વઢેર ગેંગ / સુરતની સોસાયટીઓમાં આવીને આ ગેંગ એવી રીતે ચોરી કરતી કે તમને અંદાજો પણ ન આવે, અંતે પોલીસે ઝડપ્યા

• સુરત શહેરમાંથી દક્ષિણ ભારતની વઢેર ગેંગ ઝડપાઈ
• દિવાળી બાદ  સક્રિય થઇ હતી ગેંગ
• ગાંડા, અંધજન હોવાનો ઢોંગ કરી કરતા હતા ચોરી

સુરત શહેરમાં થોડા દિવસ અગાઉ પૂણા અને સચિન વિસ્તારમાં બે ચોરીની ઘટના બની હતી. આ ઘટના મામલે SOGની ટીમે તપાસ શરુ કરી હતી. તપાસ દરમ્યાન પોલીસને ચોરી કરનાર ગેંગની પદ્ધતિ અને સમયગાળો એક જ સરખો હોવાનું સામે આવ્યું હતું. આ ઘટનામાં તામીલનાડુના વેલુર જીલ્લાની વઢેર ગેંગની સંડોવણી હોવાનું સામે આવ્યું હતું. 

જેથી આ ગેંગને ઝડપી લેવા SOGની ટીમ હરકતમાં આવી હતી. જે દરમ્યાન SOGની ટીમને બાતમી મળી હતી તેના આધારે પર્વત પાટિયા વિસ્તારમાંથી મંજન મુનીશાલી વઢી અને રવિચંદ્રન ગોવિંદન વઢીને ઝડપી પાડયા હતા. આ બંને વતન જવા માટે વાહન શોધતા હતા. પોલીસે આ ગેંગના બે આરોપીને ઝડપી પાડી તેની પાસેથી 51 મોબાઈલ, 5 લેપટોપ મળી 7 લાખથી વધુનો મુદ્દામાલ કબજે કર્યો હતો. 

દિવાળી બાદ સક્રિય થઇ ગેંગ, અંધ કે અર્ધ પાગલ, ભિખારી બનવાનો કરતા હતા ઢોંગ

પોલીસને આ ગેંગ શહેરમાં દિવાળી બાદ સક્રિય થઈ હોવાનું અને અનેક સ્થળોએ ખાસ કરીને સવારમાં ખુલ્લા ઘરોમાં ઘુસીને ચોરી કરી હોવાની માહિતી મળી હતી. જેના આધારે પોલીસે સોસાયટીઓમાં લગાવેલા CCTV ફૂટેજના આધારે આ બંને ઝડપી લેવામાં સફળતા મળી હતી. આ ગેંગએ ક્યારેક અંધ, કે અર્ધ પાગલ, ભિખારી ગાંડા અને અંધજન હોવાનો ઢોંગ રચીને શહેરમાં 40 જેટલી ચોરીની ઘટનાને અંજામ આપ્યો હતો.

આ ગેંગ સામે પૂણા, સચિન, કડોદરા, કામરેજ અને નવસારી રૂરલ પોલીસ મથકમાં અનેક ગુના નોંધાયા છે. હાલ પોલીસે અ આરોપીઓની ધરપકડ કરી તેઓએ અન્ય ક્યાં રાજ્યો કે શહેરોમાં આ પ્રકારના ગુના આચર્યા છે તે અંગે પૂછપરછ હાથ ધરી છે.