વડોદરાઃ બુલેટ બાઇકની ખરીદી મામલે બે મિત્રો વચ્ચે ઝઘડો તલવારથી હુમલો કરતા એકનું મોત

વડોદરાઃ ફતેપુરા મંગલેશ્વર ઝાપા પાસે યુવકની હત્યા કરવામાં આવી છે. બે મિત્રો વચ્ચે નજીવી બાબતે ઝઘડો થતાં આવેશમાં આવી એક મિત્રએ બીજા મિત્રની તીક્ષ્ણ હથિયાર વડે હુમલો કરતા યુવકનું મોત નીપજ્યું હતું. ઘટનાની જાણ થતા સીટી પોલીસ ઘટના સ્થળે પહોચી હતી. મૃતદેહને પી.એમ. માટે હોસ્પિટલ ખસેડવામાં આવ્યો છે.

કેટલાય સમયથી બુલેટ ખરીદીને લઈને રવિ અને તેના મિત્રો સાથે નાની મોટી બોલાચાલી થતી હતી. જેનો પડઘો આજે બપોરના સમયે પડ્યો હતો. મંગલેશ્વર ઝાંપા પાસે જ આજે બપોરના સમયે રવિને તેના મિત્રોએ ઘેરી લઈને બુલેટની બાબતે ઝઘડો કર્યો હતો. જેમાં આવેશમાં આવી જઈને રવિના મિત્રએ તલવારથી રવિ પર હુમલો કર્યો હતો. જેમાં રવીને ગંભીર ઇજા પહોંચતા તેનું મોત નીપજ્યું હતું. હત્યાના સમયે મરનાર રવિ સોલંકીની બહેન ધર્મિષ્ઠા પણ બનાવ સ્થળે હાજર હતી. ઝઘડો નહિ કરવા માટે દરમિયાનગીરી પણ કરી હતી. પરંતુ જનુને ભરાયેલા રવીના મિત્રએ તલવારના ઉપરાછાપરી ઘા ઝીંકીને રવીને મોતને ઘાટ ઉતારી દીધો હતો.

ફતેપુરા વિસ્તારના મંગલેશ્વર ઝાંપા ખાતે ધોળે દહાડે થયેલ યુવકની હત્યાના બનાવની જાણ સીટી પોલીસ મથકને કરવામાં આવી હતી. બનાવના સ્થળે મોટી સંખ્યામાં પોલીસ કાફલો દોડી આવ્યો હતો. હત્યા કરાયેલ યુવક રવિ સોલંકીના મૃતદેહને પોસ્ટમોર્ટમ માટે સયાજી હોસ્પિટલમાં ખસેડયો હતો. પોલીસે બનાવ સમયે હાજર રવિની બહેન ધર્મિષ્ઠા સોલંકીની ફરિયાદના આધારે એક યુવકની શકમંદ તરીકે અટકાયત કરીને વધુ તપાસ હાથ ધરી છે.