પાકિસ્તાન પર અમેરિકા ગમે ત્યારે મોટી કાર્યવાહી કરે તેવી શક્યતા દેખાઈ રહી છે, પાકિસ્તાની સરકારમાં પણ આ મુદ્દાને લઈને ચિંતા ફેલાઇ છે.
પાકિસ્તાને તાલિબાન રાજ સ્થાપિત કરવામાં કર્યું મોટું કામ
હવે અમેરિકા મોટો નિર્ણય લે તેવી શક્યતા
પ્રતિબંધો લાગશે તે બીકે ઈમરાન સરકાર અને સેનામાં ખળભળાટ
પાકિસ્તાનનાં કારણે મુશ્કેલીમાં મુકાયું અમેરિકા
અફઘાનિસ્તાનમાંથી અમેરિકાએ પોતાની સેના પાછી બોલાવી અને તે બાદ તાલિબાન રાજની સાથે સાથે વધતાં આતંકવાદનાં કારણે વિશ્વભરમાં અમેરિકાની જબરદસ્ત બદનામી થઈ રહી છે. રાષ્ટ્રપતિ બાયડનનાં નિર્ણયો સામે પણ સવાલો ઊભા કરવામાં આવી રહ્યા છે ત્યારે હવે અમેરિકા પાકિસ્તાન સામે કોઈ મોટો નિર્ણય લેવાની તૈયારીમાં હોય તેવું માનવામાં આવી રહ્યું છે.
પાકિસ્તાન પર અમેરિકા લગાવી શકે છે પ્રતિબંધ
અમેરિકામાં પાકિસ્તાન સામે જબરદસ્ત ગુસ્સો છે અને સંસદમાં પાકિસ્તાન સામે કાર્યવાહીની માંગ ઉઠી રહી છે. એવામાં પાકિસ્તાનમાં ઈમરાન સરકાર અને સેનામાં જોરદાર ચિંતા ફેલાઈ ગઈ છે. પાકિસ્તાનનાં પ્રધાનમંત્રી ઈમરાન ખાન કેટલાય મહિનાથી બાયડન સાથે ફોન પર વાતચીત થાય તેની રાહ જોઈ રહ્યા છે પરંતુ હજુ સુધી શક્ય બન્યું નથી. હાલમાં જ સૂત્રો અનુસાર સમાચાર સામે આવ્યા હતા કે પાકિસ્તાની સેનાના પ્રમુખ બાજવાએ ચિંતા વ્યક્ત કરી હતી કે અમેરિકા ગમે ત્યારે પાકિસ્તાન પર કડક પ્રતિબંધો લગાવી શકે છે.
વિદેશ મંત્રીએ કહ્યું હતું સંબંધો પર વિચાર કરીશું
અમેરિકાનાં વિદેશ મંત્રી એન્ટની બ્લિંકને ગયા સપ્તાહમાં જ સ્વીકાર્યું હતું કે અફઘાનિસ્તાનમાં પાકિસ્તાનનો રોલ શંકાસ્પદ રહ્યો છે અને અમેરિકા પોતાના સંબંધોને લઈને નિર્ણય લેશે. તેમણે કહ્યું કે પાકસ્તાને જ હક્કાનીનાં આતંકવાદીઓને શરણ આપી છે જે અમેરિકાના વિરુદ્ધ છે.
દુનિયા તાલિબાનને આપે પૈસા : ઈમરાન ખાન
નોંધનીય છે કે અફઘાનિસ્તાનમાં તાલિબાન શાસન થયું તે પહેલાથી જ આખું પાકિસ્તાન ખૂલીને આતંકવાદીઓની સરકારનાં સમર્થનમાં નિવેદનો આપ્યા હતા અને ઈમરાન ખાને તો દુનિયાભરનાં દેશોને બ્લેકમેલ કરવાના પ્રયાસો કર્યા હતા. તેમણે કહ્યું કે દુનિયા તાલિબાનને દેશ ચલાવવા માટે પૈસા આપે. જૉ નહીં આપે તો ગૃહયુદ્ધ છેડાઈ જશે.