ન્યૂઝીલેન્ડ વિરુદ્ધ ટી20 સીરિઝમાં પોતાનો દબદબો બનાવી ચૂકેલી ટીમ ઈન્ડિયાના કેપ્ટન વિરાટ કોહલીએ સોશિયલ મીડિયા પર એક વીડિયો શેર કર્યો છે. આ વીડિયોમાં વિરાટ કોહલી જીમમાં ભારે પરસેવો પાડી રહ્યો છે. વીડિયોમાં વિરાટ કોહલી વર્કઆઉટ સાથે સ્ટંટ પણ કરતો જોવા મળી રહ્યો છે.
વિરાટ કોહલીનો વીડિયો મચાવી રહ્યો છે ધૂમ
જિમમાં પરસેવો પાડી રહ્યો છે કેપ્ટન વિરાટ
વિરાટના સ્ટન્ટ જોતાં જ રહી ગયા ફેન્સ
આ પોસ્ટના કેપ્શનમાં વિરાટ કોહલીએ લખ્યું છે કે, 'કામ (ફિટનેસ)માં ધ્યાન આપવું કોઈ વિકલ્પ નહીં પરંતુ વધુ સારું કરવાની જરૂરિયાત હોવી જોઈએ'. આ વીડિયોમાં વિરાટ કોહલી જમીનથી એક બોક્સની ઉપર જમ્પ કરી રહ્યો છે. વિરાટની આ પોસ્ટ પર યુઝર્સની ગજબની પ્રતિક્રિયાઓ જોવા મળી રહી છે.
આંતરરાષ્ટ્રીય ક્રિકેટમાં પદાર્પણ કર્યા બાદથી જ વિરાટ કોહલી ભારતીય બેટિંગનો મહત્વપૂર્ણ ભાગ રહ્યો છે. 2008માં ભારત માટે પહેલી આંતરરાષ્ટ્રીય મેચ રમતી વખતે કોહલી એક ગોળમટોળ ચહેરો ધરાવતો યુવાન ખેલાડી હતો, પરંતુ હવે તે વિશ્વના સૌથી ફિટ ખેલાડીઓમાંથી એક છે અને તેનું ટ્રાન્સફોર્મેશન બધાં જોઈ શકે છે.
વિરાટ કોહલી માત્ર ફિટ જ નથી, પરંતુ તે ટીમમાં ફિટનેસ કલ્ચર પણ લાવ્યો છે અને તે અન્ય ખેલાડીઓ માટે પ્રેરણારૂપ છે. તે આખી ટીમને ફિટ જોવા માંગે છે. તે એક ચેમ્પિયન એથલીટ પણ છે. તેણે થોડા વર્ષો પહેલાં શાકાહારી બનવાનું નક્કી કર્યું હતું. વિરાટ કોહલી ફિટનેસને લઈને ખૂબ જ સ્ટ્રીક્ટ છે. કોહલી આંતરરાષ્ટ્રીય ક્રિકેટમાં એક પછી એક રેકોર્ડ નોંધાવી રહ્યો છે. કોહલી બાઉન્ડ્રી કરતા વધારે રન બનાવીને રન લેવા પર ઘણો ભાર મૂકી રહ્યો છે. જેના કારણે તે વિશ્વનો નંબર 1 બેટ્સમેન છે.
ફિટનેસ માટે કોહલીએ નોનવેજ છોડી દીધું અને તે વધુને વધુ શાકભાજી ખાઈ રહ્યો છે. હવે કોહલી તેના ખોરાકમાં પ્રોટીન શેક, શાકભાજી અને સોયાનો વધુ ઉપયોગ કરે છે. જ્યારે ઈંડા, નોનવેજ અને ડેરી પ્રોડક્ટ્સ ખાવાનું છોડી દીધું છે. કોહલીનું માનવું છે કે, નોનવેજ છોડ્યા પછી તેની રમત પહેલા કરતાં સારી થઈ ગઈ. તેની પાચન શક્તિ વધુ મજબૂત બની છે. કોહલી પહેલાં વિશ્વના ઘણા ટોચના ખેલાડીઓએ નોનવેજ ફૂડ છોડી દીધું છે. જેમાં ટેનિસ સ્ટાર વિનસ વિલિયમ્સ અને તેની બહેન સેરેના વિલિયમ્સ, ફુટબોલર લિયોનલ મેસ્સી તેમજ ફોર્મ્યુલા વન ચેમ્પિયન લુઇસ હેમિલ્ટનનો પણ સમાવેશ થાય છે.
તમને જણાવી દઈએ કે, ભારતીય ક્રિકેટ ટીમ બુધવારે 29 જાન્યુઆરીએ ન્યૂઝીલેન્ડ સામે ત્રીજી ટી20 આંતરરાષ્ટ્રીય મેચ રમશે. પાંચ મેચની ટી-20 શ્રેણીની પ્રથમ મેચમાં ભારતે ન્યૂઝીલેન્ડને 6 વિકેટે પરાજિત કર્યું હતું. આ પછી, ભારતે બીજી ટી20 મેચ 7 વિકેટે જીત હાંસલ કરી હતી અને ન્યૂઝીલેન્ડ સામેની શ્રેણીમાં 2-0થી લીડ મેળવી લીધી હતી. જો ભારત ત્રીજી ટી20 આંતરરાષ્ટ્રીય મેચ પણ જીતે તો તે ન્યૂઝીલેન્ડની ધરતી પર ઇતિહાસ રચશે.