સુરેન્દ્રનગરમાં જિલ્લા પુરવઠા અધિકારીનું સિનિયર સિટીઝન્સ અને મીડિયા સાથે ગેરવર્તન.મહિલા અધિકારી સરકારની આબરૂ કરે છે ધૂળ-ધાણી
સુરેન્દ્રનગરના મહિલા પુરવઠા અધિકારીની ઉદ્ધતાઈ
સિનિયર સિટીઝન્સ અને મીડિયા સાથે તોછડું વર્તન
આ મહિલા અધિકારી સરકારની છબી કરે છે ધૂંધળી
સરકારી કચેરીઓમાં સામાન્ય રજુઆત કરવા આવતા નાગરિકો સાથે ગેરવર્તન કરી તેમને ધક્કા ખવરાવવા,અપમાનિત કરવા જેવી બાબતો હવે રોજની થઇ ગઈ હોય અને સરકારી અધિકારીઓ ગાંઠતા ના હોય તે સામાન્ય વાત થઇ ગઈ છે. મોટાભાગે સિનિયર સિટીઝન્સ ફરિયાદ કરવા આગળ નથી આવતા હોતા. ત્યારે, સુરેન્દ્રનગરના જિલ્લા પુરવઠા મહિલા અધિકારીએ સિનિયર સીટીઝન ઉપરાંત મીડિયા સામે પણ ગેરવર્તણૂક કરતા તેના પડઘા ગાંધીનગર સુધી પડ્યા છે.
કોના આશિર્વાદ આ મહિલા અધિકારી પર ?
સુરેન્દ્રનગરમાં છેલ્લા 25 કરતા વધુ દિવસોથી રેશનીંગની દુકાનોમાં અનાજનો પુરવઠો નથી. પરિણામે સ્થાનિક સિનિયર સિટીઝન્સ આ મુદ્દે જાણકારી મેળવવા અને માહિતી માગવા સાથે માર્ગદર્શન માટે જિલ્લા પુરવઠા અધિકારી પાસે પહોચ્યા હતા. પરંતુ, જિલ્લા પુરવઠા અધિકારી મહિલા હોવાથી કઈક વધુ તોરમાં હતા.આ સ્થળે સમાચાર માધ્યમના પણ કેટલાક પ્રતિનિધિ ત્યાં ઉપસ્થિત હતા. જિલ્લા પુરવઠા અધિકારી તો તાડૂક્યા અને સિનિયર સીટીઝન્સને અપમાનિત થવાનો વારો આવ્યો હતો. તો મીડિયા કર્મીઓને પણ મહિલા અધિકારીના તેવર ઉદ્ધત પ્રકારના લાગ્યા હતા. રાજ્યમાં દરેક જગ્યાએ સિનિયર સિટીઝન્સ માટે જ્યારે અલાયદી વ્યવસ્થા હોય છે, તેમના માન-સન્માનની જાળવણી થતી હોય છે ત્યારે, સુરેન્દ્રનગરના આ મહિલા અધિકારી જાણે પોતે જ સરકાર હોય તે રીતે વર્તતા જોવા મળ્યા હતા.
આવા અધિકારીથી સંભાળો સરકાર
આ પ્રકારનું વર્તન કરતા અધિકારીઓ સરકારની યોજનાઓને છેવાડાના માનવી સુધી પહોચાડવાની વાત તો દૂર,યોજનાના લાભ પણ નથી પહોચાડી શકતા. પરિણામે,સરકારની છબી ધૂંધળી થાય છે. આ મુદ્દાને સ્થાનીકોએ ગાંધીનગર સુધી રજૂઆત કરવાનો નિર્ણય કર્યો છે.