વિરોધ / VIDEO: ગોપાલ ઈટાલિયાએ ઉપાડ્યો પાવડો, સુરતમાં ખાડા પૂરવાના કામમાં લાગ્યા AAP કાર્યકરો

• સુરતમાં  રોડ રસ્તાની બદ્ત્તર સ્થિતિ
• આમ આદમી પાર્ટી ઉતરી રસ્તા પર
• કાર્યકરોએ ખાડા પુરીને નોંધાવ્યો વિરોધ 

રાજ્યમાં વરસાદી માહોલ છે. ઠેર ઠેર પાણી ભરાવાના તેમજ હાલાકીના દ્રશ્યો સર્જાયા છે. ક્યાંક મસમોટા ભૂવા પડી ગયા છે તો ક્યાંક રસ્તો ખાડામય બન્યો છે. પરિણામે વાહનચાલકોએ ભારે હાલાકી વેઠવાનો વારો આવ્યો છે. તો બીજી તરફ રાજકીય પાર્ટીઓ દ્વારા પ્રચાર-પ્રસારનો એક પણ મોકો છોડવા માગતા ન હોય તેમ સુરતમાં આમ આદમી પાર્ટીએ વિરોધ નોંધાવ્યો. સુરતમાં આપ દ્વારા ખાડા પુરવાના નામે વિરોધ પ્રદર્શન કરવામાં આવ્યું. 

આપ દ્વારા ખાડા પુરીને નોંધાવ્યો વિરોધ

વરસાદ આવે એટલે ભલેને કોરોડો રૂપિયા જ કેમ ન ખર્ચ્યા હોય, રોડ રસ્તાનો મેકઅપ તો ધોવાઇ જ જાય. ધોધમાર વરસાદને કારણે ઠેર ઠેર પાણી ભરાયા, અનેક રોડ બિસ્માર બન્યા. ત્યારે સુરતમાં પણ આવી જ સ્થિતિ જોવા મળતા આમ આદમી પાર્ટી મેદાને ઉતરી. આપ દ્વારા ખાડા પૂરવાનો કાર્યક્રમ કરવામાં આવ્યો. જેમાં આપના કાર્યકરો પાવડો લઇને રસ્તા પર કામગીરી કરતા જોવા મળ્યા. અઠવાગેટથી ચોકબજાર સુધી રોડ પર પડેલા ખાડા પૂરવાનો કાર્યક્રમ યોજીને તંત્ર સામે વિરોધ કરવામાં આવ્યો હતો. 

ભ્રષ્ટાચારના ખાડા પડ્યા- ગોપાલ ઇટાલિયા

આ કાર્યક્રમમાં ગોપાલ ઇટાલિયા પણ જોડાયા હતા.તેઓએ પણ ખાડા પુરીને વિરોધ નોંધાવ્યો. તેઓ દ્વારા ભ્રષ્ટાચારના ખાડા પડ્યા હોવાનો આક્ષેપ કરવામાં આવ્યો.મહત્વનું છે કે ગુજરાત વિધાનસભાની ચૂંટણી નજીક આવતા આમ આદમી પાર્ટી સક્રીય ભૂમિકામાં જોવા મળી રહી છે. કોઇ પણ મોકો આપ છોડવા માંગતુ હોય તેમ લાગતુ નથી. કેવી રીતે આમ આદમી પાર્ટીની કામગીરીથી મતદારોને આકર્ષિત કરવા તે માટેના સતત પ્રયાસો જોવા મળી રહ્યા છે.