માઠા સમાચાર / વડોદરાવાસીઓને રાંધણ ગેસમાં ફરી ડામ! વડોદરા ગેસ લિમિટેડ કંપનીએ પ્રતિ યુનિટ રૂપિયા 3.45નો કર્યો ભાવ વધારો

• વડોદરા ગેસ લિમિટેડ કંપનીએ કર્યો ગેસના ભાવમાં વધારો
• વડોદરા ગેસ લિમિટેડે યુનિટ દીઠ રૂ.3.45 નો કર્યો વધારો 
• રૂ.43.70 પૈસાની જગ્યાએ હવે યુનિટ દીઠ રૂ.47.15 ચુકવવા પડશે

જીવનજરૂરી ચીજવસ્તુઓના ભડકે બળતા ભાવવધારાને પગલે મોંઘવારીએ માઝા મૂકી છે આવી સ્થિતિ વચ્ચે વડોદરા ગેસ લિમિટેડ કંપનીએ વધુ એક વખત ગેસના ભાવમાં વધારો કરતાં ગૃહિણીઓમાં દેકારો બોલી ગયો છે. ગેસ લિમિટેડ કંપની દ્વારા કરવામાં આવેલા ભાવવધારાને લીધે પાઇપ લાઈનથી ગેસ મેળવતા ગ્રાહકોને આ નિર્ણયની સિધી અસર પડશે. ગેસ લિમિટેડ કંપની દ્વારા ગેસના ભાવમાં યુનિટ દીઠ રૂ.3.45 રૂપિયાનો વધારો ઝીંકવામાં આવ્યો છે. આ નવા ભાવવધારાની અમલવારી બાદ ગ્રાહકોએ રૂ.43.70 પૈસાની જગ્યાએ હવે યુનિટ દીઠ રૂ.47.15 ચુકવવા પડે તેવી નોબત આવશે. ઉલ્લેખનિય છે કે, ધીમા ઝેરના વધુ એક ડોઝ સમાન આ ભાવ વધારાને લઈને બે માસમાં ગેસના ભાવમાં પ્રતિ યુનિટે રૂ.16.15 નો વડોદરાવાસીઓને ધગધગટો ડામ દેવામાં આવ્યો છે. 

એપ્રિલ માસમાં 7 રૂપિયાનો મસમોટો ભાવવધારો ઝીંકાયો હતો
અગાઉ પહેલી એપ્રિલે ગેસના ભાવમાં વધારો કરવામાં આવ્યો હતો. રાંધણ ગેસના ભાવમાં પ્રતિ યુનિટ રૂપિયા 7નો મસમોટો વધારો ઝીંકી દેવાતા ગૃહિણીઓના બજેટ પર તેની સીધી અસર જોવા મળી રહી હતી. એપ્રિલ માસમાં વડોદરામાં વડોદરા ગેસ લિમિટેડ દ્વારા ઘરેલું ગેસના ભાવમાં વધારો કરાયો હતો. જે-તે  સમયે 7 રૂપિયાનો વધારો થતા ઘરેલું ગેસનો ભાવ રૂ. 31થી વધીને રૂ.38 થયો હતો. 

ગત માર્ચ મહિને 5.25 રૂપિયાનો કરાયો હતો ભાવવધારો
ગત 1 માર્ચે પણ વડોદરા ગેસ લિમિટેડ કંપનીએ ઘરેલુ ગેસના ભાવમાં વધારો કર્યો હતો. પાઇપલાઇનથી લોકોના ઘરે મોકલવામાં આવતા ગેસના ભાવમાં 5.25 રૂપિયાનો વધારો કર્યો હતો. જેને લઇને ગેસનો ભાવ પ્રતિ યુનિટ 31 રૂપિયા પહોંચ્યો હતો. ત્યારે બાદ 7 રૂપિયાનો ફરી વધારો અને હવે યુનિટ દીઠ રૂ.3.45 રૂપિયાનો વધારો ઝીંકવામાં આવતા ગૃહિણીઓમાં આક્રોશનો જવાળા ભભૂકી ઉઠ્યો છે. અત્રે નોંધનિય છે કે, વડોદરામાં ઘરેલું ગેસના હાલ 2 લાખ જેટલા ગ્રાહકો છે. જેને પાઈપલાઈનની મદદથી કંપની દ્વારા ગેસ પહોચાડવામાં આવી રહ્યો છે.