પર્દાફાશ / અમદાવાદ ક્રાઈમ બ્રાન્ચે હાથીદાંત વેંચવાનું રેકેટ ઝડપ્યું, આટલા લાખમાં વેચવાનો હતો પ્લાન, 4ની ધરપકડ

• અમદાવાદમાંથી હાથીદાંત વેચવાનું રેકેટ ઝડપાયું 
• અમદાવાદ ક્રાઇમ બ્રાન્ચે રેકેટનો કર્યો પર્દાફાશ 
• પ્રકાશ જૈન , દાઉદ ખોખર રાબિયા ખોખરની ધરપકડ

અમદાવાદ ક્રાઈમ બ્રાંચે હાથીદાંત વેચવાના કૌભાંડનો પર્દાફાશ કર્યો છે. ક્રાઈમ બ્રાંચની ટીમે હાથીના દાંત સાથે આરોપી પ્રકાશ જૈન, દાઉદ ખોખર, રાબિયા ખોખર અને અનીશ ખોખર નામના ચાર શખ્સોને દબોચી લીધા છે. જેની પૂછપરછમા સામે આવ્યું કે આરોપી પ્રકાશ જૈન વેરાવળના પિતા-પુત્ર પાસેથી હાથીના દાંતની ખરીદી કરતો હતો અને આ હાથીદાંત અબ્દુલ કરીમ નામના શખ્સ પાસેથી ખરીદીને લાવ્યો હતો. અને તેને 35 લાખ રૂપિયામાં વેચવાનો હતો. જેની પૂછપરછમા આ પ્રકરણમાં સંડોવાયેલા આરોપીઓનું તમિલનાડુના ચંદનચોર વિરપ્પનની પત્ની સાથે કનેક્શન હોવાનું સામે આવતા ચકચાર મચી જવા પામી છે. 

 PSI વી. આર. ગોહિલની ટીમ દ્વારા ડમી ગ્રાહક મોકલી પર્દાફાશ
પોલીસની પ્રાથમિક તપાસમાં સામે આવ્યું કે આરોપી અમદાવાદમાં સિંધુભવન રોડ પર રહે છે  અને કાપડના વ્યવસાય સાથે સંકળાયેલ છે. આ કાપડના ધંધાની આડમાં હાથીદાંતની ચોરી કરતો હતો. જેના નામે આ ગેરકાયદે ધંધા સાથે સંકળાયેલ લોકોનો સંપર્ક કરતો હતો. ક્રાઇમ બ્રાન્ચના PSI વી. આર. ગોહિલની ટીમ દ્વારા ડમી ગ્રાહક મોકલી સમગ્ર કૌભાંડનો પર્દાફાશ કર્યો છે.

35 લાખની કિંમતનો દાંત રિકવર

પોલીસે 35 લાખની કિંમતનો દાંત પણ રિકવર કર્યો છે. હાલ આરોપીના તમિલનાડુના ચંદનચોર વિરપ્પન સાથેના સબંધ મામલે તપાસ ચાલી રહી છે. અમદાવાદ ક્રાઈમ બ્રાન્ચને કાને વાત પડી હતી કે આરોપી પ્રકાશ જૈન એન્ટિક ચીજવસ્તુઓનું વેચાણ કરી રહ્યો છે. જેની પાસે હાથીદાંત છે અને આ દાંત વહેચવાની તે પેરવી કરી રહ્યો છે. ત્યારે ક્રાઈમ બ્રાન્ચે દોડી જઇ આ આરોપી સહિત અન્ય ત્રણને પકડી પાડયા હતા. જેની સામેં ગુન્હો નોંધી કાર્યવાહી આગળ ધપાવી છે.