ચૂંટણીનાં રંગ / સુરતમાં 100 જેટલી મહિલાઓએ PM મોદી માટે કર્યો અનોખો પ્રચાર

અહીં જનતા પર ચડેલાં ચૂંટણીનાં રંગોને દર્શાવી રહ્યાં છે. આ બન્ને દ્રશ્યો સુરતનાં ભાજપ સમર્થક કાર્યકરોનો પક્ષપ્રેમ અને મોદીપ્રેમ વ્યક્ત કરી રહ્યાં છે. પ્રથમ દ્રશ્ય સુરતની લિંબાયત વિસ્તારની મહિલાઓનું છે કે જ્યાં 100 જેટલી મહિલાઓએ નમો અગેઇન, મેં ભી ચોકીદાર અને સ્થાનિક ઉમેદવારની જીતનાં વિશ્વાસને વ્યક્ત કરતી મહેંદી મૂકીને પ્રચાર કર્યો હતો. તો બીજું દ્રશ્ય અહીં સુરતનાં જ ડુંભાલ વિસ્તારમાં રહેતાં કાર્વિંગ આર્ટિસ્ટ પવન શર્માનું છે. જેમણે પીએમ મોદીને ભેટ ધરવા પેન્સિલની અણી પર પ્રધાનમંત્રી મોદીની આકૃતિ કંડારી છે. નરી આંખે ન જોઈ શકાય તેવી આકૃતિમાં તેમનો મોદી પ્રેમ સ્પષ્ટ જણાઈ આવે છે.
 
આ મહેંદી દેશમાં આવનારા લોકશાહીનાં પર્વ માટેની છે. જી હાં ગુજરાતમાં લોકસભાની ચૂંટણીને હવે ગણતરીનાં દિવસો જ બાકી રહ્યાં છે ત્યારે આ મહિલા તેમનાં પ્રિય અને હિતેછુક સરકારને ફરી સત્તામાં લાવવા માટે આ પ્રકારનો અનોખો પ્રયાસ હાથ ધર્યો છે. જે મહિલાઓ પાર્ટીનાં પ્રચાર માટે ડોર ટુ ડોર નથી જઈ શકતી તેમણે પોતાનાં ગમતા નેતાને સત્તા પર લાવવા પોતાની રીતે પ્રયાસો શરૂ કર્યા છે.

સુરતનાં લીબયાતની આ મહિલાઓએ મોદી સરકારનાં કાર્યથી પ્રભાવિત થઇને દેશમાં મોદીની સરકાર બને તે માટે મહેંદી દ્વારા અનોખો પ્રચાર શરૂ કર્યો છે. લીંબાયતમાં 100 જેટલી મહિલાઓએ પોતાનાં હાથમાં નમો અગેઇન, મૈં ભી ચોકીદાર, અને કમળનાં ફૂલની મહેંદી મુકાવી હતી. જેની પાછળ મુખ્ય ઉદેશ આ મહેંદીનો કલર જ્યાં સુધી રહે અને જ્યાં જ્યાં પણ જવાનું બને ત્યાં આ મહેંદી દ્વારા મોદી સરકારનો પ્રચાર થાય તેવો રખાયો છે.

માત્ર ગૃહિણીઓ જ નહીં. સુરતનાં ડુંભાલ વિસ્તારમાં રહેતા કાર્વિંગ આર્ટિસ્ટ પવન શર્માએ પણ પેન્સિલની અણી પર પ્રધાનમંત્રી મોદીની આકૃતિ કંડારી છે. આ સાથે જ આ આકૃતિ વિશ્વની સૌથી નાની આકૃતિ હોવાનો પણ દાવો કર્યો છે. પીએમ મોદીની આ પેન્સિલ પરની આકૃતિ માત્ર બે દિવસમાં જ તૈયાર કરાઈ છે. આમ તો અત્યાર સુધીમાં પવને 130 જેટલી જુદી-જુદી આકૃતિઓ બનાવી છે.

13 જેટલાં રેકોર્ડ પણ તેનાં નામે છે. પરંતુ પ્રધાનમંત્રીની આકૃતિ પહેલી વાર બનાવી છે. પવનનું કહેવું છે કે તે પ્રધાનમંત્રી નરેન્દ્ર મોદીનો ફેન છે અને એટલે જ તેણે આ આકૃતિ બનાવી છે. પવનની ઈચ્છા છે કે તે પોતાનાં હાથે પ્રધાનમંત્રીને આ ભેટ આપે. હાલમાં સમગ્ર દેશમાં લોકસભાની ચૂંટણીને લઇ પ્રચારનો રંગ જામ્યો છે. જુદી-જુદી રાજકીય પાર્ટીનાં સમર્થકો પોતાનાં નેતાને સત્તામાં બેસાડવા પ્રચારનાં અવનવા ઉપાયો કરી રહ્યાં છે ત્યારે તેમનાં આ પ્રયાસો કેટલાં ફળે છે એ જાણવા ચૂંટણી પરિણામો સુધી રાહ જોવી જ રહી.