IPLIN
 

આઈપીએલ / IPL 2021 હરાજીમાં ગુજરાતનાં ખેલાડીઓની બોલબાલા, જુઓ કોણ કેટલામાં વેચાયુ

Team VTV 08:28 PM, 18 Feb 21 | Updated: 08:39 PM, 18 Feb 21
Follow us
these gujju players got chance to play in IPL 2021 season

આઈપીએલ 2021ની હરાજીમાં સાઉથ આફ્રિકાનાં બોલર ક્રિસ મોરિસનું નામ ખૂબ ચર્ચાયુ જેને રાજસ્થાન રોયલ્સ દ્વારા આઈપીએલનાં ઈતિહાસમાં સૌથી વધુ કિંમત આપીને ખરીદવામાં આવ્યો છે. પણ તેની સાથે-સાથે આ વર્ષની આઈપીએલ હરાજીમાં ગુજરાતનાં ખેલાડીઓની પણ બોલબાલા રહી. આઈપીએલ 2021ની હરાજીમાં ગુજરાતનાં 6 ખેલાડીઓની તગડી રકમ સાથે ખરીદવામાં આવ્યા છે.

  • ગુજરાતનાં 6 ખેલાડીઓને ખરીદવા માટે થઈ પડાપડી
  • આ ઈન્ટરનેશનલ પ્લેયર પહેલીવાર રમશે આઈપીએલ
  • ટેમ્પો ચાલકનો દિકરો રમશે રાજસ્થાન માટે 

ટેમ્પો ચાલકના દિકરાને રોયલ કિંમત મળી - ચેતન સાકરિયા ઃ 1.20 કરોડ
ગુજરાત ભાવનગરનાં ચેતન સાકરિયાની મહેનત રંગ લાવી છે. ચેતન સાકરિયાનો જન્મ 20 ઓગસ્ટ 1998ના રોજ થયો હતો. તેઓ એક ભારતીય ક્રિકેટર છે. તેમના પિતા ભાવનગરમાં ટેમ્પોચાલક છે. ભાવનગરનાં નિવાસી ચેતન સાકરિયાને રાજસ્થાન રોયલ્સની ટીમ દ્વારા 1.20 કરોડમાં ખરીદવામાં આવ્યો છે. ચેતને તેની ફર્સ્ટ ક્લાસ ક્રિકેટની શરુઆત 2017-18માં સૌરાષ્ટ્રથી કરી હતી. તે ઉપરાંત ચેતને 2018-19માં રણજી ટ્રોફી રમી અને 2018-19માં સૈયદ મુશ્તાક અલી ટ્રોફી પણ રમી હતી. આ વર્ષે ચેતન સાકરિયા અનકેપ્ડ ફાસ્ટ બોલરની લીસ્ટમાં હતો જેની બેઝ પ્રાઇઝ 20 લાખ હતી. 

કોલકાતાએ ફરી શેલ્ડન પર દાવ લગાવ્યો - શેલ્ડન જેક્સન ઃ 20 લાખ
નામથી વિદેશી લાગતા શેલ્ડન જેક્સન મૂળ ગુજરાત ભાવનગરનાં છે જેમને કોલકાતા નાઇટ રાઈડર્સે ફરી એકવાર તેની ટીમમાં તક આપી છે. અગાઉ 2009-10માં પણ શેલ્ડન કોલકાતા માટે આઈપીએલમાં રમી ચૂક્યો છે. ત્યારબાદ 2013-14માં તેને રોયલચેલેન્જર્સ બેંગ્લોરે ખરીદ્યો હતો. હાલ તે પુડુચેરી માટે ક્રિકેટ રમે છે. શેલ્ડન જેક્સન એક વિકેટ કિપર બેટ્સમેન છે અને કોલકાતા નાઈટ રાઈડર્સે તેને 20 લાખમાં ખરીદીને ટીમને વધુ મજબૂત બનાવવાનો પ્રયાસ કર્યો છે. શેલ્ડન જેક્સન જુલાઈ 2020માં સૌરાષ્ટ્રથી પુડુચેરી તરફ શિફ્ટ થયો હતો.

