નવતર પહેલ / ગુજરાતમાં અહીં બાળકો નહીં પરંતુ શાળા બાળકો પાસે જાય છે

મીઠાના અગરમાં કામ કરતાં અગરિયા (Agariya) ના બાળકો માટે શિક્ષણની કોઇ વિશેષ સુવિધા ઉપલબ્ધ હોતી નથી. આથી મોટા ભાગના બાળકો અક્ષરજ્ઞાનથી વંચિત રહેતા હોય છે. આવા બાળકો નિયમિત રીતે શાળા (school) એ જઇ શકતા નથી. આથી કચ્છ (Kutch) જિલ્લા પ્રાથમિક શિક્ષણ વિભાગે નવતર પ્રયોગ કર્યો છે. સામાન્ય રીતે શહેરી કે ગ્રામ્ય વિસ્તારનાં બાળકો રોજ સમયસર પોતાની શાળાએ જતા હોય છે. પરંતુ અગરિયા વિસ્તારનાં બાળકો માટે શાળાએ જવું ખૂબ કપરૂં હોય છે. તેઓ એવા વિસ્તારમાં રહેતા હોય છે કે ત્યાંથી બાળકો એકલા શાળાએ જઇ આવી શકતા નથી.

આથી શિક્ષણ વિભાગે આવા બાળકો માટે એસ.ટીની જૂની બસોમાં મોબાઇલ સ્કૂલ શરૂ કરી છે. જે નિયમિત રીતે બાળકો જ્યાં વસતા હોય ત્યાં જશે. આમ શાળા પોતે જ બાળકો પાસે જઇને તેમને ભણાવશે. જિલ્લા પ્રાથમિક શિક્ષણાધિકારી સંજય પરમારે જણાવ્યું હતું કે, 'સ્કૂલ ઓન વ્હીલ્સ પ્રોજેક્ટનાં ભાગરૂપે કચ્છનાં મોટા એવા અગરિયા વિસ્તારો ભચાઉ તાલુકાના જંગી અને અંજાર તાલુકાના સંઘડમાં આવી 2-2 શાળાઓ શરૂ કરાઇ છે.'

એક- એક શાળાનો લાભ અંદાજે 30- 30 બાળકો લઇ રહ્યાં છે. એલ.ઇ.ડી અને ડિસ્ક એન્ટેના સહિતની સગવડોથી સજ્જ આ શાળાઓમાં ઓનલાઇન શૈક્ષણિક પાઠોનું નિદર્શન પણ કરી શકાશે. આ શાળાઓમાં સામાન્ય શાળાઓ જેવી જ સગવડો પણ તૈયાર કરાઇ છે. અગરિયાઓના બાળકોને શિક્ષણ આપીને તેમને વર્તમાન પ્રવાહની સાથે રાખી શકાશે. આ નવતર સ્કૂલનો પૂરતો લાભ અગરિયા બાળકોને મળે તો તેઓ શિક્ષિત બની શકશે.