ક્રાઈમ બ્રાંચ અને એસઓજીએ દાણીલીમડા અને અસારવામાં ઓપરેશન પાર પાડી ત્રણ લોકોને ઝડપી પાડ્યા તેમજ આઠ હથિયાર, 24 કારતૂસ જપ્ત કર્યા
રથયાત્રા પૂર્વે અમદાવાદ જાણે યુપી-બિહાર બન્યું
શહેરમાંથી આઠ હથિયાર, 24 કારતૂસ મળ્યા
પોલીસે ઓપરેશન પાર પાડી ત્રણ લોકોને ઝડપી પાડ્યા
અમદાવાદમાં રથયાત્રા પૂર્વે અમદાવાદ જાણે યુપી-બિહાર બની ગયું હોય તેવું લાગી રહ્યું છે, કારણ કે ક્રાઇમ બ્રાંચ અને એસઓજી સતત હથિયારના જથ્થા સાથે ખતરનાક આરોપીને ઝડપી રહી છે. જે રીતે આરોપી હથિયાર સાથે ઝડપાય છે તે જોતાં એવું કહી શકાય કે હવે ડ્રગ્સ બાદ હથિયારની તસ્કરી માટેનું અમદાવાદ હબ બની રહ્યું છે. સતત ઘણા દિવસથી ક્રાઇમ બ્રાંચ અને એસઓજી પિસ્તોલ, દેશી તમંચા સાથે ખતરનાક આરોપીને ઝડપી રહી છે ત્યારે ગઇ કાલે પણ અસારવા અને દાણીલીમડાથી આઠ હથિયાર અને 24 જીવતા કારતૂસ સાથે ત્રણ શખ્સ ઝડપાયા છે.
બે પિસ્તોલ, પાંચ તમંચા અને 15 જીવતા કારતૂસ મળી આવ્યાં
ક્રાઇમ બ્રાંચની ટીમને બાતમી મળી હતી કે દાણીલીમડા વિસ્તારમાં આવેલા અલ મદિના ફ્લેટમાં રહેતા સાદાબઆલમ શેખ અને જુહાપુરાના ફતેહવાડી વિસ્તારમાં આવેલા શકિના ડુપ્લેક્સમાં રહેતા રબનવાઝખાન પઠાણ પાસે પિસ્તોલ અને તમંચાનો જથ્થો છે. જે હાલ અમદાવાદ તેમજ સૌરાષ્ટ્રમાં વેચવા માટે ફરી રહ્યા છે. ક્રાઇમ બ્રાંચે બંનેનું લોકેશન કઢાવ્યું તો તે દાણીલીમડા વિસ્તારમાં આવેલી કોઝી હોટલ પાસે હતા. ક્રાઇમ બ્રાંચની ટીમ તરત જ દાણીલીમડા પહોંચી ગઇ હતી અને સાદાબઆલમ અને રબનવાઝખાનને કોર્ડન કરીને તેમની અંગ જડતી કરી હતી. બંને પાસેથી ક્રાઇમ બ્રાંચને બે પિસ્તોલ, પાંચ તમંચા અને 15 જીવતા કારતૂસ મળી આવ્યાં હતાં. બંનેને ક્રાઇમ બ્રાંચ ધરપકડ કરીને વડી કચેરીએ લાવી હતી જ્યાં તેમની આગવી સ્ટાઇલથી પૂછપરછ કરી હતી. બંનેની પૂછપરછમાં તેમણે કબૂલાત કરી હતી કે તે બે મહિના પહેલાં કાનપુરથી હથિયારનો જથ્થો લાવ્યા હતા અને અમદાવાદ તેમજ સૌરાષ્ટ્રમાં વેચવાની ફિરાકમાં હતા. ક્રાઇમ બ્રાંચનાં સૂત્રોનાં જણાવ્યા અનુસાર બંને આરોપીએ કેટલાં હથિયારો વેચ્યાં છે જેની તમામ વિગતો પૂછપરછમાં સામે આવશે.
એસઓજીએ શૈલેશની ધરપકડ કરીને ક્રાઇમ બ્રાંચમાં ફરિયાદ કરી
આ સિવાય સ્પેશિયલ ઓપરેશન ગ્રૂપની ટીમે અસારવા વિસ્તારમાંથી પિસ્તોલ અને પાંચ જીવતા કારતૂસ સાથે એક શખ્સની ધરપકડ કરી લીધી છે. એસઓજીની ટીમને બાતમી મળી હતી કે અસારવા પ્રભુનગર સોસાયટી પાસે શૈલેશ ઉર્ફે ટોટિયો ડાભી નામનો શખ્સ ઊભો છે. જેની પાસે પિસ્તોલ અને કારતૂસ છે. બાતમીના આધારે એસઓજીની ટીમ તાત્કાલીક ઘટના સ્થળે પહોંચી ગઇ હતી અને શૈલેશને કોર્ડન કરી લીધો હતો. શૈલેશની જડતી લેતાં તેની પાસેથી પિસ્તોલ અને પાંચ જીવતા કારતૂસ મળી આવ્યાં હતાં. રોલો મારવા માટે શૈલેશ તેની સાથે પિસ્તોલ રાખતો હોવાનું પ્રાથમિક તપાસમાં સામે આવ્યું છે. એસઓજીએ શૈલેશની ધરપકડ કરીને ક્રાઇમ બ્રાંચમાં ફરિયાદ કરી છે.