ઘણા દિવસથી નરેશ પટેલને લઈને અનેક અટકળો ચાલી રહી છે ત્યારે હવે ખોડલધામના પ્રવક્તા હસમુખ લુણાગરિયાએ નિવેદન આપ્યું છે કે, નરેશ પટેલની કોંગ્રેસમાં જોડાવાની વાત ખોટી છે
2022નું વર્ષ એટલે કે વર્ષ 2024ની લોકસભાની ચૂંટણીનું સેમિફાઇનલ યર, યુપી સહિત પાંચ રાજ્યોની ચૂંટણી સંપન્ન થઈ છે ત્યારે દેશની રાજકીય પાર્ટીઓનું ધ્યાન હવે ગુજરાત પર કેન્દ્રીત થયું છે ત્યારે ચૂંટણી પહેલા છેલ્લા એક મહિનાથી પણ વધુ સમયથી એક જ ચર્ચા રાજ્યમાં ચાલી રહી છે કે ખોડલધામ ચેરમેન નરેશ પટેલ કોના? અનેક અટકળો બાદ હવે નરેશ પટેલની કોંગ્રેસમાં એન્ટ્રી પાક્કી છે તેવું સૂત્ર તરફથી જાણવા મળી રહ્યું છે. જેની વચ્ચે રાજકોટ ખોડલધામ પ્રવક્તા હસમુખ લુણાગરિયા એ મોટું નિવેદન આપતાં જણાવ્યું છે કે,નરેશ પટેલની કોંગ્રેસમાં જોડાવાની વાત ખોટી છે.
રાજકીય આગેવાનો પોત પોતાની રીતે સ્ટેટમેન્ટ આપતા હોય છે-હસમુખ લુણાગરિયા
ખોડલધામના આગેવાન હસમુખ લુણાગરિયાએ વધુમાં ઉમેર્યુ હતું કે, નરેશ પટેલ હાલ કોઈ પાર્ટી સાથે જોડાયા નથી. તેમજ હાલ તેઓ કોંગ્રેસમાં જોડાવાની વાત પણ ખોટી છે. આગામી દિવસોમાં ગુજરાત વિધાનસભાની ચૂંટણીના પડઘમ શરૂ થશે તે પહેલા કેટલાક રાજકીય આગેવાનો પોત પોતાની રીતે પોતાનું નિવેદન આપતાં હોય છે.
ઘણા દિવસથી PK ની હતી ચર્ચા
થોડા દિવસ પહેલા જ એવા સમાચાર આવ્યા હતા કે પ્રશાંત કિશોરને ગુજરાતમાં કોંગ્રેસનું કેમ્પેન કરવાની ઈચ્છા છે. તેમણે રાહુલ અને પ્રિયંકા ગાંધી સાથે બેઠક પણ કરી હતી ત્યારે કોંગ્રેસમાં એક બાદ એક અનેક બેઠકો બાદ આખરે રાહુલ ગાંધીએ PKને ગુજરાત પ્રચારની કમાન સોંપવાનો નિર્ણય ફાઇનલ કર્યો હોવાનું સૂત્ર તરફથી સામે આવી રહ્યું છે. ખાસ વાત છે કે PKની ગુજરાત કોંગ્રેસમાં એન્ટ્રીથી નરેશ પટેલ પણ કોંગ્રેસમાં જ જશે તેવા એંધાણ દેખાઈ રહ્યા છે.
નરેશ પટેલ અને રાહુલ ગાંધીએ ફોન પર કરી વાતચીત
નરેશ પટેલ તથા પ્રશાંત કિશોરને લઈને દિલ્હીમાં અનેક બેઠકો બાદ આખરે જ્યારે બંને કોંગ્રેસમાં આવી રહ્યા છે ત્યારે મંગળવારે પણ રાહુલ ગાંધી અને નરેશ પટેલ વચ્ચે ટેલિફોનિક વાતચીત થઈ હોવાનું સામે આવ્યું છે જેમાં નરેશ પટેલે પોતાની શરતો અને ઈચ્છાઓ રાહુલ ગાંધીને જણાવી હતી.
