કાર્યકાળ / આ તારીખે AMCને મળશે નવા મેયર, જાણો કયા-કયા નામો સૌથી વધારે ચર્ચામાં

• અમદાવાદને મળશે નવા મેયર
• 11 સપ્ટેમ્બરે થઇ શકે છે જાહેરાત 
• ટર્મ પૂર્ણ થતા નવા મેયરની થશે નિમણૂક

Ahmedabad News: અમદાવાદના મેયર, સ્ટેન્ડિંગ ચરમેન સહિતના પદાધિકારીઓની અઢી વર્ષની ટર્મ પૂરી થવા જઈ રહી છે, ત્યારે 11મી સપ્ટેમ્બરે અમદાવાદને નવા મેયર મળશે. 11 સપ્ટેમ્બરે સવારે કોર્પોરેશન ખાતે મળનારી સામાન્ય સભામાં નવા મહિલા મેયરના નામની જાહેરાત કરવામાં આવશે. જે બાદ સ્ટેન્ડિંગ ચેરમેન સહિતના પદાધિકારીઓના નામ જાહેર કરાશે. 

આજે હાથ ધરાશે સેન્સ પ્રક્રિયા 
આજે મેયર, સ્ટેન્ડિંગ ચેરમેન સહિતના પદાધિકારીઓની સેન્સ પ્રક્રિયા હાથ ધરવામાં આવશે. 11મી સપ્ટેમ્બરે નવા મહિલા મેયરના નામની જાહેરાત કરવામા આવશે. ત્યારે આ કયું નામ હશે તેને લઈને અટકળો ચાલી રહી છે. જૈન, પટેલ અને ક્ષત્રિય સમાજમાંથી ભાજપના કેટલાક મહિલા કોર્પોરેટરના નામ રેસમાં આગળ છે. આપને જણાવી દઈએ કે અમદાવાદ મેયરની રેસમાં અત્યારે પ્રતિભા જૈન, શીતલ ડાગા અને  ગીતાબેન પટેલનું નામ સૌથી આગળ ચાલી રહ્યું છે. 

કોણ છે પ્રતભા જૈન?
પ્રતિભા જૈન વિશે વાત કરીએ તો તેઓ શાહીબાગના કોર્પોરેટર છે, તેમની આ ત્રીજી ટર્મ છે. પ્રતિભા જૈન રાજસ્થાની જૈન સમાજમાંથી આવે છે. વર્તમાન સમયમાં તેઓ મહિલા અને બાળ વિકાસ કમિટીના ચેરમેન છે. 

કોણ છે શીતલ ડાગા?  
બીજું નામ મણીનગરના કોર્પોરેટર શીતલ ડાગાનું ચર્ચાઈ રહ્યું છે. શીતલ ડાગા ઘણા વર્ષોથી ભારતીય જનતા પાર્ટી સાથે જોડાયેલા છે. તેમની આ બીજી ટર્મ છે. આપને જણાવી દઈએ કે, તેમના પતિ પણ કોર્પોરેટર રહી ચૂક્યા છે. 

કોણ છે  ગીતાબેન પટેલ?
અમદાવાદના ડેપ્યુટી મેયર અને નારાણપુરા વોર્ડના કોર્પોરેટર ગીતાબેનનું નામ પણ  મેયર પદની રેસમાં ચાલી રહ્યું છે. તેઓ પાટીદાર સમાજમાંથી આવે છે. તેઓને નારણપુરા વોર્ડના સિનિયર કોર્પોરેટર માનવામાં  આવે છે. 

અત્યારે કિરીટ પરમાર છે મેયર
અત્રે ઉલ્લેખનીય છે કે, અમદાવાદ મ્યુનિસિપલ કોર્પોરેશન પર ઘણા વર્ષોથી ભાજપનું રાજ છે. હાલ અમદાવાદના મેયર કિરીટ પરમાર છે. તેમની અઢી વર્ષની ટર્મ પૂરી થઈ રહી છે. ત્યારે નવા મેયરની 11મી સપ્ટેમ્બરે જાહેરાત કરવાનું નક્કી કરાયું છે.