આપણા ત્યાં ગુજરાતી ખીચું તો હવે એટલું પ્રખ્યાત થઈ ગયું છે કે, હવે તે પાણીપૂરીની જેમ ઠેર-ઠેર પ્રખ્યાત થઈ ગયું છે. પણ શું તમને ખબર છે કે ખીચું માત્ર ચોખાના લોટમાંથી જ નહીં પણ મકાઈના, બાજરીના કે જુવારના લોટમાંથી પણ બની શકે છે. હા એટલે એક ગુજરાતી તરીકે મેં મારા ઘરમાં મકાઈના લોટનું ખીચું તો ખાધું જ છે. તો આ શિયાળામાં ટ્રાય કરી લો હેલ્ધી અને ગરમાગરમ પૌષ્ટિક એવું મકાઈનું ખીચું. આ એક બેસ્ટ બ્રેકફાસ્ટ ઓપ્શન બની શકે છે.
સૌપ્રથમ એક તપેલીમાં તેલ ગરમ કરો. તેલ ગરમ થાય એટલે તેમાં લસણની પેસ્ટ અને લીલા મરચાં નાખીને સાંતળો. અડધી મિનિટ સાંતળ્યા બાદ તેમાં પાણી, મીઠું અને અજમો નાખીને બરાબર મિક્ષ કરી લો. પાણી થોડું ઉકળી જાય પછી તેમાં મકાઈનો લોટ નાખીને ઝડપથી હલાવો. તેમાં ગઠ્ઠા ન પડે તે રીતે બરાબર હલાવો. પાંચ મિનિટ સુધી ધીમા પાતે ચઢવા દો. ત્યાર બાદ એકવાર જોઈ લેવું, કે લોટ બરાબર ચઢી ગયો છે કે નહીં. ત્યાર બાદ ગરમા-ગરમ તેલ સાથે સર્વ કરો.