ક્રાઇમ / અમદાવાદના શહેરકોટડામાં ખુલ્લેઆમ ફાયરિંગ, જૂની અદાવતમાં શખ્સે ગોળીબાર કરતા વ્યક્તિ ઇજાગ્રસ્ત

• અમદાવાદના શહેરકોટડામાં ફાયરિંગ
• જૂની અદાવતમાં શખ્સે ફાયરિંગ કર્યું
• પોલીસે હત્યાના પ્રયાસનો ગુનો નોંધ્યો

અમદાવાદના શહેરકોટડામાં આજે ખુલ્લેઆમ ફાયરિંગ થયાની ઘટના સામે આવી છે. કોઇ જૂની અદાવતમાં ફાયરિંગ થયું હોવાની જાણવા મળી રહ્યું છે. સહદેવસિંહ તોમર નામના શખ્સે ફાયરિંગ કરતા દિલીપસિંહ ચૌહાણ નામના યુવકને ગોળી વાગી હતી.

FSL દ્વારા ઘટનાસ્થળેથી પુરાવાઓ એકત્ર કરાયા

હાલમાં આ ઘટનાને લઇને પોલીસે હત્યાના પ્રયાસનો ગુનો નોંધ્યો છે. આ સાથે ઇજાગ્રસ્ત વ્યકિતને હોસ્પિટલ ખસેડવામાં આવ્યો છે. ઇજાગ્રસ્ત દિલીપસિંહ ચૌહાણને ગળાના ભાગે ગોળી વાગી હોવાનું સામે આવ્યું છે. આ ઘટનાની જાણ થતા જ ઘટનાસ્થળે પોલીસનો કાફલો પહોંચી ગયો હતો. હાલમાં FSL દ્વારા ઘટનાસ્થળેથી પુરાવાઓ એકત્ર કરવામાં આવી રહ્યાં છે. હાલમાં આ મામલે હાલ પોલીસે આરોપી સહદેવસિંહને પકડવા માટેના પ્રયાસો હાથ ધર્યા છે.

અમદાવાદ: શહેર કોટડા વિસ્તારમાં જૂની અદાવતમાં ફાયરિંગની ઘટના, સહદેવસિંહ તોમર નામના શખ્સે ફાયરિંગ કરતા દિલીપસિંહ ચૌહાણ નામના યુવકને ગોળી વાગી, પોલીસે હત્યાના પ્રયાસનો ગુનો નોંધી કાર્યવાહી હાથ ધરી#Ahmedabad

— VTV Gujarati News and Beyond (@VtvGujarati) August 22, 2022

ગઇકાલે પણ સુરતમાં જૂની અદાવતમાં ફાયરિંગ કરાયું હતું

ઉલ્લેખનીય છે કે, રાજ્યમાં ક્યારેક ચોરી-લૂંટફાંટની ઘટનાઓમાં તો ક્યારેક કોઇક જૂની અદાવતમાં ફાયરિંગ કર્યાની ઘટનાઓ સામે આવતી રહે છે. ત્યારે ગઇકાલે જ સુરતના ચોક બજાર પોલીસ સ્ટેશન વિસ્તારમાં આવેલા વેડરોડ વિસ્તારમાં જૂની અદાવતમાં ફાયરિંગ થયાની ઘટના સામે આવી હતી. એક વર્ષ પહેલા સૂર્યા મરાઠીની હત્યા થઈ હતી. એક વર્ષ બાદ હવે તેની હત્યા કરનારા તેના જ સાગરીત પર મોતનો હુમલો કરવામાં આવ્યો હતો. કુખ્યાત સૂર્યા મરાઠી ગેંગના સભ્ય સફી શેખ પર ફાયરિંગ કરાતા આસપાસના વિસ્તારમાં ભારે ચકચાર મચી ગઈ હતી. જેના લીધે લોકોમાં ડરનો માહોલ પેદા થયો હતો. જોકે ફાયરિંગની આ પણ ઘટના જૂની અદાવતમાં થઈ હોવાનું જાણવા મળ્યું હતું.

થોડા દિવસ અગાઉ સુરતના વાવ ગામે નિવૃત્ત આર્મીમેને પુત્ર પર કર્યું હતું ફાયરિંગ

તદુપરાંત થોડાક દિવસ અગાઉ જ સુરતના જ વાવ ગામે ફાયરિંગની ઘટના સામે આવી હતી. જેમાં એક નિવૃત આર્મીમેને પોતાના 15 વર્ષના પુત્ર પર બે રાઉન્ડ ફાયરિંગ કર્યું હોવાની ઘટના સામે આવી હતી. જેમાં પહેલી ગોળી મિસ થયા બાદ બીજી ગોળી પુત્રના હાથ પર વાગી હતી. પુત્રએ પિતાના માથામાં વાઇપર મારતા પિતાએ ફાયરિંગ કર્યું હતું. જોકે આ મામલે કામરેજ પોલીસે નિવૃત્ત આર્મીમેનની અટકાયત કરી હતી.