- ગુજરાત વિધાનસભાની ચૂંટણીની તડમાર તૈયારીઓ
- કેન્દ્રીય ગૃહમંત્રી અમિત શાહે તૈયાર કર્યું 'મિશન 7'
- ગાંધીનગર લોકસભા બેઠક અમિત શાહ માટે પ્રતિષ્ઠાનો જંગ
ગુજરાત વિધાનસભાની ચૂંટણીને આંગળીના વેઢે ગણી શકાય એટલા દિવસો જ બાકી છે. એવામાં આ વિધાનસભાની ચૂંટણી વડાપ્રધાન નરેન્દ્ર મોદી અને કેન્દ્રીય ગૃહમંત્રી અમિત શાહ માટે ખાસ છે. કારણ કે પહેલું ગુજરાત એ પીએમ મોદી અને અમિત શાહનું ગૃહરાજ્ય છે. બીજુ ભારતીય જનતા પાર્ટીના વિજયરથને ચલાવી રાખવો પણ તેમની મોટી જવાબદારી છે. આ દરમિયાન અમિત શાહે સૌથી વધારે સમય અમદાવાદ અને પોતાના લોકસભા વિસ્તાર ગાંધીનગરમાં વિતાવ્યો. તેમની ગતિવિધિઓને જોઈને એવું કહી શકાય છે કે તેમણે પોતાના માટે 'મિશન 7' તૈયાર કરી લીધું છે.
શાહને માનવામાં આવે છે ચૂંટણી રણનીતિકાર
અમિત શાહને ભાજપના ચૂંટણી રણનીતિકાર માનવામાં આવે છે. ગુજરાતમાં ઉમેદવારોની યાદી તૈયાર કરવી, નારાજ નેતાઓને શાંત કરવા કે પછી ઉમેદવારી ફોર્મ ભરતી વખતે નેતાઓની સાથે જવું એ તેમના અભિયાનનો હિસ્સો માનવામાં આવે છે.
ગાંધીનગર લોકસભા એટલે 7 વિધાનસભા સીટો
ગાંધીનગર લોકસભા બેઠક અમિત શાહ માટે પ્રતિષ્ઠાનો જંગ પણ છે. અહીં વેજલપુર, નારણપુરા, ઘાટલોડિયા, સાબરમતી, કલોલ, સાણંદ, ગાંધીનગર ઉત્તર સહિત 7 વિધાનસભા વિસ્તાર આવે છે. કહેવામાં આવે છે કે અમિત શાહે આમાંથી 5 બેઠકો પર ઘણો સમય વિતાવ્યો છે. જ્યારે તાજેતરના પ્રવાસ દરમિયાન તેઓએ કલોલ અને ગાંધીનગર ઉત્તરની મુલાકાત લીધી નથી. એવી સંભાવનાઓ વ્યક્ત કરવામાં આવી રહી છે કે તેઓ ટૂંક સમયમાં આ વિસ્તારને પણ કવર કરી શકે છે.
ઉમેદવારો સાથે કરી હતી મુલાકાત
અમિત શાહ સાણંદ બેઠકના ભાજપના ઉમેદવાર કનુભાઈ પટેલની સાથે પણ ઉમેદવારી ફોર્મ ભરવા માટે ગયા હતા. તેઓએ મુખ્યમંત્રી ભૂપેન્દ્ર પટેલની સાથે ઘાટલોડિયામાં રોડ શો પણ કર્યો હતો. આ ઉપરાંત તેઓ વેજલપુર (અમિત ઠાકર), નારણપુરા (જીતેન્દ્ર પટેલ) અને સાબરમતી (ડો.હર્ષદ પટેલ)ના કાર્યલય ખાતે પહોંચ્યા હતા.
ગાંધીનગર લોકસભા વિસ્તારનો ઈતિહાસ
વર્ષ 1989માં અહીંથી શંકરસિંહ વાઘેલા જીત્યા હતા. જ્યારે અમિત શાહ 2019માં અહીંથી જીત્યા હતા. ખાસ વાત એ છે કે ગાંધીનગર લોકસભા વિસ્તારની કમાન લાંબા સમય સુધી એવા નેતાઓના હાથમાં રહી, જેઓ ગુજરાતના નહોતા. ભાજપના દિગ્ગજ નેતા લાલકૃષ્ણણ અડવાણી વર્ષ 1991થી 2014 સુધી સાંસદ રહ્યા. આપને જણાવી દઈએ કે, 1996માં પૂર્વ વડાપ્રધાન દિવંગત અટલ બિહારી વાજપેયી લખનઉ અને ગાંધીનગર બેઠક ઉપરથી લડ્યા હતા. બંન્ને બેઠક ઉપર વિજય થતા ગાંધીનગર બેઠક પર તેમણે રાજીનામું આપ્યુ હતું.
ગત ચૂંટણીમાં પાર્ટીએ અનેક પડકારોનો કર્યો સામનો
ગુજરતામાં છેલ્લા 27 વર્ષોથી એટલે કે 1995થી ભારતીય જનતા પાર્ટી જીતી રહી છે. જોકે, પાટીદાર આંદોલન, જીએસટી લાગુ જેવા અનેક પડકારોનો સામનો પાર્ટીએ વર્ષ 2017માં કર્યો, પરંતુ તે સમયે પણ ભાજપ 99 બેઠકોની સાથે સરકાર બનાવવામાં સફળ રહ્યું. વર્ષ 1998 પછી પ્રથમ વખત એવું બન્યું હતું કે જ્યારે પાર્ટીની જીતનો આંકડો 100થી નીચે રહ્યો હતો.
