નવપ્રયોગ / દીવાલ પાર કરીને હવે રોશની ઘરમાં પહોંચશેઃ બનાવાયું પારદર્શક કોંક્રીટ

પારદર્શક દીવાલમાંથી પસાર થઇને સૂરજનાં કિરણો ઘરની અંદર પહોંચશે. તેનાથી દિવસમાં પણ લાઇટ નહીં હોય તેવા રૂમમાં ભરપૂર રોશની રહેશે. હરકોર્ટ બટલર ટેકનિકલ યુનિવર્સિટી (એચબીટીયુ)ના સિવિલ એન્જિનિયરિંગ વિભાગના એમ.ટેક.ના વિદ્યાર્થી રામાંશ વાજપેયીએ લોખંડના કચરા અને પ્લાસ્ટિક ફાઇબરને મિક્સ કરીને એવું 'ટ્રાન્સપરન્ટ કોંક્રીટ' બનાવ્યું છે, જે સૂર્યનાં કિરણોને પાર જવા દેશે, તેનાથી બનેલી દીવાલમાંથી પસાર થઇને માત્ર રોશની જશે, પરંતુ ગરમી નહીં. દીવાલ અંદરથી તપશે નહીં. તેથી વીજળીનો વપરાશ ૩૦ ટકા ઘટશે.

કાર્બન ડાયોક્સાઇડમુક્ત હોવાના કારણે આ પારદર્શક કોંક્રીટ સાધારણ કોંક્રીટની સરખામણીએ ૧૫ ટકા હળવું, ૨૩ ટકા વધુ મજબૂત હશે, જ્યારે હાલની દીવાલની સરખામણીમાં તે ૩૩ ટકા મજબૂત હશે, તેમાં ઉપયોગ કરાતાં પ્લાસ્ટિક ઓપ્ટિકલ ફાઇબર સસ્તાં અને ટકાઉ હોવાની સાથે સૂરજની રોશનીને આરપાર કરવાની ક્ષમતા રાખે છે. આ કોંક્રીટમાં જીજીબીએસ અને પીઓપી હોવાના કારણે તે સાધારણ કોંક્રીટ કરતાં ૧૫ ટકા હળવી છે. 

ડો. દીપેશકુમાર સિંહના નિર્દેશનમાં આ કોંક્રીટ તૈયાર કરનાર વિદ્યાર્થી રામાંશે જણાવ્યું કે તેના દ્વારા સૂરજની ૩૦ ટકા રોશની ઘરની અંદર પહોંચશે. તે સાધારણ કોંક્રીટથી ૨૩ ટકા વધુ મજબૂત છે. તેમણે ટ્રાન્સપરન્ટ કોંક્રીટ બનાવવા માટે ૪૦ ટકા જીજીબીએસનો ઉપયોગ કરીને જાણ્યું કે તેનો ઉપયોગ કરવાથી સાધારણ કોંક્રીટની સરખામણીમાં માત્ર ૩૩ ટકા જેટલો ખર્ચ આવે છે. 

જીજીબીએસમાંથી બનેલ ટ્રાન્સપરન્ટ કોંક્રીટની કિંમત લગભગ ૧૯,૦૨૪ રૂપિયા આવી છે. ઈંટની એ દીવાલની કિંમત ૫,૮૦૦ રૂપિયા આવે છે. રામાંશે જણાવ્યું કે લોખંડ અને સ્ટીલ ઉદ્યોગના કચરાને જીજીબીએસ કહે છે. તેને ભૂકો કરીને પારદર્શક કોંક્રીટ બનાવાય છે. તેનાથી રોશની તો આવશે, પરંતુ હવા-પાણી નહીં.