મકરસંક્રાતિ / શું આ વર્ષે પતંગરસિયાઓની મજા બગાડશે મોંઘવારી? જાણો પતંગ-દોરીની કિંમતમાં કેટલો ભાવવધારો

• ભાવનગરમાં પતંગ અને દોરીની કિંમતમાં 25થી 30 ટકાનો ભાવ વધારો 
• પતંગરસિયાઓએ ગત વર્ષ કરતાં આ વખતે પતંગ-દોરી માટે 25 ટકા વધુ કિંમત ચૂકવવી પડશે 
• કાચા માલની મર્યાદિત આવકને પગલે પતંગ-દોરીની કિંમત આસમાને પહોંચી 

ઉત્તરાયણના તહેવારને ગણતરીના દિવસો બાકી રહ્યા છે. તેવામાં હવે ભાવનગરમાં પતંગ અને દોરીની કિંમતમાં 25થી 30 ટકાનો ભાવ વધારો જોવા મળી રહ્યો છે. ઉત્તરાયણનું પર્વ ગુજરાતીઓ માટે મહાપર્વ છે, પતંગરસિયાઓએ ગત વર્ષની ઉત્તરાયણ કરતાં આ વખતે પતંગ-દોરી માટે 25 ટકા વધુ કિંમત ચૂકવવી પડશે. કાચા માલની મર્યાદિત આવક તેમજ પતંગ બનાવવાની સામગ્રીની કિંમતમાં થયેલા વધારાને પગલે પતંગ-દોરીની કિંમત આસમાને ગઇ છે.

મકરસંક્રાંતિનું પર્વ નજીક છે તેમ છતાં બજારમાં ઘરકી જોવા મળતી નથી તેનું કારણ ભાવ વધારો છે. ગત વર્ષે 5 પતંગની કિંમત રૂપિયા 15થી રૂપિયા 20 હતી. જેના માટે આ વર્ષે હવે રૂપિયા 20થી 25 ચૂકવવા પડે તેવી સ્થિત પતંગ રસિકોની થઇ છે. આજે એક પતંગની કિંમતમાં  5-10 રૂપિયાનો વધારો થયો છે, આમ પતંગ રૂ.6 થી લઈ 150 સુધી બજારમાં પતંગના પંજા ઉપલબ્ધ છે. 

ફિરકીના ભાવમાં પણ થયો વધારો 
આ તરફ 1000 વારની ફિરકીની કિંમત ગત વર્ષે રૂપિયા 100 હતી. તેના માટે આ વર્ષે રૂપિયા 150-200 જેટલા વધુ ચૂકવવા પડશે. પતંગની ખરીદી અને દોરી ઘસાવવા માટે આવનારાનું પ્રમાણ પણ હજુ સાધારણ જોવા મળી રહ્યું છે. આગામી બે અઠવાડિયા બાકી છે ત્યારે ઘરાકી જોવા મળશે.

પતંગ દોરીના ભાવમાં 25થી 30 ટકાનો વધારો
મહત્વનું છે કે, આ વર્ષે પતંગ દોરીના ભાવમાં 25થી 30 ટકાનો વધારો જોવા મળી રહ્યો છે. જેમાં 1000 વાર દોરીના 100થી લઈ 300 સુધી, 2000 વાર દોરીના 200થી 700 અને 5,000 વાર દોરીના 500થી હજાર સુધીનો ભાવ વધારો જોવા મળી રહ્યો છે. 

પતંગોમાં પણ અલગ-અલગ વેરાઇટી 
આ વર્ષે પતંગોમાં પણ અલગ-અલગ વેરાયટીઓ જોવા મળી રહી છે. જેમાં બાળકો માટે કાર્ટુન વાળી પતંગો, 2023 વેલકમ, આઈ લવ ઈન્ડિયા જેવી અનેક વેરાયટીઓ ઉપલબ્ધ છે. 

વેપારીઓ શું કહે છે ? 
ઉત્તરાયણ પર્વને લઈ આગામી એકાદ સપ્તાહમાં તેમાં વધારો થશે તેવો વેપારીઓને આશાવાદ છે. ભાવ વધારા છતાં આ વખતે પતંગ-દોરીનું વેચાણ ગત વર્ષ કરતાં વધશે તેમ પતંગબજારના વેપારીઓનું માનવું છે. પતંગના વેચાણ સાથે સંકળાયેલા વેપારીઓનું માનવું છે કે, કમાન, વાંસ, કાગળ સહિતના કાચા માલ તેમજ મજૂરીની કિંમતમાં વધારો થતાં પતંગની કિંમત આ વખતે 20-30 ટકા સુધી વધી ગઇ છે. આ ઉપરાંત  આ વખતે કદાચ ઉત્તરાયણમાં પતંગનું વેચાણ સારું એવું થશે તેવી ધારણાઓ પણ વેપારીઓ કરી રહ્યા છે.