સિનેમા / હિંદી ઑડિયન્સ માટે પહેલા સાઉથની ફિલ્મોને ટીવી પર જ રજૂ કરાતીઃ શ્રુતિ હસન

• સાઉથની ફિલ્મો પહેલા જોવા મળતી ડિસ્કાઉન્ટ પર 
• પહેલાં તેલુગુ અને તામિલ ફિલ્મને ડબ કરીને એક ચૅનલ પર રિલીઝ કરવામાં આવતી હતી.
• આજે મોટાભાગની સાઉથ ફિલ્મો થાય છે હિન્દીમાં ડબ 

આજકાલ સિનેમાઘરોમાં સાઉથની ફિલ્મોનો દબદબો છે. હાલમાં જ રિલીઝ થયેલી પુષ્પા તેનું જીવતુંજાગતું ઉદાહરણ છે. સાઉથની ફિલ્મોની એક્ટિંગ, સ્ક્રીપ્ટ તથા નિર્દેશને દર્શકોના દિલ પર કબજો કરી લીધો છે. ઘણી હિંદી ફિલ્મો પણ આ સાઉથ ફિલ્મો પરથી જ બનાવવામાં આવે છે. ઘણા હિંદી સિનેમાના કલાકારો સાઉથની ફિલ્મોમાંથી જ હિંદી સીનેમાજગતમાં આવ્યા છે. આવામાં અભિનેત્રી શ્રુતિ હાસન કે જે સાઉથની ફિલ્મોમાં તથા હિંદી ફિલ્મોમાં પણ કામ કરી ચુકી છે, તેમણે સાઉથની ફિલ્મોને લઈને ખૂબ જ રસપ્રદ વાત કરી છે કે પહેલાના સમયમાં કઈ રીતે હિંદી ઓડિયન્સ સાઉથ ફિલ્મોને માણતી હતી.  

શ્રુતિ હાસનનું કહેવું છે કે હિંદી ઑડિયન્સ માટે પહેલાં સાઉથની ફિલ્મોને ડિસ્કાઉન્ટમાં આપવામાં આવતું હતું. જોકે સાઉથની ફિલ્મો હાલમાં ભારતભરમાં ખૂબ જ સારો બિઝનેસ કરી રહી છે. મોટા ભાગની બિગ બજેટ સાઉથની ફિલ્મોને હવે હિંદીમાં ડબ કરવામાં આવી રહી છે. શ્રુતિ હાસને કહ્યું હતું કે ‘પહેલાં તેલુગુ અને તામિલ ફિલ્મને ડબ કરીને એક ચૅનલ પર રિલીઝ કરવામાં આવતી હતી. લોકો એ ફિલ્મ જોતાં અને કહેતાં કે આ સાઉથ ઍક્ટરને અમે પસંદ કરીએ છીએ. કોઈક કારણસર પહેલાં ફિલ્મોને ટીવી જ પર રજૂ કરવામાં આવતી હતી. એવું લાગતું હતું કે આ ફિલ્મોને ડિસ્કાઉન્ટમાં વેચવામાં આવી રહી છે. મારા પિતા અને રજની સર જેવા લોકોની ફિલ્મોને જ પૅન-ઇન્ડિયા રિલીઝ મળતી હતી, કારણ કે તેઓ લેજન્ડ છે એવું ધારવામાં આવે છે. જોકે ‘બાહુબલી’ અને ઓટીટી પછી હું એમાં બદલાવ જોઈ રહી છું. સ્ટ્રીમિંગ સર્વિસ આવતાં લોકોને સબટાઇટલ મળ્યાં અને તેમની પસંદગીની ફિલ્મ જોવાનો પણ ઑપ્શન મળ્યો. હિંદી દર્શકોને પણ તેલુગુ, તામિલ અને કન્નડ ફિલ્મો પસંદ છે. તેઓ પહેલેથી એને પસંદ કરતા આવ્યા છે. આ કંઈ એવું નથી કે કેટલાક ફિલ્મમેકર્સ સાથે આવ્યા અને તેમણે નક્કી કર્યું, આ તો દર્શકોની પસંદગી છે. સુપરમાર્કેટમાં જે રીતે જે ખરીદવું હોય એની આઝાદી મળે છે એવી
જ આઝાદી હવે દર્શકોને મળી છે.’

આ પહેલા પણ ફિલ્મ બાહુબલીએ હિંદી સીનેમાજગતમાં પણ ધૂમ મચાવી હતી. મૂળ તેલુગુ ભાષામાં બનેલ તથા હિંદીમાં ડબ થયેલ આ ફિલ્મે સિનેમાજગતમાં ઈતિહાસ સર્જ્યો હતો. દર્શકોએ આ ફિલ્મ ખૂબ જ વખાણી હતી. માત્ર દર્શકો જ નહી પરંતુ સિનેમાજગતના દિગ્ગજો માટે પણ આ ફિલ્મ ઉદાહરણરૂપ બની.

બાહુબલી સિવાયની પણ ઘણી સાઉથ ઇન્ડિયન ફિલ્મોએ હિંદી સીનેમાજગતમાં ધૂમ મચાવી છે. હાલમાં આવેલી અલ્લુ અર્જુનની પુષ્પાએ તો માત્ર ભારતીયોના જ નહિ પરંતુ વિદેશીઓના પણ દિલ જીતી લીધા હતા. આ ફિલ્મના ગીત શ્રીવલ્લીનું ઇંગ્લિશ વર્ઝન પણ રિલીઝ થયું હતું. એટલું જ નહિ પરંતુ કોરિયન મહિલાએ આ ગીત પર ડાંસ પણ કર્યો હતો. આ રીતે ધીરે ધીરે સાઉથની ફિલ્મોની ડિમાંડ વધતી જઈ રહી છે.