અરેરાટી / ઈર્ષાળુઓથી સારુ ન પચ્યું ! જાનમાં PM મોદી-યોગીના વખાણ કર્યાં તેમાં બોલેરો ચઢાવીને યુવકને મારી નખાયો

• ઉત્તર પ્રદેશના મિર્ઝાપુરની  ચોંકવનારી ઘટના
• નરેન્દ્ર મોદી અને મુખ્યમંત્રી યોગી આદિત્યનાથના વખાણ કરનારને મોત
• અજાણ્યા શખ્સે બોલેરો કાર નીચે કચડીને મોતને ઘાટ ઉતારી દીધા

ઉત્તર પ્રદેશના મિર્ઝાપુરમાં વડાપ્રધાન નરેન્દ્ર મોદી અને મુખ્યમંત્રી યોગી આદિત્યનાથના વખાણ કરનારા એક વ્યક્તિને એટલું મોંઘું પડ્યું કે જીવ ગુમાવવો પડ્યો છે. યોગી અને મોદીના વખાણ કરનારા વ્યક્તિને અજાણ્યા શખ્સે બોલેરો કાર નીચે કચડીને મોતને ઘાટ ઉતારી નાખ્યો છે. આ વ્યક્તિને કાર નીચે કચડ્યા બાદ આરોપી અન્ય યુવકની બાઇક પર બેસીને ફરાર થઇ ગયો હતો. સમગ્ર ઘટનાની જાણ જ્યારે મૃતકના પરિવારજનોને થઇ ત્યારે તેઓ મૃતકની લાશ લઇને મિર્ઝાપુર-પ્રયાગરાજ હાઇવે પર પહોંચ્યા અને રસ્તો રોકીને આરોપીઓની તાત્કાલિક ધરપકડ થાય તેવી માગ કરવા લાગ્યા. જો કે પોલીસની ટીમે તમામ લોકોને સમજાવીને મામલો થાળે પાડ્યો હતો. 

પોલીસે મામલો થાળે પાડ્યો
પ્રાપ્ત વિગત પ્રમાણે વિંદ્યાચલ પોલીસ સ્ટેશન વિસ્તારના કોલાહી ગામમાં રહેતા 52 વર્ષિય રાજેશ દુબે રવિવારની રાતે પોતાના ભત્રીજાના લગ્નમાં હાજરી આપવા માટે આસપાસના અન્ય ગામના લોકો સાથે બોલેરોમાં મિર્ઝાપુર ગયા હતા. સોમવારની સવારે છ વાગ્યે અન્ય લોકોની સાથે રાજેશ પોતાના ગામ પહોંચ્યો ત્યારે આ સમગ્ર ઘટના ઘટી હતી. મૃતકના મોટાભાઇએ જણાવ્યું કે લગ્નમાંથી સોમવારની સવારે પરત ફરતી વખતે બોલેરોમાં બેઠેલા મહોખર ગામના પૂર્વ પ્રધાન ધીરેન્દ્ર પાંડેયની સાથે રાજનીતિ પર વાતચીત થઇ હતી. આ વાતચીત દરમિયાન રાજેશની બોલેરોના ડ્રાઇવર વિજયપુરના રહેવાસી અમજદ સાથે વિવાદ થયો હતો. આ દરમિયાન તેમની સાથે બેઠેલા ધીરેન્દ્ર પાંચએ વચ્ચે પડીને મામલો શાંત પાડ્યો હતો. ત્યારબાદ ધીરેન્દ્ર પાંડે પોતાના ગામે ઉતરી ગયો પરંતુ થોડી દૂર ગયા બાદ અમજદે રાજેશને તેના ઘરે ન ઉતાર્યો અને થોડી દૂર રસ્તા પર ઉતાર્યો હતો. જ્યારે રાજેશ નીચે ઉતર્યો કે પાછળથી બોલેરો ચાલક અમજદે તેના પર કારની ઠોકરે ચડાવ્યો અને તેની હત્યા નીપજાવી દીધી. 

મોટાભાઇની ફરિયાદના આધારે હત્યાનો મામલો દાખલ કરાયો

સમગ્ર મામલે સિટી એસપી શ્રીકાંત પ્રજાપતિએ જણાવ્યું કે બોલેરો ચાલક અમજદ અને રાજેશ દુબે વચ્ચે કોઇ વાત પર વિવાદ થઇ ગયો હતો. ત્યારબાદ અમજદે જ બોલેરો કારથી કચડીને હત્યા કરી હતી. મૃતક રાજેશના મોટાભાઇની ફરિયાદના આધારે હત્યાનો મામલો દાખલ કરવામાં આવ્યો છે અને આરોપીની શોધખોળ હાથ ધરવામાં આવી છે. જાણકારી પ્રમાણે લગ્ન સમારંભમાંથી પરત ફરતી વખતે મોદી-યોગીની સરકાર અને તેમના કામને લઇને ચર્ચા થઇ રહી હતી. આ ચર્ચાને કારણે આરોપી અમજદ ઉશ્કેરાઇ ગયો હતો. પહેલા તો બંને વચ્ચે ગાળા-ગાળી થઇ હતી. જો કે કારમાં સવાર અન્ય લોકો વચ્ચે પડતાં મામલો શાંત પડ્યો હતો. પરંતુ બંને એકલા પડતાં બોલેરો ચાલકે મૃતક પર કાર નીચે કચડી હત્યા નીપજાવી દીધી હતી.