દિલ મોટું જોઈએ / કહેવું પડે હોં ! અમથો નથી કેવાતો કિંગ કોહલી, અનુષ્કા સાથે મળીને લીધો એવો નિર્ણય કે ચારે કોર વાહવાહી

• કોહલી-અનુષ્કાએ લીધો શખ્સને માફી આપવાનો નિર્ણય
• પુત્રી વામિકાના રેપની ધમકી આપી હતી શખ્સ
• આરોપીને માફ કરવાનો કોહલી કપલનો ફેંસલો
• હાઈકોર્ટે આરોપી સામેની અરજી કાઢી નાખી 

ભારતીય ક્રિકેટ ટીમના પૂર્વ કેપ્ટન વિરાટ કોહલીની પુત્રી પર બળાત્કાર કરવાની ધમકી આપવાના આરોપમાં બોમ્બે હાઈકોર્ટે સોમવારે એક વ્યક્તિ વિરુદ્ધ નોંધાયેલી એફઆઈઆરને રદ કરી દીધી છે. આ કેસમાં ફરિયાદી કોહલીના મેનેજરે આરોપીઓ સામેના આરોપો પડતા મૂકવાની સંમતિ આપ્યા બાદ જસ્ટિસ એ એસ ગડકરી અને પી ડી નાઈકની ડિવિઝન બેન્ચે આ આદેશ આપ્યો હતો.

2021માં શખ્સે કોહલીની પુત્રીના રેપની આપી હતી ધમકી 
2021માં જ્યારે ભારતીય ટીમને ટી20 વર્લ્ડકપમાં પહેલીવાર પાકિસ્તાન સામે હારનો સામનો કરવો પડ્યો હતો, ત્યારે હૈદરાબાદના આ વ્યક્તિએ ટ્વીટ દ્વારા કોહલીની દીકરી પર બળાત્કાર કરવાની ધમકી આપી હતી. 

ધરપકડ બાદ મળ્યાં હતા જામીન  
આ પછી દિલ્હી મહિલા આયોગ દ્વારા કરવામાં આવેલી કાર્યવાહી પર હૈદરાબાદ પોલીસે સોફ્ટવેર એન્જિનિયર રામનાગેશ અકુબથિનીની ધરપકડ કરી હતી. અકુબથિનીની નવેમ્બર 2021 માં ધરપકડ કરવામાં આવી હતી. આ પછી, તેને કલમ 67 બી હેઠળ કોર્ટમાંથી જામીન મળી ગયા હતા. આ પછી, 2022 માં, અકુબથિનીએ કેસ રદ કરવાની અરજી દાખલ કરી હતી, જેની સોમવારે સુનાવણી થઈ હતી, ત્યારબાદ કેસ રદ કરવામાં આવ્યો હતો.

હું જેઇઇ રેન્ક હોલ્ડર, ગુનાહિત ઇતિહાસ નથી, કેસ રદ કરવા આરોપીની દલીલ 
આ કેસમાં આરોપીએ આ કેસને ફગાવી દેવા માટે કોર્ટમાં અરજી કરી હતી, જેમાં તેણે પોતાની સામે કોઇ ગુનાહિત ઇતિહાસનો અભાવ હોવાનું પણ જણાવ્યું હતું. આ ઉપરાંત જેઈઈ રેન્ક હોલ્ડર હોવાના કારણે પોતાનું ભાવી બગડે નહીં તેનું પણ ધ્યાન રાખવાનું કોર્ટને જણાવ્યું હતું. 

2021માં પાકિસ્તાન સામે ભારતીય ટીમ હારી ગઈ હતી 
વિરાટ કોહલીની કેપ્ટન્સી હેઠળ 2021નો ટી-20 વર્લ્ડ કપ રમવા માટે મેદાન પર ઉતરી ત્યારે પાકિસ્તાન સામે ભારતીય ટીમની એકતરફી હારની કોઈએ કલ્પના પણ નહીં કરી હોય. આ મેચમાં ભારતીય ટીમને પાકિસ્તાને 10 વિકેટથી હરાવી હતી અને આ કારણે ટીમ ઇન્ડિયાને સોશિયલ મીડિયા પર જોરદાર ટ્રોલ પણ કરવામાં આવી હતી.