VTVની ટીમ દ્વારા શહેરના પૂર્વ અને પશ્ચિમ વિસ્તારમાં આવેલા ગાર્ડનમાં રિયાલિટી ચેક કરવામાં આવ્યું, જેમાં શહેરના નરોડા વિસ્તારમાં કેનાલ પાસે આવેલા ગાર્ડનની હાલત ખૂબ ગંભીર જોવા મળી.
VTV ન્યૂઝનું અમદાવાદના પૂર્વ અને પશ્ચિમ વિસ્તારમાં રિયાલિટી ચેક
નરોડા વિસ્તારમાં કેનાલ પાસે આવેલા ગાર્ડનની હાલત ગંભીર
રાત્રી દરમિયાન ગાર્ડનમાં લોકો ચરસ, ગાંજો અને અફીણનું કરે છે વ્યસન
અમદાવાદ શહેરમાં VTVની ટીમ દ્વારા ગાર્ડનમાં રિયાલિટી ચેક કરવામાં આવ્યું હતું. VTVની ટીમે શહેરના પૂર્વ અને પશ્ચિમ વિસ્તારમાં રિયાલિટી ચેક કર્યુ હતું. જેમાં શહેરના ગાર્ડનની હાલત ખૂબ ગંભીર જોવા મળી હતી. આ સાથે રાત્રીના સમયે લોકો અહિયા ચરસ, ગાંજો અને અફીણનું વ્યસન કરતાં હોવાનું પણ સામે આવ્યું છે.
શહેરના ગાર્ડનની હાલત ખૂબ ગંભીર
અમદાવાદના નરોડા વિસ્તારમાં કેનાલ પાસે આવેલા ગાર્ડનનું VTVની ટીમે રિયાલિટી ચેક કર્યું હતું. જેમાં આ ગાર્ડનની હાલત ખૂબ ગંભીર હોવાનું સામે આવ્યું હતું. ગાર્ડનમાં વ્યવસ્થાના ભાગરૂપે જે સંચાલન થવું જોઈએ તે સંચાલન પણ નથી થતું તથા નિરીક્ષણ પણ થતું નથી તેવા અહીંના સ્થાનિકોના આક્ષેપો છે. આ ઉપરાંત બગીચામાં જે પાણી છાંટવામાં આવે છે તે એક જ જગ્યાએ છાંટવામાં આવે છે, તેવો પણ સ્થાનિકોનો આક્ષેપ છે.
અહીંયા કોઈ સિપરવિઝન કરવા આવતું નથીઃ સ્થાનિક
મહેન્દ્રભાઈ નામના સ્થાનિકે VTVની ટીમને જણાવ્યું કે, હું છેલ્લા ઘણા વર્ષોથી આ ગાર્ડનમાં આવું છું, હાલમાં પરિસ્થિતિ એવી છે કે અહીંયા કોઈ સુપરવિઝન નથી. બાથરૂમની ટાંકી કાયમ ઉભરાયેલી જ હોય છે. જેના કારણે મોટી ઉંમરના લોકોને ભારે મુશ્કેલીઓનો સામનો કરવો પડે છે. આ ઉપરાંત અહીંના શૌચાલયમાં ગંદકીના ગંજ ખડકાયા છે. અહીંયા કોઈ ચેક કરવા નથી આવતું. માત્ર 11.45 થાય ત્યારે વિસલ મારવા આવે છે કે ભાઈ સમય થઈ ગયો છે.
અનેક રજૂઆત છતાં કાર્યવાહી નહીં
અમદાવાદના અનેક ગાર્ડન પાછળ તંત્ર લાખો-કરોડોનો ખર્ચો કરે છે. પરંતુ આ ગાર્ડનો રાત્રિના સમયે અસામાજિક તત્વોનો અડ્ડો બની જાય છે. આવી જ એક હકીકત નરોડા વિસ્તારમાં કેનાલ પાસે આવેલા ગાર્ડનમાં પણ સામે આવ્યું છે. જેમાં રાત પડતાં જ અહિયા ચરસ, ગાંજો અને અફીણ નું વ્યસન કરતાં હોવાનું ખૂલ્યું છે. આસપાસના નાગરિકોએ પણ અનેક રજૂઆત કરી તેમ છતાં કોઈ કાર્યવાહી નહિ થતી હોવાનું પણ VTVના રિયાલિટી ચેકમાં સામે આવ્યું છે.