અમદાવાદમાં દારૂના વેચાણ માટે કુખ્યાત છારાનગરમાં હવે ડ્રગ્સ પણ મળતું હોવાનો કિસ્સો પ્રકાસમાં આવ્યો છે.
અમદાવાદના છારાનગરમાં હવે ડ્રગ્સ પણ મળતું હોવાનો ખુલાસો
SOG ક્રાઇમે ડ્રગ્સના જથ્થા સાથે એક મહિલાની કરી ધરપકડ
ઘરનું ગુજરાન ચલાવવા અફસાનાએ શરૂ કર્યુ હતું ડ્રગ્સનું વેચાણ
અમદાવાદના છારાનગરમાં હવે ઘરેથી દારૂ જ નહીં પણ ડ્રગ્સ પણ મળતું હોવાનો SOGએ પર્દાફાશ કર્યો છે. જેને લઇને ચકચાર મચી જવા પામી છે. SOG ક્રાઇમે ડ્રગ્સના જથ્થા સાથે એક મહિલાની ધરપકડ કરી વધુ તપાસ હાથ ધરી છે. આ મહિલા છૂટાછેડા બાદ દીકરા સાથે ગુજરાન ચલાવવા ઘરમાં ડ્રગ્સનું વેચાણ કરતી હોવાનું સામે આવ્યું હતું.
પોલીસે ડ્રગ્સનો જથ્થો કબજે કરી કાર્યવાહી હાથ ધરી
ગુજરાતમાં ડ્રગ્સની ડીલેવરી નહીં પણ હવે ઘરે પણ વેચાણ થતું હોવાની વિગતો સામે આવી રહી છે. અમદાવાદના સરદાર નગરમાં એક મહિલા ઘરમાં જ ડ્રગ્સના ડોઝ બનાવીને વેચતી હતી જે અંગે એસઓજીની બાતમીના આધારે આ મહિલાને ઝડપી પાડવામાં આવી છે. અફસાના બાનુ અબ્દુલ મુનાફ શેખ નામની મહીલા ઘરમાં ડ્રગ્સનું રેકેટ ચલાવતી હોવાનું ખૂલ્યું છે. જેને લઇને પોલીસે ડ્રગ્સનો જથ્થો કબજે કરી કાર્યવાહી હાથ ધરી છે. બીજી તરફ આ મહિલા પતિથી અલગ થઈ ગયા બાદ બાળકનું ગુજરાન કરવા માટે ડ્રગ્સ વેચતી હોય તેવું જાણવામાં આવતા પોલીસ પણ ચોકી ઉઠી હતી. હવે આ મહિલા કઈ રીતે ડ્રગ્સ ડીલિંગ કરતી હતી અને એના કસ્ટમર કોણ હતા તે શોધવા માટે એસ ઓજીએ તપાસ હાથ ધરી છે.
મહિલાએ દીકરાનું ગુજરાન ચલાવવા ડ્રગ્સનો ધધો શરૂ
મહત્વનું છે કે કોઈ મોજ શોખ માટે તો કોઈ પોતાના ખર્ચ માટે ગેરકાયદેસરની પ્રવૃત્તિ કરે છે. પરંતુ આ મહિલાએ પોતાનું અને દીકરાનું ગુજરાન ચલાવવા ડ્રગ્સનો ધધો શરૂ કર્યો હતો. આરોપી મહિલા પાસેથી રૂ 1.46 લાખનું ડ્રગ્સ મળી આવ્યું છે જેની તપાસ એસઓજી દ્વારા હાથ ધરવામાં આવી છે. અફસાનાના થોડા સમય પહેલા છૂટાછેડા થઈ ગયા હતા તેના સાત વર્ષનું એક બાળક પણ છે જેના ખર્ચ અને ઉછેર માટે તેને રૂપિયાની જરૂર હતી. ત્યારબાદ કોઈ કામ મળતું ન હતું એટલે તેણે ડ્રગ્સનો નાનો નાનો જથ્થો ભેગો કરીને તેના ડોઝ બનાવતી હતી જે ડોઝ લેવા માટે ડ્રગના કસ્ટમરો તેના ઘરે આવતા હતા. આ સમગ્ર રેકેટ ઘણા સમયથી ચાલતું હતું. હવે અફસાના આ ડ્રગસના કારણે રૂપિયા કમાવવા લાગી હતી અને નવા કસ્ટમર પણ આવતા હતા. આ બાતમી એસઓજીને મળી અને તેણે ડ્રગ્સ સાથે અફસાના ને ઝડપી લીધી છે.
SOG ક્રાઇમે મહિલા આરોપીની ધરપકડ કરી
મહત્વનું છે કે અફસાના જે વ્યક્તિઓને ડ્રગ્સ વેચતી હતી તે અલગ અલગ લિંકથી તેની પાસે આવ્યા હતા અને બજારમાં મળતા ડ્રગ્સ કરતા થોડાક રૂપિયા ઓછા કરીને ડ્રગ્સ વેચતા તેના કસ્ટમર વધ્યા હતા. તે એક હજારમાં ડ્રગ્સ નો ડોઝ વેચતી હતી. હાલમાં SOG ક્રાઇમે મહિલા આરોપીની ધરપકડ કરીને તેના નેટવર્ક જોડાયેલા ગ્રાહકો અને ડ્રગ્સ પેડલરની શોધખોળ શરૂ કરી છે.