થોડું કહેવાય. તેમણે જણાવ્યું કે, આ જમીનમાં મારો કોઈ માલિકી હક્ક નથી. મારા દ્વારા વૃક્ષારોપણથી ખેડૂતોને પ્રેરણા મળે છે. અમરત માળી જે અવળા ધંધા કરે છે તેવા અમે નથી કરતા. 

ગેનીબેને કરોડોની જમીન હડપી લીધીઃ અમરત માળી
ગેનીબેન હાથમાં પાવડો લઈને ખેતીકામ કરતા હોવાનો વીડિયો વાયરલ થયા બાદ ભાભરના ભાજપ શહેર પ્રમુખ અમરત માળીએ ગેનીબેન પર ગંભીર આરોપ લગાવ્યા હતા. તેઓએ જણાવ્યું હતું કે, ગેનીબેન ખેતીકામ કરી રહ્યા છે, તે સરકારી જમીન તેઓએ દબાણ કરીને હડપી લીધી છે. ગેનીબેન ઠાકોરે ભાભરમાં કરોડો રૂપિયાની સરકારી જમીન પર દબાણ કર્યું છે. 

'ગેનીબેન સામે દાખલ કરવો જોઈએ લેન્ડ ગ્રેબિંગનો કેસ'
અમરત માળીએ જણાવ્યું કે, આ જગ્યા સંસ્થાના નામે ગેનીબેને હડપી લીધી છે અને સરકારના પ્રજાના હિતમાં વાપરવાના નાણાથી ધારાસભ્યએ આ જગ્યા પર પાક્કી દીવાલ ઉભી કરવામાં અને કન્સ્ટ્રક્શનમાં વાપરી નાખ્યા છે. મેં આ બાબતમાં અગાઉ પણ તંત્રને અરજીઓ કરી હતી. આ બાબતે યોગ્ય તપાસ કરીને ગેનીબેન સામે લેન્ડગ્રેબિંગનો કેસ દાખલ કરવો જોઈએ.