મોબાઇલ ગેમ / PUBGની બાળકો પર ખતરનાક અસર, 1 લાખ લઇ 500 કિમીના પ્રવાસે ઉપડ્યા 4 બાળકો

મધ્યપ્રદેશના ગુનામાં રહેતા એક અમીર ઉદ્યોગપતિના પરિવારના 4 બાળકો PUBG મોબાઈલ ગેમનું 'મિશન' પુરું કરવાના ચક્કરમાં ઘર છોડીને 500 કિલોમીટરના પ્રવાસે નીકળી ગયા હતા. PUBG મોબાઈલ દ્વારા તેમને ગેમમાં 500 કિલોમીટરનો પ્રવાસ કરવાનો 'ટાર્ગેટ' આપવામાં આવ્યો હતો, પણ બાળકો તેને સમજી શક્યા નહોતા. ભારે જહેમત અને તપાસ બાદ આખરે ગ્વાલિયરમાંથી આ ચારેય બાળકો હેમખેમ મળી આવતા તેમના પરિવારજનો અને પોલીસે રાહતનો શ્વાસ લીધો હતો.

સિટી કોતવાલી પોલીસ સ્ટેશનના અધિકારીના જણાવ્યા અનુસાર, 10-10 વર્ષના 2 બાળકો અને 13 તથા 14 વર્ષની બે કિશોરીઓ ગુનાના અમીર પરિવારમાંથી આવે છે અને તેઓ પિતરાઈ ભાઈ-બહેન છે. આ ચારેય બાળકો ઘણા લાંબા સમયથી PUBG મોબાઈલ ગેમ રમવાની આદતનો શિકાર બન્યા હતા અને આખો દિવસ PUBG જ રમ્યા કરતા હતા. 

PUBG ગેમમાં ચારેયની લાઈફલાઈન સમાપ્ત થઈ ગઈ હતી અને તે ફરી ખોલવા માટે PUBG તરફથી તેમને 200 કિમીનો પ્રવાસ કરવાનો ટાર્ગેટ આપવામાં આવ્યો હતો. PUBGના રસિયાઓ જાણતા હશે કે રોયલ પાસ (આરપી) માટેના મિશનમાં ગેમની અંદર જ તમારા કેરેક્ટરને અમુક કિલોમીટરનો પ્રવાસ કરવાના ટાર્ગેટ આપવામાં આવતા હોય છે.
આ બાળકો PUBG દ્વારા અપાયેલા મિશનને સમજવામાં નિષ્ફળ રહ્યા હતા અને તેઓ ગેમના બદલે રિયલ લાઈફમાં 500 કિમીના પ્રવાસે નીકળી પડ્યા હતા. 

મોડી રાતે 2.50 કલાકે ચારેય ભાઈ-બહેન બેગ તૈયાર કરીને ઘરનો દરવાજો બહારથી બંધ કરી મથુરા જવા માટે નીકળ્યા હતા. વહેલી સવારે પરિવારને બાળકો ગાયબ હોવાની જાણ થઈ હતી અને તેમણે પોલીસની મદદ માગી હતી. ગ્લાવિયર પોલીસે સીસીટીવી કેમેરાની મદદથી બાળકોની ભાળ મેળવી લીધી હતી અને તેમને પરિવારજનોને સોંપ્યા હતા. પોલીસના જણાવ્યા પ્રમાણે આ બાળકો તેમની સાથે 1 લાખ રૂપિયા લઈને ગયા હતા, જેમાંથી તેમણે બે હજાર રૂપિયા મુસાફરી દરમિયાન વાપરી નાંખ્યા હતા.