અમદાવાદ / સિંધુભવન રોડ પર મોબાઇલ શોપમાંથી 40 લાખના આઇફોનની ચોરી

મળતી માહિતી મુજબ ઘાટલોડિયા વિસ્તારમાં આવેલ શંકરલાલ સોસાયટીમાં રહેતા અને બોડકદેવ વિસ્તારમાં આવેલ વિનસ ડેટા પ્રોડક્ટ્સ નામની કંપનીના આઈવિનસ શો રૂમમાં છેલ્લાં બે વર્ષથી સ્ટોર મેનજર તરીકે નોકરી કરતા  ધવલ પટેલે તસ્કરો વિરુદ્ધમાં  ચોરીની  ફરિયાદ નોંધાવી છે. ફરિયાદમાં જણાવ્યા  મુજબ બોડકદેવ વિસ્તારમાં સિંધુ ભવન રોડ પાસે આઇવિનસ નામના સ્ટોરમાં મોબાઈલ ફોન અને કમ્પ્યૂટર્સ અને એસેસરિઝનો સેલ્સ અને સર્વિસનો શો રૂમ આવેલ છે. 

આ શો રૂમમાં એપલ કંપનીના મોબાઈલ અને એપલ કંપનીનાં કમ્પ્યૂટર્સ વગેરેનું વેચાણ અને સર્વિસ થાય છે. ગઈ કાલે સવારે ધવલભાઈ પટેલ વીકલી ઓફ હોવાથી ઘરે હતા ત્યારે કૌસ્તુભ પટેલ અને પૂજા પટેલનો ધવલભાઈ પર ફોન આવ્યો હતો કે સિંધુ ભવન પાસે એશિયન સ્કવેરમાં આઇવિનસ શો રૂમનો શટરનો દરવાજો તૂટેલી હાલતમાં છે અને શટર ઊંચું કરી જોતાં અંદર કાચનો દરવાજો પણ ખુલ્લો હતો. જેથી ધવલભાઈ તાતકાલિક શો રૂમ પર પહોંચી ગયા હતા.

શો રૂમ પર જઈને જોતાં ચોરી થઇ હોવાનું જણાયું હતું.  શો રૂમના સ્ટોર મેનેજર ધવલ પટેલ વીકલી ઓફ હોવાથી સ્ટોર હિતેશભાઇ અને રોનકભાઈ ગઈ કાલે રાતે નવ વાગ્યે શો રૂમ બંધ કરી તેઓ જતા રહ્યા હતા. બીજા દિવસે સવારે દસ વાગ્યે આવીને શટર ખોલતાં અંદર શો રૂમના ડિસ્પ્લેમાં કાઉન્ટરમાં મૂકેલ આઈફોન   તથા રોકડ રૂપિયા ૧.૫૦ લાખ સહિતની મતાની ચોરી થઇ હોવાનું માલૂમ પડ્યું હતું.

શો રૂમના સેલ્સ ડિપાર્મેન્ટમાં ડિસ્પ્લેમાં મૂકેલ નવ આઈફોન ગાયબ હતા. તો શો રૂમની અંદર સર્વિસ સેન્ટરના બોક્સમાં આઈફોન મૂકેલા હતા તે પણ ગાયબ હતા અને સ્ટોરના ડ્રોવરમાં મૂકેલ રોકડા રૂપિયા ૧.૫૦ લાખ  પણગાયબ હતા. તસ્કરોેએ શો રૂમમાં પ્રવેશી ચોરી કરી હતી. આશરે ૩૫ જેટલા આઈફોન અને હાર્ડવેર ટેન્ક રોકડ રકમ સહિત ૪૧.૫૦ લાખની મતાની ચોરી કરી તસ્કર ફરાર થઇ ગયા હતા.

પોલીસને જાણ કરાતાં વસ્ત્રાપુર પોલીસ ઘટનાસ્થળે પહોંચી ગઈ હતી. ત્યાર બાદ તપાસ કરતાં  અંદાજે રૂ. ૪૧.૫૦ લાખથી વધુની કિંમતની ચોરી થઇ હોવાનું માનવામાં આવી રહ્યું છે. તસ્કરોએ શો રૂમનું શટર કોઈ  સાધન વડે ખોલીને અંદર પ્રવેશ કર્યો હતો. વસ્ત્રાપુર પોલીસે આ અંગે ગુનો નોંધી શો રૂમના સીસીટીવી તેમજ આસપાસના સીસીટીવી ફૂટેજ મેળવી તપાસ શરૂ કરી છે.

આટલો મોટો શો રૂમ હોવા છતાં પણ શોપ બહાર સીસીટીવી કેમેરા પણ લાગેલા નથી. સૂત્રોના જણાવ્યા મુજબ નવ જેટલા તસ્કરો શો રૂમના શટરનું લોક તોડી અંદર પ્રવેશ્યા હતા. સિંધુ ભવન રોડ પર ૨૪ કલાક માટે પોલીસ પેટ્રોલિંગ વાન ફરતી હોય છે. તેમ  છતાં તસ્કરો ચોરી કરવામાં સફળ રહ્યા હતા.

ઉલ્લેખનીય છે કે  બે વર્ષ પહેલાં પણ જજીસ બંગલો રોડ પર આવેલા આઇપર્લ નામના એપલ સ્ટોરમાં નવ લોકોની ગેંગે ૪૦ લાખથી વધુના મોબાઈલ અને આઇપેડની ચોરી કરી હતી. તો સેટેલાઈટ-વસ્ત્રાપુર વિસ્તારમાંથી ૨૦ લાખના મોબાઈલની ચોરી થઇ હતી. ઉપરા ઉપરી બનાવો છતાં પોલીસ આ ગેંગને પકડી શકી નથી.