વિવાદ / રસી લેવા ગુજરાતમાં 2 નિયમો? મફતમાં લેવી હોય તો રજિસ્ટ્રેશન કરાવવાનું, પૈસા હોય તો ચિંતા નહીં

• વેક્સિનેશન મુદ્દે આરોગ્ય અગ્ર સચિવ જયંતિ રવીની સ્પષ્ટતા 
• રસીકરણનો વ્યાપ વધારવા કેન્દ્ર સરકારે છૂટ આપી
• ખાનગી હોસ્પિટલો ઉત્પાદકો પાસેથી જથ્થો મેળવે છે

અમદાવાદમાં GMDC ખાતે એપોલો હોસ્પિટલ દ્વારા વેક્સિનેશનનો મામલે આરોગ્ય અગ્ર સચિવ જયંતિ રવિએ સ્પષ્ટતા કરી છે. અમદાવાદ મહાનગરમાં એપોલો હોસ્પિટલ દ્વારા કોરોના વેક્સિનેશન ચાર્જેબલ બેઝીઝ પર શરૂ કરવામાં આવ્યું છે. અને સરકારે ખાનગી હોસ્પિટલોને રસીકરણ આપવા મામલે મંજૂરી મુદ્દે સ્પષ્ટતા કરવી પડી રહી છે. પ્રેસનોટમાં જણાવ્યું કે, કોરોના સંક્રમણ નિયંત્રણ માટે અને રસીકરણનો વ્યાપ વધારવા ભારત સરકાર દ્વારા ખાનગી હોસ્પિટલોને પણ ચાર્જેબલ બેઝીઝ ઉપર રસીકરણની છૂટ આપી છે.

આરોગ્ય વિભાગમાં અગ્ર સચિવ જયંતિ રવિની સ્પષ્ટતા

આ મુદ્દે આરોગ્ય અગ્ર સચિવ ડૉ. જયંતિ રવિએ જણાવ્યું કે, અમદાવાદમાં એપોલો હોસ્પિટલ દ્વારા ચાર્જેબલ બેઝીઝ પર શરૂ કરાયેલું વેક્સિનેશન એવા સંપન્ન લોકો-પરિવારો જેમને આ ફી પરવડી શકે તેમ છે તેમજ જેઓ વેક્સિન તાત્કાલિક લેવા માંગે છે તેમના માટે ભારત સરકારની ગાઇડલાઇન મુજબ ઊભી કરાયેલી વધારાની વ્યવસ્થાના ભાગરૂપે છે. 

સાથે જણાવ્યું કે, આવનારા દિવસોમાં આ વ્યવસ્થાઓ વધુ સુદ્રઢ બનાવી સરકારી રસીકરણ કેન્દ્રોમાં વિનામૂલ્યે રસીકરણ ઉપરાંત ખાનગી હોસ્પિટલો દ્વારા ચાર્જેબલ બેઝીઝ પર વેક્સિનેશનની કામગીરીનું ફલક કોવિડ મહામારી સામેની લડતમાં રક્ષણ મેળવવાના હેતુ સાથે વધુ વ્યાપક બનાવવામાં આવશે

ખાનગી હોસ્પિટલને વેક્સિન ક્યાંથી મળે છે?

સરકાર દ્વારા જાહેર પ્રેસનોટમાં જણાવ્યું કે, ખાનગી હોસ્પિટલો પોતાની જરૂરિયાત મુજબનો વેક્સિન જથ્થો દેશના વેક્સિન ઉત્પાદકો પાસેથી સીધો મેળવીને આ વેક્સિનેશન કામગીરી કરે છે. મહત્વનું છે કે, રાજ્યમાં 7 મહાનગરો અમદાવાદ, વડોદરા, સુરત, રાજકોટ, જામનગર અને ગાંધીનગર તેમજ મહેસાણા, કચ્છ અને ભરૂચ સહિત 10 સ્થળોએ તા.1 મે-2021થી 18થી 44ની વય જૂથના લોકોને સરકારી રસીકરણ કેન્દ્ર પરથી વિનામૂલ્યે વેક્સિન આપવાનું શરૂ કરવામાં આવ્યું છે.