VIDEO / મારો વીડિયો એડિટ કરેલો છે : બિન સચિવલાયની પરીક્ષામાં પાસ કરાવી દેવાનો Video વાયરલ થતા ભાજપ નેતાએ કર્યો ખુલાસો

• બિન સચિવાલયની પરીક્ષામાં ગેરરીતિનો કથિત વીડિયો થયો વાયરલ
• ભાજપના નેતા વૈભવ જોષીનો કથિત વીડિયો વાયરલ થતા ખળભળાટ
• આ વીડિયો 5 વર્ષ જૂનો અને એડિટ કરેલો છેઃ વૈભવ જોષી

ગુજરાતમાં સરકારી ભરતીની પરીક્ષામાં ગેરરીતિના વારંવાર આક્ષેપો લાગતા રહે છે. અનેક વખત અધિકારીઓ અને નેતાઓ પર ધગધગતા આરોપો લાગ્યા છે. તેવામાં રદ્દ થયેલી બિન સચિવાલયની પરીક્ષામાં થયેલી ગોઠવણ અંગેનો કથિત વીડિયો વાયરલ થયો હતો. ભાવનગરના ભાજપના નેતા વૈભવ જોષીનો વીડિયો સામે આવ્યો છે. જે વીડિયોમાં સાંભળવા મળી રહ્યું છે કે, પરીક્ષામાં 50-50 હજારમાં સેટિંગ પાડી ઉમેદવારો પાસેથી 18 લાખનું કલેક્શન કર્યું હતું. જોકે આ વાયરલ વીડિયો ખોટો હોવાનું ભાજપ નેતા વૈભવ જોષીએ જણાવ્યું છે.

વીડિયો બનાવટી હોવાનો ભાજપના નેતા વૈભવ જોષીનો દાવો
વીડિયો વાયરલ થતાં ખુદ ભાજપના નેતા વૈભવ જોષીએ દાવો કર્યો હતો કે આ વીડિયો તળાજાના નિકુંજ રાઠોડ અને તેના પિતાએ વહેતો કર્યો છે. જે વીડિયો પાંચ વર્ષ જૂનો અને બનાવટી છે. વધુમાં તેમણે કહ્યું કે, આ એડિટિંગ કરેલો વીડિયો છે. નિકુંજ રાઠોડ વિરુદ્ધ 52 લાખના ચેક રિટર્નની પોતે ફરિયાદ કરી હોય જે પરત ખેંચવા માટે એડિટ કરેલી ક્લિપ વાયરલ કરી હોવાનું જણાવ્યુ હતું.

ગેરરીતિનો કથિત વીડિયો થયો વાયરલ
રદ થયેલી બિન સચિવાલયની પરીક્ષામાં ગેરરીતિ અંગેનો વીડિયો વાયરલ થયો છે. જેમાં ભાજપ નેતા વૈભવ જોષી નજરે પડી રહ્યા છે. તો વીડિયોમાં પેપર દરમિયાન ફરજ પર સંકળાયેલા શિક્ષણ અને પાલિકા તથા શાળાના સ્ટાફને રૂપિયા આપ્યા હોવાનું સાંભળવા મળી રહ્યું છે. તો પેપર સોલ્વ કરવા માટે 7 શિક્ષકો માટે અલગ વ્યવસ્થા કરી હોવાનું પણ સાંભળવામાં આવી રહ્યું છે. તો બિન સચિવાલયની પરીક્ષા રદ્દ થતા પોતે 5 લાખ દેવામાં ઉતરી ગયો હોવાની વાત પણ કરવામાં આવી રહી છે. આ કથિત વીડિયોને લઈને હાલ ખુદ ભાજપ નેતા વૈભવ જોષીએ દાવો કર્યો છે કે આ બનાવટી વીડિયો છે.