દુઃખદ બનાવ / યમદૂત બનેલા ટ્રકે લગ્ન પહેલા જ યુવકનો જીવ લીધો, કંકોત્રી આપવા જ નીકળ્યો હતો અને મળ્યું મોત

• સુરતના ગોડાદરા વિસ્તારની ઘટના 
• પોતાના લગ્નની કંકોત્રી વેચવા નીકળેલા યુવકનું મોત
• ગોડાદરા બ્રિજ પાસે સિમેન્ટ ભરેલી ટ્રકે મારી હતી ટક્કર 

સુરત શહેરમાં એક અત્યંત દુઃખદ પ્રસંગ બન્યો છે. શહેરના ગોડાદરા બ્રિજ પાસે સર્જાયેલા ગોઝારા અકસ્માતમાં પોતાના લગ્નની કંકોત્રી વહેચવા નીકળેલા યુવકનું મોત નીપજ્યું છે. 26 વર્ષીય યુવકને કાળમુખો ટ્રક ભરખી જતાં ખુશીનો પ્રસંગ માતમમાં ફેરવાઈ ગયો છે. લગ્ન ત્રણ દિવસ પહેલાં યુવકનું મોત થતા પરિવારમાં શોકનો માહોલ છવાયો છે. 

ટ્રકે અડફેટે લેતા યુવકનું મોત
મળતી માહિતી અનુસાર, સુરતની ગોડાદરા લક્ષ્મીપાર્ક સોસાયટીમાં રહેતા જીતેન્દ્રદાન ચારણના 22મી ફેબ્રુઆરીએ લગ્ન હોવાતી તેઓ શુક્રવારે સંબંધીઓને લગ્નની કંકોત્રી આપવા માટે નીકળ્યા હતા. આ દરમિયાન ગોડાદરા ફ્લાય ઓવરબ્રિજ પાસે સિમેન્ટ ભરેલા ટ્રકે યુવકને ટક્કર મારી હતી. જે બાદ તેઓને સારવાર માટે તાત્કાલિક સ્મીમેર હોસ્પિટલ ખાતે ખસેડવામાં આવ્યા હતા. જ્યાં ટૂંકી સારવાર બાદ  જીતેન્દ્રદાન ચારણ મોત નિપજ્યું હતું. આ સમગ્ર ઘટના સીસીટીવી કેમેરામાં કેદ થઈ હતી. 

જાનની જગ્યાએ ઘરેથી અંતિમયાત્રા નીકળી
લગ્ન પ્રસંગમાં યુવકના નિધનથી પરિવાર શોકમાં ગરક થઈ ગયો છે. જ્યાં ત્રણ દિવસ બાદ લગ્નના મંગલ ગીતો ગવાતા હતા ત્યા હવે મરશીયા ગાવાનો સમય આવી ગયો છે. વરરાજાની જાન જવાને બદલે વરરાજાની અર્થી ઉઠી છે. વરરાજા  જીતેન્દ્રદાન ચારણનું ટ્રેકની અડફેટે મોત થતાં પરિવારજનોમાં શોકની લાગણી પ્રસરી ગઈ  છે. હાલ આ મામલે પુણા પોલીસે અજાણ્યા ટ્રક ચાલક સામે ગુનો નોંધી વધુ તપાસ હાથ ધરી છે.

ઓલપાડના સાયણ ઓવરબ્રિજ પર સર્જાયો હતો અકસ્માત
અત્રે ઉલ્લેખનીય છે કે, બે દિવસ અગાઉ ઓલપાડના સાયણ ઓવરબ્રિજ પર અકસ્માતમાં યુવકનું મોત નિપજ્યું હતું. ટ્રક ચાલકે બાઈકને અડફેટે લેતા બાઈક ચાલક કિશોર રાઠોડ નામના યુવકનું ઘટના સ્થળે જ મોત નિપજ્યું હતું. જોકે, અકસ્માત બાદ ટ્રક મૂકી ચાલક ફરાર થઈ ગયો હતો. અકસ્માત બાદ ઓલપાડ પોલીસ ઘટના સ્થળે પહોંચી હતી અને તપાસ શરુ કરી હતી.