ઉત્તરપ્રદેશ / મદરેસાને લઇ યોગી સરકારનો મહત્વનો નિર્ણય, ડ્રેસકોડથી લઇને રજાને લઇ આપ્યો મહત્વનો આદેશ

• ઉત્તર પ્રદેશ સરકારનો મદરેસાને લઈને મોટો નિર્ણય
• મદરેસાની સાપ્તાહિક રજા બદલવામાં આવશે
• મદરેસાઓમાં પણ યુનિફોર્મ પહેરવાનો નિર્ણય

ઉત્તર પ્રદેશ સરકારે મદરેસાને લઈને મોટો નિર્ણય લીધો છે અને ઘણા નિયમોમાં ફેરફાર કર્યા છે. લખનૌમાં મળેલી મદરેસા બોર્ડની બેઠકમાં તમામ મદરેસાની સાપ્તાહિક રજા બદલવાનો મોટો નિર્ણય લેવામાં આવ્યો છે. આ સિવાય મદરેસાઓમાં પણ યુનિફોર્મ પહેરવાનો નિર્ણય લેવામાં આવ્યો છે.

હવે શુક્રવારને બદલે રવિવારની રજા રહેશે
મદરેસા બોર્ડના અધ્યક્ષ ઈફ્તિખાર અહેમદ જાવેદે એક બેઠક બોલાવી હતી, જેમાં સાપ્તાહિક રજામાં ફેરફાર અંગે નિર્ણય લેવામાં આવ્યો હતો. હવે યુપીની મદરેસાઓમાં શુક્રવારે રજા નહીં હોય અને શુક્રવારના બદલે રવિવારે મદરેસાઓમાં રજા રહેશે. આ આદેશ યુપીની તમામ સહાયિત અને બિન-સહાયિત માન્યતા પ્રાપ્ત મદરેસામાં લાગુ થશે.

શા માટે બોલાવવામાં આવી હતી બેઠક?
ઉત્તર પ્રદેશ મદરેસા શિક્ષણ પરિષદની બેઠક બિન-સરકારી અરેબિક ફારસી મદરેસા, માન્યતા વહીવટ અને સેવા નિયમો 2016 માં સુધારા માટે બોલાવવામાં આવી હતી. કાઉન્સિલના પ્રમુખ ડો. ઇફ્તેખાર અહેમદ જાવેદના નેતૃત્વમાં આ બેઠક યોજાઇ હતી. મદરેસાઓમાં શિક્ષકોના માધ્યમ વિષયોના વિતરણ, મદરેસામાં સંચાલકો, આચાર્યો, શિક્ષકો/બિન-શિક્ષણ કર્મચારીઓના અધિકારો/ફરજો પર પણ ચર્ચા કરવામાં આવી હતી.

મદરેસામાં ઉછરી રહેલા બાળકો માટે ડ્રેસ કોડ હશે
ઉત્તર પ્રદેશમાં મદરેસાઓમાં પણ હવે યુનિફોર્મ હશે અને મદરેસામાં પણ હવે સ્કૂલોની જેમ યુનિફોર્મ હશે. ઉત્તર પ્રદેશ મદરેસા એજ્યુકેશન કાઉન્સિલના પ્રમુખ ડૉ. ઇફ્તેખાર અહેમદ જાવેદની અધ્યક્ષતામાં મળેલી બેઠકમાં એવો પણ નિર્ણય લેવામાં આવ્યો હતો કે રાજ્યની તમામ મદરેસાઓમાં ડ્રેસ કોડ લાગુ થશે. આ ઉપરાંત બેઠક દરમિયાન અરબી-ફારસી પરીક્ષાઓની પરીક્ષા ફી ઓનલાઈન દ્વારા પણ જમા કરાવવાની વ્યવસ્થા કરવાની દરખાસ્ત કરવામાં આવી હતી.