દિલધડક લૂંટના દ્રશ્યો / અંકલેશ્વરની બેંકમાં બંદૂકની અણીએ લૂંટ ચલાવીને ભાગેલા 5 લૂંટારુઓ અને પોલીસ વચ્ચે ફાયરિંગ, શહેરમાં નાકાબંધી

• અંકલેશ્વરમાં અસામાજિક તત્વો બેફામ
• રાજપીપળા ચોકડી પાસે પોલીસ કર્મી પર ફાયરિંગ
• લૂંટ બાદ પોલીસ પર ફાયરિંગ કરી અસમાજિક તત્વો ફરાર

અંકલેશ્વર શહેરમાં બુધવારે રાતે ટ્રાવેલર્સ ઉપર ફાયરિંગ થયું હતું. જે હાલ નાજુક અવસ્થામાં હોસ્પિટલમાં સારવાર હેઠળ છે. શહેર પોલીસ, ડોગ સ્કવોર્ડ, બેલેસ્ટિક વિભાગની મદદથી જ્યાં આ ઘટનાનો ભેદ ઉકેલવા તલસર્પશી તપાસ કરી રહી હતી ત્યાં જ વધુ એક હચમચાવતી ઘટના ધોળે દહાડે બની છે.

બેંકમાં હથિયારો સાથે ત્રાટકેલા 5 લૂંટારૂંઓએ લૂંટ ચલાવવાનો કર્યો પ્રયાસ
પીરામણ નાકા વિસ્તારમાં આવેલી યુનિયન બેંકમાં હથિયારો સાથે ત્રાટકેલા 5 જેટલા લૂંટારુંઓએ તમંચાની અણીએ લૂંટ ચલાવવાનો પ્રયાસ કર્યો હતો. જોકે ભરૂચમાં જ રેન્જ આઈજી આજે ઉપસ્થિત હોય અને રાતની ફાયરિંગની ઘટના બાદ એલર્ટ રહેલી પોલીસ તરત એક્શનમાં આવી હતી. અંકલેશ્વરની રાજપીપળા ચોકડી નજીક પોલીસે નાકા બંધી દરમિયાન લૂંટારુઓને પડકાર્યા હતા. લૂંટારુઓએ પોલીસ પર ફાયરિંગ કરતા જવાબમાં પ્રતિકારમાં પોલીસે પણ ફાયરિંગ કર્યું હતુ. જેમાં એક લૂંટારું ઝડપાઇ ગયો હોવાના હાલ બિનસત્તાવાર અહેવાલ સાંપડી રહ્યા છે. 

પોલીસે રૂપિયા 22 લાખ 70 હજાર રૂપિયા રિકવર કર્યા
ભરૂચમાં અંકલેશ્વરની યુનિયન બેંકમાંથી થયેલી 44 લાખની લૂંટનો મામલો આરોપીઓ અને પોલીસ વચ્ચે ફાયરિંગ થયું હતું. એક લુંટારૂને ગોળી વાગતા ઇજાગ્રસ્ત થયો હતો. આ ઇજાગ્રસ્ત લૂંટારુની પોલીસે ધરપકડ કરી લીધી છે. તો પોલીસે રૂપિયા 22 લાખ 70 હજાર રૂપિયા રિકવર કર્યા છે. 2 બાઇક પર 5 લૂંટારુઓ આવ્યા હતા. પોલીસે ફરાર લૂંટારૂઓને ઝડપી પાડવા ચક્રો ગતિમાન કર્યા છે.

3 દેશી તમંચા અને એક ઇજાગ્રસ્ત લૂંટારીને ઝડપી લેવાયો
આ ઘટના બાદ તુરંત જિલ્લા પોલીસ વડા ડૉ. લીના પાટીલ, એલ.સી.બી., એસ.ઓ.જી. સહિતનો કાફલો ઘટનાસ્થળે દોડી ગયો હતો. હાલ પોલીસે ઠેર ઠેર નાકાબંધી, ચેકીંગ કરી લુંટારુઓને પકડી પાડવા આગળની કાર્યવાહી હાથ ધરી છે. પોલીસના જવાબી ફાયરિંગમાં એક લૂંટારું ઘવાયો હતો. જિલ્લા પોલીસ દ્વારા ₹22.70 લાખ, ત્રણ દેશી તમંચા અને એક ઇજાગ્રસ્ત લૂંટારુંને જેલ હવાલે કરી લેવામાં આવ્યો છે. આ સમગ્ર ઘટનાના સીસીટીવી ફૂટેજ પણ બહાર આવ્યા છે જેમાં લૂંટારુઓની તમામ ગતિવિધિ કેમેરામાં કેદ થઈ છે.