25 વર્ષિય બેટ્સમેન દિલ્હી માટે રમશે - રિપલ પટેલ ઃ 20 લાખ
નડિયાદનાં 25 વર્ષિય રિપલ પટેલને દિલ્હી કેપિટલ્સની ટીમમાં સમાવેશ કરવામાં આવ્યો છે. રિપલ પટેલે 2019માં લિસ્ટ એ મેચમાં બંગાળ સામે ડેબ્યૂ કર્યું હતું. જ્યારે સૌરાષ્ટ્ર ટીમ સાથે તેણે ટી-20 ડેબ્યૂ કર્યું હતું. તેનાં ટી-20 રેકોર્ડમાં 11 મેચ સાથે 191 રન 189.10 સ્ટ્રાઈક રેટ સાથે રન બનાવ્યા છે.

બરોડાનો લેફ્ટ આર્મ ફાસ્ટ બોલર દિલ્હી માટે બોલિંગ કરશે - લુકમાન મેરિવાલા ઃ 20 લાખ
29 વર્ષિય લુકમાન મેરિવાલા કે જે ભરુચનો છે અને ડોમેસ્ટિક ક્રિકેટ બરોડા માટે રમે છે અને લેફ્ટ આર્મ ફાસ્ટ-મિડિયમ બોલર છે. જે 2013-14માં સૈયદ મુશ્તાક અલી ટ્રોફીમાં બરોડા ટીમ માટે લીડિંગ વિકેટ ટેકર બન્યો હતો અને તે ટ્રોફીને જીતવામાં લુકમાનનો મહત્ત્વનો ફાળો રહ્યો હતો. આ વર્ષની આઈપીએલ 2021માં તેને દિલ્હી કેપિટલ્સ દ્વારા 20 લાખમાં ખરીદવામાં આવ્યો છે. 

ફર્સ્ટ ક્લાક ક્રિકેટમાં ઉત્કૃષ્ટ રેકોર્ડને લીધે આરસીબીએ આ ફાસ્ટ બોલરને ખરીદ્યો - હર્ષલ પટેલ ઃ 20 લાખ 
અમદાવાદનો હર્ષલ પટેલને 2012માં રોયલ ચેલેન્જર્સ બેંગ્લોર દ્વારા ટીમમાં સમાવવામાં આવ્યો હતો. પછી દિલ્હીની ટીમમાં પણ તે રમતો જોવા મળ્યો હતો. ત્યારબાદ તેણે આઈપીએલમાંથી બ્રેક લીધો. જોકે હાલ તે હરિયાણાની રણજી ટીમનો કેપ્ટન છે. ફર્સ્ટ ક્લાસ ક્રિકેટમાં તેનો રેકોર્ડ ખૂબ ઉત્કૃષ્ટ છે. જેથી આ વર્ષે તેને ફરી એકવાર રોયલ ચેલેન્જર્સ બેંગ્લોર દ્વારા 20 લાખમાં ખરીદવામાં આવ્યો છે.

ધોનીની આગેવાનીમાં રમતો જોવા મળશે આ ગુજ્જુ પ્લેયર - ચેતેશ્વર પૂજારા ઃ 50 લાખ 
ઈન્ટરનેશનલ પ્લેયર મૂળ રાજકોટનાં ચેતેશ્વર પૂજારા આઈપીએલમાં પહેલીવાર રમતા જોવા મળશે. ચેતેશ્વરનાં રેકોર્ડ વિશે તો આપણે સૌ જાણીએ છીએ. ચેતેશ્વર પૂજારાને ભારતની નવી દિવાલ પણ કહેવામાં આવે છે. આ વર્ષે પહેલીવાર ચેતેશ્વર પૂજારાએ આઈપીએલમાં રજિસ્ટ્રેશન કરાવ્યું હતું અને તેને ચેન્નાઈ સુપર કિંગ્સની ટીમે 50 લાખની કિંમતમાં ખરીદ્યો છે. જેથી આગામી આઈપીએલ સિઝનમાં પૂજારા ધોનીની આગેવાનીમાં રમતો જોવા મળશે.

IPL AUCTION IPL 2021 gujarat players આઈપીએલ આઈપીએલ ઓક્શ આઈપીએલ 2021 ગુજરાત ખેલાડીઓ
IPLIN

ટૉપ સ્ટોરીઝ

સૌથી વધુ વંચાયેલું

બ્રેકિંગ ન્યૂઝ