આંદોલન / ગુજરાતમાં કેટલો અસંતોષ? LRD મહિલા ઉમેદવારો પણ ગાંધીનગરમાં રસ્તા પર ઉતરી, પોલીસે કરી અટકાયત

• LRD વેઇટિંગના મુદ્દાને લઇ મહિલા ઉમેદવારોમાં રોષ
• LRD મહિલા ઉમેદવારોના ગાંધીનગરમાં દેખાવ
• 2018ની ભરતીના તમામ ઉમેદવારને ઓર્ડર આપવા માંગ

ગાંધીનગરમાં છેલ્લા ઘણા દિવસથી LRD ભરતીમાં 20 ટકા પ્રતીક્ષાયાદી જાહેર કરવાની માગ સાથે મહિલા ઉમેદવારો સરકાર સામે આંદોલન કરી રહી છે. ત્યારે આજ રોજ ગાંધીનગરમાં બેનર સાથે દેખાવ કરતી મહિલા ઉમેદવારોની પોલીસે અટકાયત કરી છે. 

ગતરોજ પણ કરાઈ હતી અટકાયત

આપને જણાવી દઈએ કે, ગતરોજ પણ મહિલા ઉમેદવારોની પોલીસે અટકાયત કરી હતી. LRD મહિલા ઉમેદવારોએ સામૂહિક મુંડન કરાવવાની ચીમકી ઉચ્ચારી હતી, છતાં સરકાર દ્વારા વેઈટિંગ લિસ્ટ જાહેર કરવામાં ન આવતા મોટી સંખ્યામાં મહિલા ઉમેદવારો ગતરોજ વિધાનસભાના ગેટ નંબર એક ખાતે એકઠી થઈ હતી. જોકે, મુંડન કરાવે એ પહેલાં જ તેમની અટકાયત કરવામાં આવી હતી. આ દરમિયાન મહિલા ઉમેદવારો અને પોલીસ વચ્ચે ઘર્ષણ સર્જાયું હતું. 

મહિલા ઉમેદવારો કેમ કરી રહી છે આંદોલન?

વાસ્તવમાં 16 જુલાઈ 2022ના રોજ LRD 2018 ભરતીનું વેઇટિંગ લિસ્ટ જાહેર કરવામાં આવ્યું હતું. જેમાં 1327 પુરૂષ અને 1112 મહિલા ઉમેદવારોની વેઇટિંગ લિસ્ટ જાહેર કરાઈ હતી. આ 1112 મહિલા ઉમેદવારોને બદલે 101 ઉમેદવારોને જ ઓર્ડર અપાતા અન્ય મહિલા ઉમેદવારોમાં રોષ જોવા મળી રહ્યો છે. સરકારની જાહેરાત છતાં ઓર્ડર ન મળતા LRD મહિલા ઉમેદવારોમાં રોષ જોવા મળી રહ્યો છે. 

2018-19  LRD વેઈટિંગ મુદ્દે મહિલા ઉમેદવારો ગાંધીનગર ખાતે આંદોલન કરી રહી છે. આંદોલન કરી રહેલી મહિલા ઉમેદવારે જણાવ્યું કે, 'ગૃહ રાજ્યમંત્રી હર્ષ સંઘવીએ 20 ટકા વેઈટિંગ ઓપરેટ કરવાનું કહ્યું હતું અને તમામ 2018 વેઈટિંગ લિસ્ટવાળા મહિલા ઉમેદવારોને નિમણૂંક પત્ર આપવા આવશે એવી જાહેરાત કરી હતી. આજે દસ્તાવેજ ચકાસણી થયાને દોઢ મહિનો થયો છે. હજુ સુધી કોઈ નિમણૂક પત્ર આપવામાં આવ્યા નથી. વેઈટિંગ લિસ્ટ જાહેર કરવાની માંગ સાથે મહિલાઓ છેલ્લા 19 જેટલા દિવસથી ગાંધીનગરમાં આંદોલન કરી રહી છે. જ્યાં સુધી ઉમેદવારોને અપાયેલું વચન પૂર્ણ કરવામાં નહીં આવે ત્યાં સુધી આંદોલન યથાવત રહેશે.' 

આપને એ પણ જણાવી દઈએ કે, વર્ષ 2018 LRDની ભરતીમાં વેઈટિંગ લિસ્ટ જાહેર કરવાની માંગ કરી હતી, ત્યારે રુપાણી સરકારે 20 ટકા વેઈટિંગ લિસ્ટ જાહેર કરવાની જાહેરાત કરી હતી. પરંતુ તે અંગે કોઈ નિર્ણય લેવાયો ન હતો. આમ રાજ્યમાં ભૂપેન્દ્ર પટેલની નવી સરકારની રચના બાદ પણ આશ્વાસન અપાયું હતું. જેનો સુખદ નીવેડો આવ્યો હતો અને ગત 16 જુલાઈના રોજ  LRD 2018 ભરતીનું વેઇટિંગ લિસ્ટ જાહેર કરાયું હતું.