કોરોના વાયરસ મહામારીના કારણે દેશ કપરી પરિસ્થિતિથી પસાર થઈ રહી રહ્યો છે. દેશમાં જુદા જુદા રાજ્યની પરિસ્થિતિ અત્યંત ભયંકર છે અને લોકો સારવાર માટે વલખાં મારી રહ્યા છે ત્યારે પીએમ મોદીના સંસદીય ક્ષેત્ર વારાણસીથી એવી તસવીર સામે આવી છે જે હૃદય ચીરી નાંખે તેવી છે.
સારવારના અભાવમાં મોતનો આરોપ
ઉત્તર પ્રદેશના વારાણસીમાં કિડનીની સમસ્યાથી લડી રહેલા એક યુવકની મોત થઈ ગઈ પરંતુ હોસ્પિટલ તરફથી શબ લઈ જવા માટે એમ્બ્યુલન્સની સુવિધા મળી ન શકી. એવામાં એક મા પોતાના જવાન જોધ દીકરાના શબને ઈ-રિક્ષામાં લઈ જવા મજબૂર થઈ ગઈ.
યુવાન દીકરાના શબને રિક્ષામાં લઈ જવા માટે મજબૂર મા
આ માની તસવીર લોકોને હચમચાવી મૂકે તેવી છે અને સોશ્યલ મીડિયામાં ખૂબ વાયરલ થઈ રહી છે. જોકે તસવીર તમને વિચલિત કરી શકે છે. માતાની એ તસવીર વારાણસીના બેકાર તંત્રનું વરવું દ્રશ્ય રજૂ કરે છે. વારાણસીની હોસ્પિટલમાં વૃદ્ધ માતા પોતાના દીકરાને લઈને હોસ્પિટલ પહોંચી પરંતુ સારવાર થઈ ન શકી અને દીકરાની મોત થઈ ગઈ. મોત બાદ પણ એમ્બ્યુલન્સની વ્યવસ્થા થઈ ન શકી અને વૃદ્ધ માતાએ પોતાના વ્હાલસોયા દીકરાને રિક્ષામાં પોતાના પગ પાસે મૂકીને લઈ જવો પડ્યો.
કોરોના વાયરસના કારણે ઉત્તર પ્રદેશમાં સ્વાસ્થ્ય સુવિધા પડી ભાંગી
નોંધનીય છે કે કોરોના વાયરસના કારણે ઉત્તર પ્રદેશના શહેરોની હાલત ખૂબ જ ખરાબ છે. જુદા જુદા શહેરોમાં કોઈને બેડ નથી મળી રહ્યા અને ઑક્સીજનની અછત ઊભી થઈ છે. ઉત્તર પ્રદેશમાં હાઇકોર્ટ દ્વારા લૉકડાઉન કરવાના આદેશ આપવામાં આવ્યા હતા જોકે સરકારે ચોખ્ખી ના પાડી દીધી છે.