પોલ ખૂલી / અમદાવાદના તંત્રનો વધુ એક કારસો : 900 બેડની ધન્વંતરિ હોસ્પિટલમાં 558 બેડ શરૂ, 342 'છૂમંતર'

• ધન્વંતરી હોસ્પિટલના બેડ ગાયબ!
• 900 બેડમાંથી 558 બેડ થયા શરૂ, અન્ય 342 બેડ થયા ગાયબ!
• 558 બેડ ભરેલા હોવાનું બોર્ડમાં દર્શાવ્યું, બાકીના 342 બેડ અંગે કોઈ સ્પષ્ટતા નહીં

ગુજરાત સહિત આખા ભારતમાં કોરોના વાયરસની બીજી ઘાતક લહેર ચાલી રહી છે. દરરોજ હજારોની સંખ્યામાં લોકો મોતને ભેટી રહ્યા છે તથા લાખોની સંખ્યામાં નવા કેસ સામે આવી રહ્યા છે. દેશભરમાં ઑક્સીજનથી લઈને બેડની અછત ઊભી થઈ ગઈ છે, અને દર્દીઓ સુવિધાના અભાવે મોતને ભેટી રહ્યા છે. ગુજરાતમાં પણ પરિસ્થિતિ ગંભીર છે. 

900માંથી માત્ર 558 બેડ શરૂ કરવામાં આવ્યા 

કોરોના વાયરસ સામે દર્દીઓને સુવિધા મળી રહે તે માટે અમદાવાદમાં 900 બેડની ધન્વંતરિ હોસ્પિટલ ઊભી કરવામાં આવી છે. અમદાવાદના યુનિવર્સિટી કન્વેન્શન હૉલમાં આ હોસ્પિટલ ઊભી કરવામાં આવી છે જેની શરૂઆત ગૃહમંત્રી અમિત શાહના હસ્તે કરવામાં આવી હતી. પરંતુ આ હોસ્પિટલમાં બેડને લઈને મોટી અસમંજસની સ્થિતિ ઊભી થઈ રહી છે. 

બાકીના 342 બેડ અંગે કોઇ સ્પષ્ટતા નહીં

900 બેડની હોસ્પિટલમાં માત્ર 558 બેડ જ શરૂ કરવામાં આવ્યા છે અને 342 બેડનો કોઈ અતોપતો નથી. સતત પાંચ દિવસથી આ હોસ્પિટલની બહાર માત્ર 558 બેડની સ્થિતિ દર્શાવવામાં આવી છે હાલમાં કોઈ પણ બેડ ખાલી નથી તેવું દર્શાવવામાં આવી રહ્યું છે જેના કારણે સવાલ ઊભો થાય કે જૉ 558 બેડમાં જ હોસ્પિટલ ફૂલ થઈ ગઈ હોય તો 900 બેડની હોસ્પિટલ છે તેવી જાહેરાત કેમ કરવામાં આવી? બાકીના 342 બેડની વ્યવસ્થા કોણ કરશે? દર્દીઓ અમદાવાદમાં સારવાર માટે વલખાં મારી રહ્યા છે તથા દર્દીઓના પરિજનો બેડ માટે દોડધામ કરતાં નજરે પડે છે ત્યારે તંત્ર કઈ વસ્તુના ઢાંકપિછોડા કરી રહ્યું છે? 

અમદાવાદ સિવિલ હોસ્પિટલમાં માત્ર બે ICU બેડ જ ખાલી

બીજી તરફ અમદાવાદની સિવિલ હોસ્પિટલ પરથી ભારણ ઓછું જ નથી થઈ રહ્યું. સમાચાર લખાઈ રહ્યા છે તે સમયે શહેરમાં સતત વધતાં કેસની વચ્ચે સિવિલ માત્ર 2 જ ICU બેડ ખાલી છે જ્યારે ખાલી ઑક્સીજન બેડની સંખ્યા 11 છે. સિવિલમાં 1510 ઑક્સીજન બેડ ફૂલ થઈ ગયા છે જ્યારે નોન ઓક્સિજનમાં 404 બેડમાંથી 91 બેડ ખાલી હોવાનું દર્શાવવામાં આવ્યું છે.