વિશ્વભરમાં ક્રૂડ ઓઇલના ભાવો ગગડ્યા હોવાના સમાચારથી સૌ વાકેફ છે. USAના WTI ક્રૂડ ઓઇલના ભાવો માઇનસમાં જતા રહેવાથી લોકો આશ્ચર્યમાં મુકાયા હતા. આ માટેનું ચોંકાવનારું કારણ સામે આવ્યું છે. અત્યારે વિશ્વની સૌથી મોટી ક્રૂડ ઓઇલનો સ્ટોરેજ કરતી કંપનીએ હાથ ઊંચા કરી દેતા કહ્યું છે કે તેમની કંપની પાસે હવે વધારે ક્રૂડ ઓઇલ સંગ્રહ કરવાની કોઈ જગ્યા બચી નથી.
ક્રૂડ તેલથી છલોછલ ભરેલા જહાજો અને ટ્રકો આમતેમ ભટકી રહ્યા છે
નોંધનીય છે કે કોરોના વાયરસના પગલે દુનિયાભરના અર્થતંત્રને ઝાપટ વાગી છે. થંભી ગયેલા વાહન વ્યવહાર, ફલાઈટ્સ, ઉદ્યોગો, પરિવહન, પ્રવાસન વગેરેના પગલે અત્યારે દુનિયામાં ક્રૂડ તેલની માંગમાં ધરખમ ઘટાડો થયો છે. આ માંગના ઘટાડા જેટલી ઝડપથી ક્રૂડ ઓઇલનું પ્રોડક્શન ઘટી શક્યું નથી. પરિણામે અતિશય મોટા પ્રમાણમાં ક્રૂડ ઓઇલ આવી ગયું છે જેનો કોઈ ખરીદાર નથી. આ તેલને હવે ક્યાં સંગ્રહ કરવું એ એક મોટો પ્રશ્ન છે.
સમગ્ર વિશ્વમાં આટલા પ્રમાણમાં આવી ગયેલું વધારાનું ક્રૂડ ઓઇલ ક્યાં સાચવવું?
વિશ્વની સૌથી મોટી ક્રૂડ ઓઇલનો સ્ટોરેજ કરતી કંપની રોયલ વૉપેક NVના ચીફ ફાઇનાશ્યલ ઓફિસર જેરાર્ડ પોલીડ્ઝે કહ્યું છે કે ફક્ત આ જ કંપનીમાં નહીં સમગ્ર વિશ્વમાં આટલા પ્રમાણમાં આવી ગયેલું વધારાનું ક્રૂડ ઓઇલ ક્યાં સાચવવું એ એક યક્ષ પ્રશ્ન બની ગયો છે. આ જ કારણે અત્યારે ટ્રેડર્સ ઓઇલ વેચવાને બદલે જો કોઈ તેને રાખવા તૈયાર હોય તો તેને સામે ચાલીને નાણાં આપવા તૈયાર થઇ ગયા છે.
ક્રૂડ તેલથી છલોછલ ભરેલા વાહનોને ઑફ લોડ કરવા માટે કોઈ જગ્યા નથી મળી રહી
ક્રૂડ ઓઇલના સ્ટોરેજ માટે હવાતિયાં મારતી કંપનીઓના ક્રૂડ તેલથી છલોછલ ભરેલા જહાજો અને ટ્રકો આમતેમ ભટકી રહ્યા છે કારણ કે તેને ઑફ લોડ કરવા માટે કોઈ જગ્યા નથી મળી રહી. નોંધનીય છે કે ટ્રેડર્સ નફો રળવા માટે પહેલેથી ક્રૂડ તેલ ખરીદીને સ્ટોરેજમાં રાખી મૂકે છે અને જયારે ભવિષ્યમાં તેના ભાવ વધે ત્યારે તેને વેચી દે છે. આ પ્રક્રિયાને કોનટેન્ગો કહે છે. જો કે અત્યારની સ્થિતિમાં આ ટ્રેડર્સની દશા બેઠી છે.