ક્રાઇમ / અમદાવાદમાં ફિલ્મી ઢબે ઓપરેશન: 25.52 લાખના દારૂ સાથે 9 આરોપીઓને SMCએ દબોચ્યાં, કાતિલ ઠંડીમાં ધાબળા ઓઢીને રખાઇ બાજ નજર

• માધવપુરામાં સ્ટેટ મોનિટરિંગ સેલની ટીમે લાખોનો દારૂ ઝડપ્યો
• SMC બાતમીદારને લઇ તાત્કાલીક માધવપુરા વિસ્તારમાં સ્ટેન્ડ બાય થઈ હતી
• બુટલેગર દારૂનું કટિંગ કરવા માટે રોજ પોતાના અડ્ડા બદલતા હતા

અમદાવાદ શહેરમાં બુટલેગર્સ અલગ અલગ મોડસ ઓપરેન્ડીનો ઉપયોગ કરીને દારૂનો જથ્થો લાવી રહ્યા છે, જેનો પર્દાફાશ અનેક વખત પોલીસ કરી ચૂકી છે. કેટલાક ભ્રષ્ટ પોલીસ કર્મચારીઓના કારણે બુટલેગર બિનધાસ્ત દારૂનો જથ્થો લાવે છે પરંતુ પ્રામાણિક પોલીસ અધિકારીઓના કારણે બુટલેગર્સનો ઇરાદા જોઇએ તેવા પાર પડતા નથી. માધવપુરા ખાતે આવેલી પોલીસ કમિશનર કચેરીની પાછળ સ્ટેટ મોનિટરિંગ સેલની ટીમે મોડી રાતે ૨૫.૫૨ લાખ રૂપિયાનો દારૂનો જથ્થો ઝડપી પાડતાં ચકચાર મચી ગઇ છે. બુટલેગર્સ છેલ્લા ઘણા દિવસોથી રોજની ૫૦૦થી વધુ દારૂની પેટીનો જથ્થો માધવપુરાની અલગ અલગ જગ્યા પર ઠાલવી રહ્યા હતા. કાતિલ ઠંડીમાં મોડી રાતે પોલીસે આખું ઓપરેશન પાર પાડીને મુખ્ય સૂત્રધાર સહિત નવ લોકોને ઝડપી લીધા છે.

એસએમસીની ટીમે નવ લોકોની ધરપકડ કરી
સ્ટેટ મોનિટરિંગ સેલની એક સ્પેશિયલ ટીમને બાતમી મળી હતી કે માધવપુરા વિસ્તારમાં છેલ્લા ઘણા સમયથી રોજની ૫૦૦થી વધુ દારૂની પેટીનું કટિંગ થઇ રહ્યું છે. ઘટનાની ગંભીરતા સમજીને સ્ટેટ મોનિટરિંગ સેલની ટીમે દારૂનાં કટિંગને રંગે હાથ ઝડપી પાડવા માટેનું ઓપરેશન હાથ ધરી દીધું હતું. એસએમસીની ટીમ બાતમીદારને લઇને તાત્કાલીક માધવપુરા વિસ્તારમાં સ્ટેન્ડ બાય થઇ ગઇ હતી અને મોડી રાતે અઢી વાગે જ્યારે દારૂ ભરેલી ટ્રક આવી ત્યારે એકદમ રેડ કરી દીધી હતી. રેડ દરમિયાન એસએમસીની ટીમે ઇરશાદ અહમદ અબ્દુલહમીદ શેખ સહિત નવ લોકોની ધરપકડ કરી હતી. એસએમસીએ કુલ ૧૧,૩૬૬ દારૂની બોટલ જપ્ત કરી. જેની કિંમત ૨૫.૫૨ લાખ રૂપિયા થાય છે. એસએમસીની ટીમે સોનુ લક્ષ્મણસિંહ રાજપૂત, અલતાફ, મુકુંદ મકવાણા, ફજલ સિંધી, ઇમરાન, પપ્પી, કમલેશ ઉર્ફે કાલુ મરાઠી અને દારૂ લાવનારને પકડવા માટે ચક્રો ગતિમાન કર્યાં છે. 

ધાબળા ઓઢીને એસએમસીની ટીમે કાતિલ ઠંડીમાં વોચ કરી
એસએમસીના ડીવાયએસપી કે.ટી.કામરિયાએ જણાવ્યું છે કે બાતમીદારની બાતમી પાકી હતી. જેથી ઘણા દિવસોથી મહેનત ચાલી રહી હતી. બુટલેગર દારૂનું કટિંગ કરવા માટે રોજ પોતાના અડ્ડા બદલતા હતા. જેના કારણે તેમને ઝડપી પાડવા અઘરું હતું. ગઇ કાલે ચોક્કસ બાતમી મળી ગઇ હતી. જેથી પોલીસની ટીમ અલગ અલગ જગ્યા પર પહોંચી ગઇ હતી. મોડી રાતે કાતિલ ઠંડી હોવાથી કેટલાક પોલીસ કર્મચારીઓએ તાપણું કરીને બેસવાની પણ વાત ઉચ્ચ પોલીસ અધિકારીઓને કરી હતી. જોકે તાપણું કરવાથી કેસમાં નુકસાન થાય તેવી શક્યતા હોવાથી ઉચ્ચ પોલીસ અધિકારીઓએ ના પાડી દીધી હતી. તેમ છતાંય પોલીસ કર્મચારી ધાબળા ઓઢીને ખૂણેખાંચરે બેસી રહ્યા હતા.