રાજ્યમાં લોકસભાની ચૂંટણી હવે માથા ઉપર છે. એવામાં અલ્પેશ ઠાકોરે રાજીનામું આપતાં કોંગ્રેસ પાર્ટીને ભારે ઝાટકો લાગ્યો છે. જ્યારે હવે કોંગ્રેસ પાર્ટી પણ એક્શનમાં છે, પાર્ટી અલ્પેશ ઠાકોરને ધારાસભ્ય પદેથી રાજીનામું આપી શકે છે, જ્યારે સાથે-સાથે અન્ય બે ધારાસભ્યોની પણ હકાલપટ્ટી કરી શકે છે.
પક્ષવિરોધી પ્રવૃત્તિઓને લઇ કોંગ્રેસ હવે આકરા પાણીએ છે. કોંગ્રેસ દ્વારા અલ્પેશ ઉપરાંત અન્ય બે ધારાસભ્યો સામે પણ પક્ષવિરોધી પ્રવૃત્તિઓને લઇ પગલા લેવાઇ શકે છે. જેમાં બાયડ ધારાસભ્ય અને બહુટરાડીના ધારાસભ્ય ધવલસિંહ અને ભરત ઠાકોર પર લટકતી તલવાર છે.
ધવલસિંહ અને ભરત ઠાકોરેએ પણ કોંગ્રેસના નેતૃત્વ સામે નિવેદન કર્યા છે. ત્યારે બંને ધારાસભ્યોના પેપર તૈયાર કરવા કોંગ્રેસ પ્રમુખની લીગલ ટીમને સૂચના અપાઇ છે. પક્ષને નુકસાન કરનારની હકાલપટ્ટ કરવા રાહુલ ગાંધીએ ગુજરાત કોંગ્રેસને સૂચના આપી છે. ત્યારે રાહુલ ગાંધીની સૂચનાને લઇ ત્રણેય ધારાસભ્યો સામે કોંગ્રેસ કાર્યવાહી કરવાની તૈયારી કરી લીધી છે.
તમને જણાવી દઇએ કે, કોંગ્રેસને અલવીદા કરનાર અલ્પેશ ઠાકોરની મુશ્કેલીમાં વધારો થઈ શકે છે. અલ્પેશ ઠાકોરનું ધારાસભ્યપદ રદ કરવા કોંગ્રેસે કવાયત શરૂ કરી છે. સોમવારે કોંગ્રેસની લીગલ ટીમ હાઇકોર્ટમાં પિટિશન દાખલ કરશે. કોંગ્રેસના વકીલોએ તૈયાર કરેલા ડ્રાફ્ટને કોંગ્રેસ પ્રમુખને મંજૂરી આપી છે. સસ્પેન્ડ કરવાના બદલે અલ્પેશને પ્રાથમિક સભ્યપદેથી હકાલપટ્ટી કરવાની પ્રક્રિયા હાથ ધરવામાં આવશે. પક્ષ વિરોધી પ્રવૃત્તિઓના આધારે કોંગ્રેસ હાઇકોર્ટમાં પિટિશન કરશે. જેના માટે કોંગ્રેસની લીગલ ટીમે કેસને અનુલક્ષીને વધુ અભ્યાસ શરૂ કર્યો છે.
ધારાસભ્ય અલ્પેશ ઠાકોર કોંગ્રેસમાંથી તમામ પદ પરથી રાજીનામુ આપ્યુ છે. ત્યારે કોંગ્રેસ પણ અલ્પેશની સામે લડી લેવા માટે તૈયાર છે. અલ્પેશ ઠાકોરનું ધારાસભ્યપદ છીનવા માટે કોંગ્રેસ દ્વારા ડ્રાફ્ટ તૈયાર કરવામાં આવ્યો છે. 7 જેટલા વકીલોની ટીમ દ્વારા અલ્પેશનુ ધારાસભ્ય પદ છીનવા માટે ડ્રાફ્ટ તૈયાર કરવામાં આવ્યો છે. કોર્ટની અંદર મજબૂત લડાઈ લડવા માટે તમામ મુદ્દાઓને ધ્યાનમાં રાખીને ડ્રાફ્ટ તૈયાર કરવામાં આવ્યો છે. કોંગ્રેસ પ્રદેશ પ્રમુખ અમિત ચાવડાની ડ્રાફ્ટને મંજૂરી મળતા કોંગ્રેસ દ્વારા અલ્પેશની વિરૂદ્ધમાં કાર્યવાહી શરૂ કરવામાં આવશે.