ગાંધીનગર / માગણી નહીં સંતોષાતા `આશા' બહેનો `નિરાશ': પોલીસ અને આશા વર્કરો વચ્ચે થયું ઘર્ષણ, પડતર માંગ પર લડી લેવાના મૂડમાં

• ગાંધીનગરમાં આશાવર્કરોનો વિરોધ, વિધાનસભા તરફ કૂચ 
• બેનર, સૂત્રોચ્ચાર સાથે પડતર માંગને લઈને વિરોધ
• વિરોધ કરી રહેલા આશાવર્કરની અટકાયત

આશાવર્કરોએ પોતાની પડતર માંગને લઇને મોટી સંખ્યામાં એકઠા થઈ વિધાનસભા તરફ કૂચ કરવાનો કાર્યક્રમ ઘડી કાઢ્યો હતો. ગાંધીનગર સત્યાગ્રહ છાવણી ખાતે મહિલા શક્તિ સેનાના ચંદ્રિકા બેન સોલંકીની આગેવાનીમાં આશા વર્કરોએ ધરણાં પ્રદર્શન કર્યા. ત્યાર બાદ એસટી ડેપોની પાછળ મોટીસંખ્યામાં એકઠી થઈ સૂત્રોચ્ચારો સાથે વિધાનસભા તરફ કૂચ કરવા લાગી હતી જેનાં પગલે ગાંધીનગર સત્યાગ્રહ છાવણી ખાતે ચુસ્ત પોલીસ બંદોબસ્ત ગોઠવી દેવાયો હતો.

500 થી વધુ આશા વર્કરોની અટકાયત 
આશા વર્કરો સચિવાલયના ગેટ નંબર - 6 સુધી પહોંચે એ પહેલાં જ બીએસએનએલ કચેરી નજીક પોલીસે તેઓને અટકાવી દીધી હતી. જો કે તેમ છતાં આશા વર્કર બહેનોએ સૂત્રોચારો કરીને આગળ વધવાનો પ્રયાસ કર્યો હતો. આથી મહિલા પોલીસ દ્વારા ચંદ્રિકા સોલંકી સહિત 500 થી વધુ આશા વર્કરોની અટકાયત કરી લેવામાં આવી હતી. આ દરમ્યાન પોલીસ અને આશા વર્કરો વચ્ચે ઘર્ષણના દૃશ્યો સર્જાયા હતા. જેનાં પગલે પોલીસને આશા વર્કરોને ટીંગાટોળી પણ કરવાની નોબત આવી હતી.

વર્ગ ચારનું મહેકમ ઊભું કરવા સહીતની અનેક માંગ કરાઇ
રાજ્યના આશા વર્કર અને ફેસીલીએટર બહેનોએ કોરોના મહામારીમાં ખૂબ જ જોખમ વચ્ચે કામગીરી કરી હતી અને સરકારે પણ તેમને કોરોના વોરીયર્સ તરીકે સન્માનિત કર્યા હતા પરંતુ આશા વર્કરને મશ્કરી સમાન વેતન અપવામાં આવે છે.આથી વર્ગ ચારનું મહેકમ ઊભું કરીને બહેનોને કાયમી કર્મચારી બનાવવામાં આવે, સાતમાં પગાર પંચ મુજબ લઘુતમ વેતન ચૂકવાય તેમજ ઈન્સેન્ટીવ, માનદ વેતન, ફિક્સ કોન્ટ્રાક્ટ, આઉટસોર્સ બંધ કરવામાં આવે અને આશાવર્કર બહેનોને પેન્શન યોજનામાં સમાવેશ કરવામાં આવે, વધુમાં 180દિવસની પગાર સહિત મેટરનીટી લીવ આપવામાં આવે અને કામ ના કલાકો નક્કી કરવામાં આવે આવી અનેક પ્રકારની આશાવર્કર બહેનો દ્વારા માંગ કરાઇ છે. 40 વર્ષ વટાવી ચૂકેલા આશાવર્કર તેમજ આશા ફેસીલીટેટર બહેનોને પેન્શન યોજનામાં સમાવવામાં તેમજ તમામ આશા વર્કર તેમજ ફેસીલીટેટર બહેનોને ઓળખકાર્ડ આપવામાં આવે.
 
નવા સચિવાલય સ્વર્ણિમ પાર્ક પાસે કરાઈ અટકાયત
સરકાર સામે મોરચો માંડીને પડતર માંગણીઓનો નિકાલ કરવાની માંગણી કરવામાં આવી રહી છે. પરંતુ આજદિન સુધી આશા વર્કરોની માંગણીઓ બાબતે કોઈ નિરાકરણ નહીં લાવવામાં આવતાં આજે આશાવર્કરોએ મોટી સંખ્યામાં એકઠા થઈ વિધાનસભા તરફ કૂચ કરવામાં આવતાં સત્યાગ્રહ છાવણી ગોઠવાયેલી પોલીસ દોડતી થઇ હતી. ત્યારે પોલીસે બપોર સુધીમાં 500થી વધુ આશાવર્કરોની અટકાયત કરી લેવાતાં ઘર્ષણના દ્રશ્યો પણ જોવા મળ્યા હતા.